Faltando un dia pa eleccionnan na Colombia y cu te ainda no tin conocemento di ken lo ta e proximo presidente di e pais aki, comunidad Colombiano na Aruba for di dialuna ultimo a cuminsa vota den un jornada cu lo caba mañan diadomingo 29 di mei.

Asina a señala e consul di Colombia na Aruba Sra. Mirza Gnecco Pla den un entrevista na Bon Dia Aruba unda el a splica cu e censo electoral na Aruba ta superior na 5.000 votado cu te mañan tin e oportunidad pa eherce nan derecho di vota pa nan candidatonan faborito for di 8or di mainta te 4or di atardi.

Pa decision di Congreso di Republica di Colombia e ciudadanonan Colombiano cu ta na exterior tin un siman completo pa nan vota, e idea ta pa facilita e participacion, aunke Aruba ta un teritorio chikito, tin consulado na otro paisnan cu ta componi pa ocho of dies estado y mester establece varios punto di votacion, ta p’esey cu e votacionnan a cuminsa dialuna 23 di mei y ta cera mañan 29 di mei.

E inscripcion pa ciudadanonan Colombiano na Aruba por haya nan cedula pa nan por vota tabata habri te dia 23 di maart ultimo, pa e proceso electoral aki personanan cu ta inclui den censo electoral di e consulado na Oranjestad, Aruba, por vota, loke ta nifica cu esunnan cu no a wordo inscribi no por vota.

E proceso di votacion segun Gnecco a menciona ta senciyo y facil cu ta den man di e huradonan di votacion, den caso aki tambe ta ciudadanonan Colombiano cu di manera boluntario ta brinda henter nan dia pa realisa e funcion aki, nan ta esunnan cu ta maneha e material electoral, esunnan cu ta registra e persona cu ta bay vota y den oportunidad aki nan tin cu scoge presidente y vice-presidente, un proceso cu ta tarda entre 3 y 4 minuut.

“Den siman aki hopi hende a bin pa vota”, el a sigura.

For di dialuna te cu awe diasabra a wordo instala un mesa di votacion so cu ta ubica na e Consulado di Colombia na Julianastraat 4 unda nan ta conta cu ciudadanonan boluntario cu henter e siman a bin verificando e proceso, nan tambe ta testigonan di votacion cu ta acredita pa e partidonan politico.

Pa mañan diadomingo nan ta bay instala ocho mesa na otro luga mas grandi cu e consulado mes na de la Sallestraat number 26, tambe el a informa cu nan tin casi 700 persona registra na cada mesa y nan ta espera e ciudadanonan Colombiano cu kier eherce nan derecho pa vota.

Gnecco a comenta cu Canciyeria di Republica ta esun cu ta encarga di tur oficina di Colombia na exterior pa nan participa y yuda den organisacion di jornada electoral caminda segun el a afirma e contacto ta permanente, dia pa dia nan ta ricibi instruccionnan tocante e desaroyo di e proceso electoral cu coordinacion y bon organisacion.

E consul Sra. Mirza Gnecco Pla a tuma posesion dia 3 di januari ultimo unda tambe tabata na Aruba pa seis aña cu e mesun funcion for di 02 di januari di 2013 te 31 di december di 2018.

Den Gnecco su opinion, e ta wak cu e proceso electoral ta bayendo bon, na Aruba semper nan tin procesonan electoral trankilo, “e ciudadano Colombiano cu ta na exterior semper kier participa y Aruba ta un circunscripcion den cual e hende ta participa y ta comprometi cu eventonan di su pais, nos funcion principal ta pa garantisa cu e personanan di un manera liber por eherce nan derecho pa vota, e proceso ta desaroyando hopi bon y cu absoluto transparencia”, el a afirma.

Pa e motibo aki, e ta invita tur ciudadano cu nacionalidad Colombiano cu ta na Aruba pa bay vota awe of mañan, igualmente na esunnan cu a wordo acredita como testigonan electoral pa nan presenta y verifica e proceso.

“E resultado cu nos ta espera cu nos funcion akinan ta pa hende lo keda satisfecho, pa nan por eherce nan derecho y cu lo wordo desaroya di manera transparente y liber, manera mester ta”, como ciudadano Colombiano, Gnecco ta espera cu tur hende lo participa, “Registraduria Nacional di Estado Civil ta esun cu solamente tin e competencia pa duna e resultadonan y cu e sucesion di presidente y vice-presidente di Colombia lo tuma luga di manera corecto y sin ningun contratiempo”, el a finalisa.

Registraduria Nacional di Estado Civil y Conseho Nacional Electoral ta indica cu tin mas di 38 miyon Colombiano registra pa vota na 112.897 mesa ubica na nan teritorio nacional.

Segun e carchi di votacion oficial, diseña y emiti pa Registraduria despues di un sorteo, e orden di e shete candidato y di nan formula pa vice-presidencia ta e siguiente: Prome ta ubica Rodolfo Hernandez y Marelen Castillo, cu ta representa nan candidatura independiente di partidonan politico cu un discurso anti-corupcion.

Despues ta sigui Jhon Milton Rodriguez y Sandra de las Lajas ken nan a coy e banderanan conservador di iglesia cristian, nan no ta di acuerdo cu derecho pa aborto, eutanasia y adopcion pa parehanan di mesun sexo.

Federico Gutierrez y Rodrigo Lara ta esunnan cu ta sigui cu e partido Equipo por Colombia, e coalicion cu a agrupa e mayoria di derecha di e pais, desde e liberalnan di Cesar Gaviria te partido Centro Democratico di e ex-presidente Alvaro Uribe Velez.

Na otro banda di e carchi di votacion ta Sergio Fajardo y Luis Gilberto Murillo, eligi pa Coalicion Centro Esperanza, Enrique Gomez y Carlos Cuartas Quintero ta continua como representantenan di Movimiento Salvacion Nacional, despues Gustavo Petro y Francia Marquez di Pacto Historico e movemento iskierdista cu ta lider den tur encuesta y na e di tres parti di e carchi ta Luis Perez cu Ceferino Mosquera y Ingrid Betancourt cu e coronel retira Jose Luis Esparza di partido Verde Oxigeno.

Na final di e carchi tin un espacio dirigi pa voto en blanco.

Di acuerdo cu e Constitucion Politico di Colombia den su articulo 190, ta establece cu e candidato pa presidente mester saca mas di e mita mas un di e voto pa gana den e prome buelta, si ta tuma den consideracion e resultadonan di e ultimo eleccion di cuatro aña pasa, 19.6 miyon persona a participa, loke ta nifica cu mester di mas di 9.8 miyon voto pa cu un di e candidato presidencial lo gana den e prome buelta, si ningun candidato lo logra, manera a sucede den tres ultimo eleccion na Colombia, e Constitucion ta ordena pa celebra un votacion nobo tres siman despues den cual lo participa solamente dos candidato cu lo a haya e votacionnan mas halto.

E di dos buelta ta programa pa diadomingo 19 di juni, den eleccionnan aki lo declara ken lo ta e proximo Presidente di Colombia cu e mayor cantidad di voto.