Wouter van den Berg, presidente di e organisacion tras di Aruba Hi Winds ta conta Bon Dia cu e tempo di preparacion pa Aruba Hi Winds 2022 tabata poco corto, pero por bisa caba cu e interes pa esaki ta hopi mas grandi den comparacion cu añanan anterior. E organisacion a dicidi na December 2021 cu lo cuminsa Aruba Hi Winds atrobe despues di dos aña pa motibo di e pandemia.
E aña aki cu un organisacion consistiendo di 15 hende cu hendenan local organisando e evento, compara cu e sistema anterior cu mester a trece dos persona for di Hulanda pa yuda hinca e evento den otro, ta un di e cambionan chikito. Esaki ta e prome biaha cu ta organisa Aruba Hi Winds dos luna adelanta, pasobra e semper tabata wordo organisa den luna di Juli. A cambia esaki pa e fin di siman di Hemelvaart cu hopi hende tin liber di trabao y por bin disfruta di diferente actividadnan.
E actividadnan principal di Windsurfing cu Kitesurfing a keda mescos. Dentro di esakinan tin algun categorianan nobo cu a wordo introduci, y Wing Foiling, Kite Foiling entre otro a ricibi algun upgrade.
Tambe Mountain Biking a sigui, cu categoria di eBike pa esnan cu bicicleta electronico tambe por participa. E aña aki a cuminsa cu e sailing boats chikito cu tin nan propio careda na Nikki Beach, cual tambe ta cay bao di Aruba Hi Winds y ta algo cu lo pronto kier sigui expande pa otro aña segun sr. Van den Berg.
E aña aki Windsurfing ta wordo organisa pa IFCA – The International Funboard Class Association, miembro di World Sailing cu derechonan pa premia y reconoce titulonan di campeonato continental y mundial. Pues tur Windsurfers participando e aña aki ta hayando punto pa nan ranking mundial cual ta trece mas reconocemento internacional, haciendo Aruba Hi Winds un evento mas grandi ainda. E aña aki a cuminsa Live Stream e evento online y tambe Vince Irie, conocido drone racing pilot lo ta trahando algun produccion pa e evento.
Sr. Van den Berg ta splica cu por a ripara caba cu tin hopi mas interes den Aruba Hi Winds compara cu añanan anterior pa locual ta participacion y colaboracion. Patronisador principal nobo e aña aki ta Succesfully, un compania local di IT, hunto cu Windpark Vaderpiet, y hopi otro personanan cual ta di gradici pa a yuda realisa Aruba Hi Winds 2022.
