Recientemente, minister Hulandes di Relacionnan Internacional, Wopke Hoekstra a contesta preguntanan por escrito di parlamentarionan Attje Kuiken (Pvda) y Don Ceder (CU) tocante e aplicacion den parti Caribense di Reino di sancionnan di Union Europeo contra individuonan Ruso.
E parlamentarionan Hulandes a haci e siguiente pregunta: “Bo ta dispuesto pa urgi Aruba pa tuma accion inmediato contra registro di aviacion Arubano pa avionnan priva di oligarcanan Ruso contra ken a impone sancion, pa asina enforsa sancionnan efectivo den Reino?” Hoekstra a contesta cu: “Te e fecha, ministerio di Transporte di Aruba a conclui cu tin un posible conexion cu Rusia den nuebe avion registra na Aruba. Ningun di e avionnan ta na Aruba. A tuma medidanan relaciona cu seis avion. Tambe a impone un prohibicion di vuelo riba dos avion cu no tin un doño Ruso, pero cu tabata na Rusia na momento di introduccion di e medidanan, en conexion cu seguridad di vuelo. Otro avion cu tambe ta na Rusia y tin un doño Ruso (kende, mester menciona, no ta riba e lista di sancion di Union Europeo) a keda prohibi di bula pa e mesun motibo. Finalmente, dos otro avion residiendo na Rusia y propiedad di doñonan Ruso no-sanciona pa Union Europeo a keda oficialmente retira for di e registro, pasobra e doñonan a indica cu nan no tin intencion di fisicamente retira e avion for di Rusia den futuro cercano.”
Ademas, e parlamentarionan a pidi aclaracion tocante e registracion y presencia di barconan na e paisnan den parti Caribense di Reino. Nan a haci e pregunta: “Si esaki ta e caso, bo tambe ta prepara pa tuma accionnan similar eynan?”
Hoekstra a contesta: “E islanan CAS tambe ta responsable pa cumplimento cu e sancionnan den ramo di transporte maritimo. Manera a indica caba, e autoridadnan local ta den contacto cercano cu Ministerio di Infrastructura y Maneho di Awa relaciona cu e aplicacion specifico di e sancionnan pa transporte maritimo.”
