Den un conferencia di prensa di prome minister Evelyn Wever-Croes dialuna ultimo, el a señala cu si yega e ora cu algun director of management dicidi di hiba Gobierno di Aruba corte pa motibo di implementacion di Wever-Croes Norm, e prome gasto cu lo mester paga di esaki nan lo mand’e pa Hulanda.
Manera Bon Dia Aruba a indica den su edicion di ayera, directornan di companianan semi-publico mester gana no mas cu 261.000 florin pa aña, debi na Wever-Croes Norm, cu ta un ley cu huridicamente ta yama Landsverordening normering topinkomens (LMT). Un ley cu ta bin pa un maximo di salario di directornan di sector semi-publico, companianan estatal di gobierno cu no ta departamentonan gubernamental.
E maximo di salario pa directornan of management di companianan semi-publico, segun Gobierno su punto di salida, ta e salario di un minister y riba dje nan ta indica cu e persona por gana mas cu un minister te na un 30% mas, loke ta nifica cu ta 130% di e salario di un minister of minister presidente. Ora nan a calcula esaki nan a yega na un cifra aproximadamente di 261.000 florin pa aña.
Mirando esaki, tambe ta importante pa considera e polemica di recorte di salario di 12.6% pa empleadonan publico y semi-publico, unda cu a bin dilanti e pregunta si den caso aki directornan of management lo por tin e chens di hiba gobierno na corte debi na e ahustacion aki. Pa esey prome minister a contesta: “Esey ta locual mi a bisa Hulanda tambe, door di bin impone pa baha e norma di tal forma, bo ta crea mas espacio cu directornan ta hiba gobierno corte. Den e prome momento cu nos lo haya nos prome veredicto y e prome gasto cu nos lo tin cu paga, nos ta mand’e na Hulanda pa nan pag’e pa nos”, el a sigura.
Dialuna ultimo, prome minister a informa cu tabatin director cu tabatin un salario entre 40.000 pa 50.000 florin pa luna, loke ta nifica “cu ta un poco di mas. E ta un compania estatal, no ta bo compania priva unda ta gana miyones. Bo ta gana miyones pasobra bo ta bende coriente cu awa, pueblo ta paga un tarifa pa abo por genera awa. Por ehemplo, no por ta asina cu pueblo ta paga un tarifa y abo ta paga bo mesun salario halto; pero tampoco un salario abao pasobra nos kier bon tecnico y profesionalnan”.
Ta p’esey cu el a lamenta cu Hulanda a cambia e esencia di e ley – “pero nos tin cu biba cune pa loke e ta” – y cu parlamento no ta mara na dje pero gobierno si. Mester a bay pidi placa pa paga FASE, subsidio di salario, alivio fiscal durante pandemia, y aki Hulanda a presta placa pero a pone condicionnan y gobierno mester acepta e condicionnan.
Pa finalisa, el a expresa cu nan ta espera cu for di esaki por sali un ley miho y e ora ey por tin menos caso den corte manera cu nan ta premira.
