Ayera mainta Archivo Nacional di Aruba durante un conferencia di prensa a anuncia e programa cu nan tin planea pa e siman di Archivo unda cu na nivel mundial dia 9 di juni ta wordo conmemora e Dia Internacional di Archivo.

Pa cu esaki, Raymond Hernandez director di Archivo Nacional di Aruba (ANA) a expresa cu International Council on Archives a pidi pa tur instancia di archivo pa dedica e dia aki y henter e siman tambe na e trabounan di archivistanan, pa e aña aki e tema ta “Somos Archivo, Archives Are You” unda nan ta pone enfasis cu archivo ta: e hendenan cu ta traha den archivonan pa conserva e documentonan y na mesun momento nan ta usa esaki como un investigacion pa e comunidad pa mustra cu no ta solamente nan cu ta traha den archivo esunnan cu mester ta responsabel pa esaki, sino henter e sociedad civil cu mester reconoce cu documentacion y preservacion di informacion ta hopi importante.

Hernandez a sigura cu nan mester haci mas promocion pa loke ta trata e organisacion di e siman aki y esey ta e motibo di e actividadnan.

9 di juni ta wordo reconoci for di aña 2007 pa Nacionnan Uni como e Dia Internacional di Archivo y Sustainable Development Goals (SDG) tambe ta wordo papia di esaki, na unda cu den e meta 16 ta indica cu informacion ta algo hopi importante, e ta crea e base pa un comunidad cu derecho igual pa tur hende pero tambe ta enfoca riba transparencia cu ta necesario pa tin bon institutonan na cada pais.

Hernandez a bisa cu e siman aki nan ta lansa un campaña na unda nan kier conscientisa e hendenan pa trece documentonan historico of material historico pa archivo pa asina bira parti di e herencia cultural cu tambe ta cuadra cu loke International Council on Archives ta pidi na nan, conscientisa comunidad cu archivo ta nan tambe, archivo ta comunidad.

Pa loke ta trata e actividadnan, dialuna 6 di juni nan lo habri e siman cu un bishita di un organisacion cu ta yama Funari unda cu prome minister Evelyn Wever-Croes lo ta presente hunto cu minister di Cultura y Finansas Xiomara Maduro pa asina ey inaugura e siman oficialmente.

Despues di un organisacion cu ta traha cu mayoria di hende grandi, e siguiente dia 7 di juni nan lo haya bishita di algun scol dezesde klas cu lo haya un rondleading na Archivo Nacional.

Pa dia 8 di juni nan lo tin un webinar conhuntamente cu archivonan di Corsou y Surinam lo ta presente na Association of Caribbean University, Research and Institutional Libraries (Acuril) unda cu nan como archivonan lo debati y haci un presentacion riba un proyecto cu nan a cuminsa hunto cu institutonan na Hulanda pa asina ey nan purba di profesionalisa e trabou di esnan cu ta den e area di informacion.

Dia 9 di juni cu ta e Dia Internacional mes nan lo reuni na Archivo Nacional pa haci un actividad special unda nan ta organisando diferente eventonan cu lo tuma luga, pa dia 10 di juni nan lo tin sesionnan informativo pa hefenan di servicio y pa beleidsmedewerker di departamentonan di gobierno pa asina ey nan atende riba e importancia di un bon maneho di informacion digital, pa garantisa cu den transcurso di añanan e informacion por permanece.

Pa dia 11 di juni nan lo tin un opendag unda nan ta warda comunidad di Aruba pa por hiba na Archivo Nacional material of documentonan historico.

Edric Croes trahado den maneho di archivo for di aña 2009 a splica e importancia di e balor di archivo den sociedad, unda el a sigura cu mester tene na cuenta cu e informacion cu ta generando den generacion aki tambe ta importante pa e futuro generacion.

“Si nos no haci’e na tempo, nos no tin tempo pa bay busk’e aki 100 aña back”, Croes a sigura.

Pa e motibo aki tambe nan ta keda enfatisa riba e importancia pa e hendenan hiba nan documentonan unda cu Archivo Nacional semper ta wordo mira como den pasado, pero mester bay den parti di futuro tambe unda cu futuro generacion por wak con e biba tabata awor, cu archivo tin balor.

Croes a declara cu e proceso di con e Archivo Nacional ta bayendo ta cu mester mir’e como un luga cu ta wanta informacion sea como documento riba papel pero tambe cu documentonan digital, ta p’esey cu nan mester ayudo di comunidad.

Di su parti, minister di Cultura y Finanzas Xiomara Maduro a bisa cu un pais su memoria ta hopi importante, cu mester conserv’e y cuid’e y pa e motibo aki archivo ta percura pa e memoria di e pais cu no ta solamente e informacion di e temponan pasa sino cu tambe mester ta consciente cu hendenan mes ta trahando algo den presente cu lo ta e historia.

E campaña manera minister Maduro a anuncia ta denomina Colecta, Conoce y Conserva “3C” pa asina comunidad colecta informacion y material historico den forma di documentonan, potretnan, material audiovisual y tambe digital, tambe pa asina conoce e historia di Aruba y pa conserva historia di e futuro generacion.

E campaña manera a ser indica caba ta pa conscientisa cada persona, no solamente hende grandi sino e hobennan di awor riba e importancia pa documenta.

Adhunto un link cu video di Minister Xiomara Maduro – Lansamento di Campaña 3C – TRECE: https://www.dropbox.com/sh/vilrkizyykp81gc/AAAV2OP2vs1iywgC2Y4NZir4a/Prensa/MinFic_Conf_Trece_Ana_Prensa.mp4?dl=0