SKOA a rek e periodo di areglo di pago y facilita e proceso di pago pa mayornan no mester bin te na oficina pa haci peticion pa areglo, por haci esey awor online. Ta pidi tur mayor pa tene na cuenta pa cumpli cu tur rekisitonan necesario prome cu fin di aña escolar pa tur cos cana debidamente y alumno no perde cupo.

Anuesca Baly, Director di SKOA ta informa cu aproximadamente tin un 20% di areglonan cu ta habri cu no a paga. Esaki den pasado tabata pio segun e directora ta remarca, aña pasa tabata tin 687 areglo di pago y di esaki a keda aworakinan aproximadamente 275 habri di mayornan cu no a cumpli of a priminti di bin anto no a bini.

SKOA ta bisa semper cu areglo ta wordo haci, nan ta haci prome pago y despues nan no ta bini mas pero comunicacion ta esencial. Por manda un email via finanzas y portanan di SKOA semper ta habri segun Sra. Baly, “semper ta contesta e mayor pa busca un solucion pa e problema ora cu no por paga.”

E aña akinan a cuminsa cu reinscripcion poco laat unda cu normalmente ta haci e na final di Maart. Areglonan di pago ta cuminsa normalmente un aña adelanta pues mayornan semper por haci peticion pa areglo di pago for di prome di Maart, anto e ta bay te cu e siguiente aña. E aña aki a cuminsa cu inscripcion di Kleuter prome di December, e di dos grupo ta muchanan di Kleuter bayendo Eerste Klas tambe peticion pa inscripcionnan a cuminsa for di 1 di April mayornan por a haci nan escogencia online y tambe via di e scol.

Despues tin e parti di reinscripcion, y un di e factornan importante segun SKOA pa mayornan cu ta haci reinscripcion: Tin dos motibo pa kico ta pone den e manera akinan. E prome motibo ta pasobra hopi biaha e muchanan a verhuis memey di aña escolar of number di contacto a cambia pues mester haci e peticion un bes mas. Pero tambe ta importante cu mayornan cumpli cu tur rekisito, manera pago di aña escolar pa nan por bay e siguiente aña escolar y tambe pa por haci nan peticion pa areglo. Mayor via di SKOA ta haya practicamente casi 1 aña pa cumpli cu su areglo di pago, generalmente pa schoolgeld pero tambe na e scolnan pa loke ta aircogeld. Si mayornan no a cumpli cu tur rekisito, na final di aña escolar 8 di Juli mayornan lo ricibi carta di uitschrijving di alumno.

SKOA ta tuma na cuenta cu si e mayor no a reinscribi e alumno ta pasobra no ta desea pa su yiu ta na un scol di SKOA mas. P’esey ta urgi tur mayor pa cumpli cu tur rekisito prome cu dia 8 di Juli, eigenlijk prome cu dia 7 di Juli pasobra dia 8 ta ultimo dia unda nan lo haya e carta pa alumnonan no keda sin cupo. “Nos deber di parti di SKOA como un institucion cu ta brinda enseñansa ta e siguiente stap, tur mayor cu haya un carta di uitschrijving nos ta duna e nombernan aki na Bureau Leerplicht pasobra Leerplicht ta pa e mayor, no necesariamente pa e institucion,” sra. Baly ta splica. Muchanan mester keda na scol te cu edad di 17 aña ta Leerplicht y esaki ta parti di e banda cu SKOA ta cumpli cune.

Hopi bon comunicacion cu Departamento di Asuntonan Social
 Si mayor tin un cuenta habri of atrasa, e no ta haya un peticion nobo. Ta pidi y urgi tur mayor pa no warda te ultimo momento, Schoolgeld y Aircogeld mester a wordo cumpli caba for di fin di Maart. Esunnan cu a haci peticion pa areglo a haya esaki segun SKOA, no ta nenga ningun mayor areglo di pago pero mester cumpli cu esaki. Den e ultimo añanan SKOA tin hopi bon comunicacion tambe cu Departamento di Asuntonan Social cual ta yuda hopi mayor cu ta ricibi uitkering etc.

“Nos ta urgi mayornan, nos ta comunica cu DAS y nan tambe ta comunica cu nan clientenan, pa si nan no cumpli nan tambe lo wordo acerca pasobra e placa ta pa scol y no pa uza pa otro cosnan cu no tin di haber cu scol pa cu e alumno,” segun Sra. Baly. Door cu tin e bon comunicacion aki, mayornan ta bay tuma nan responsabilidad y cumpli cu locual ta nan deber. Ta den tramite pa finalisa Sociale Fonds cual segun SKOA no ta full cla ainda lamentablemente pero pa e aña escolar nobo lo kier tin esaki estableci.