Departamento di Salubridad Publico a informa cu segun nan resumen semanal di ayera diabierna 03 di juni, 563 persona a recupera den e siman aki y un total di 941 caso nobo di COVID-19 a keda registra.

E cantidad di casonan activo di COVID-19 pa awe ta 701 y cantidad di fayecidonan relaciona cu COVID-19 a aumenta na 216, manera e rapport ta indica.

Datonan ta ilustra casonan nobo di COVID-19 cu un averahe semanal di 134 caso positivo pa dia y un averahe di ‘Positivity rate’ semanal di 46% pa dia.

Actualmente na Aruba tin 10 persona interna cu of debi na COVID-19 di cual den ICU tin 1 persona y riba piso general 9. Na Colombia no tin ningun pashent di COVID.

Ademas, den un publicacion Departamento di Salud Publico a informa cu por medio di nan monitoring na ta registrando un aumento den casonan positivo na Aruba manera cifranan ta indica.

Pa e motibo aki nan ta haci apelacion na comunidad pa bira mas consciente pa protege nan mes, famia y amigonan pa asina ey evita di sigui plama e virus, specialmente pa esnan mas vulnerabel.

Aruba ta den un etapa di recuperacion y ta importante pa comunidad yuda den e proceso pa reduci contagio.

Un di e metanan mas importante, ta pa proteha esnan mas vulnerabel den comunidad, cu ta adultonan mayor y personanan cu cierto condicionnan medico.

Pa esaki, DVG ta recomenda comunidad:

Esnan cu tin sintoma parecido na griep, pa no bay den publico pero haci un test di COVID. Test di COVID por wordo haci cu self-test of por wordo pidi via dokter di cas of riba www.dvg.aw of www.arubacovid19.org

Evita contacto cu cualkier persona cu sintoma di COVID.

Haci uzo di tapa boca den espacionan cera of unda tin multitud di hende.

Ciudadanonan riba 60 aña pa pasa busca nan prome of di 2 booster shot mas pronto posibel. Por walk in na DVG Oranjestad, haci uso di e Bus di Vacuna of tuma contacto cu number 2800101 pa mas informacion.

Ciudadanonan riba 12 cu tin 2 vacuna so, pasa busca nan boostershot.

Ciudadanonan cu ainda no a vacuna, pa haci esaki mas pronto posibel.

Mientras cu otro paisnan ta experimenta un aumento den number di casonan di Covid-19 pa di seis siman consecutivo segun Organisacion Pan Americano di Salud (PAHO) a señala den un publicacion, e director di e organisacion aki a pidi un vigilancia mayor debi na comienso di temporada di horcannan y di influenza.

Den ultimo siman, paisnan di e region a notifica un aumento di 10.4% di casonan di Covid-19 y un aumento di 14% den e cifranan di fayecido, loke ta pronostica “un menasa dobel di un aumento posibel di influenza, hunto cu aumento di casonan di Covid-19” e director Carissa F. Etienne a sigura.