Ayera mainta, prome minister Evelyn Wever-Croes a duna un conferencia di prensa pa trece dilanti diferente topico, entre nan e situacion di Covid-19, cu a bira preocupante pa aumento di casonan positivo. Manera el a sigura, cu un persona so den unidad di cuido intensivo nan no tin e base huridico pa implementa medidanan pa evita e plamamento di e virus.
E cifranan di diabierna ultimo a mustra cu te e dia ey tabatin 701 caso activo unda cu 10 persona tabata interna na hospital, 1 di nan den unidad di cuido intensivo y a registra 3 fayecido.
Den un siman e casonan positivo a redobla, manera prome minister a sigura, y tin un averahe di 134 caso pa dia, loke ta nifica cu e tasa di positividad ta di 46%, motibonan “cu tene nos preocupa”; pero e situacion ainda ta bao di control manera el a comenta.
Sinembargo pa via di aumento di casonan, den nomber di Crisis Team nan ta alerta comunidad pa tuma e pasonan necesario pa reduci e transmision di Covid-19. “No warda gobierno bin cu medidanan pa cuida bo. Legalmente cu un persona so den intensive care nos no tin e base legal pa impone medidanan pa controla y parti boet si hende no ta cumpli cu nan”, prome minister a sigura.
Debi na e cifranan, gobierno tin e preocupacion cu esnan cu ta den e grupo di 701 caso activo, e edad ta di 40 pa 50 aña cu no ta wordo considera ta un edad hopi halto ni den riesgo. Pero di otro banda, e edad ta bahando unda cu por yega na hoben y muchanan cu por wordo transmiti e virus na adulto, specialmente na esnan mas vulnerabel di salud.
Pa reduci e cantidad di caso, prome minister a haci un peticion na comunidad pa sigui cuida y evita sitionan cu tin aglomeracion di hende, principalmente si ta espacionan paden. Tambe ta recomenda pa evita tin contacto cu personanan cu por ta malo y por tin sintomanan di Covid. Si un persona tin sintomanan por fabor keda cas y solicita un test di Covid-19.
Pa loke ta trata vacunacion, 80% di e poblacion di Aruba mayor di 18 aña a wordo vacuna. Pero referiendo na e booster shot of tercera dosis, di esnan riba 60 aña solamente 54% di nan a wordo vacuna, unda cu por mira cu te ainda tin espacio pa por mehora. Esnan cu te ainda no a haya nan vacuna por acerca na Departamento di Salud Publico durante oranan di trabao sin cu mester solicita un cita; Mobile Unit no ta disponibel mas segun prome minister a declara.
Ta berdad cu hopi hende no ta birando malo y ta bayendo hospital, pero loke nan ta mira ta cu si cada biaha e edad ta bira mas hoben of ta afecta e grupo mas grandi den comunidad, “e ora si nos ta bay haya nos cu un presion hopi grandi y nos kier evita esey. E riesgonan ta bay aumenta cu e cantidad di 701 y ta bay aumenta den esnan mas vulnerabel den nos famia”, Wever-Croes a finalisa.
