Ryan Maduro director di EPI: “Nos tin cu haci innovacion, tur e flechanan ta punta cu EPI tin cu renoba su curriculum”

Diaranson mainta Colegio EPI a tene un conferencia di prensa pa asina ey trece dilanti informacion relaciona cu declaracionnan di minister di Enseñansa Endy Croes a haci caba tocante proceso di renobacion y innovacion di curriculum na Colegio EPI.

Ryan Maduro ken ta fungi como director a splica cu na 1996 a cuminsa e fusion entre diferente scolnan y na 1997 nan tabatin e prome aña academico cu nan a habri bao e nomber di EPI, na augustus di e aña aki e colegio lo cumpli 25 aña na unda cu Maduro a sigura cu nan tin plannan pa celebra esaki.

E proposito di EPI desde cu el a wordo lanta ta pa dos cos principal: un ta pa make sure cu educacion profesional ta alinea cu e rekisitonan di mercadonan laboral y di dos ta pa prepara studiantenan pa un comunidad pa por fit den e bida di comunidad y nan participacion den dje.

“For di ora cu nos a lanta EPI semper esey tabata e esencia”, Maduro a expresa. Igualmente el a bisa cu nan campus ta consisti di 50.000 metro cuadra unda e edificionan cu nan tin ta traha pa 1.100 studiante, nan facilidadnan construi ta di 15.000 metro cuadra y nan tin 13 edificio y tres trailer.

Di loke ta trata e cantidad di personal, el a señala cu nan tin 140 docente y 65 personal di sosten, caminda el a sigura cu ta un poblacion basta amplio cu ta tur dia riba e campus di EPI.

Pa 2021-2022, loke ta nifica e aña escolar aki nan tabatin 14 opleiding cu a draai di e cuatro diferente unidad cu nan tin, e vision di EPI segun Maduro a enfatisa ta pa crece pa 27 opleiding parti den e diferente unidadnan y tambe pa introduci un nivel cinco cu ta e hospitalidad di turismo pa asina tambe bin cu associate degree pa cada un di e unidadnan pa di e forma ey por contribui pa studiantenan studia na Aruba y tin e potencial di keda den e mercado laboral tambe.

Na e momentonan aki, studiantenan di EPI a aumenta pa casi 2.000 unda cu nan tin e dobel di capacidad segun un analisis cu Maduro a trece dilanti di aña 2006 y 2007 te cu awor, tambe el a mustra cu desde 2014 en adelante nan a cuminsa pik entre 1.800 pa 2000 studiante y esey no a cambia.

EPI ta traha den cuadro unda nan ta reporta na Dienst Publieke Scholen (DPS) y na minister di Enseñansa caminda nan ta e personanan cu EPI tin cu duna cuenta tocante manehonan, decisionnan y tambe intercambia idea di decisionnan cu mester tuma, “decisionnan cu EPI ta tuma no ta riba su mes e ta tuma nan pero e ta haci’e den un bon cuadro”.

Ademas di esaki, nan tin stakeholders manera Inspectie di Onderwijs, Directie Onderwijs y tambe nan tin Examenbureau den e cuadro aki nan ta papia di proceso di innovacion unda nan ta tuma e decisionnan y nan ta fiha vision strategico di kico ta lo cual nan por haci of no.

Ademas, el a bisa cu nan tin un sistema di enseñansa na Aruba cu ta consisti di diferente nivel, di esaki Maduro a comenta cu ta existi nivel di leerplicht pero no na EPI sino e sistema di enseñansa unda tin un leerplicht cu ta bisa cu un studiante ta obliga pa sigui educacion te ora cu e yega 17 aña of te ora e ta haya un diploma den un opleiding di enseñansa secundario of beroepsonderwijs.

Maduro a clarifica cu e componente di beroepsonderwijs ta EPB, leerplicht ta conta pa EPB y pa tur e AVO scol, na EPI e ora ey como conclusion, e studiante ta haci un escogencia pa studia na EPI “e no ta automaticamente cu ta drenta EPI, como tal, como instelling nos ta defini di ki forma e studiante ta drenta y kico ta e proceso pa studiante por yega na un diploma cu ta na nivel 3 of 4”, Maduro a bisa.

Un studiante di EPI cu ta caba cu un diploma di nivel 3, 4 of 5 mester por conecta cu e veld di e profesion, studiantenan cu ta scoge pa sigui studia nan mester por tin conexion pa sigui studia y di ultimo e preparacion y participacion di e ciudadano den e comunidad di Aruba, den e tres puntonan aki EPI ta enfoca tur su procesonan.

Tin varios documento cu ta duna reconocemento na decisionnan cu nan ta tuma na EPI, manera Maduro a anuncia como e Plan Educacional 2030, Nationaal Beleid Beroep Onderwijs Aruba, National Structure Plan cu ta e plan strategico nacional cu ta mara na Sustainable Development Goals y tambe nan tin recientemente e Doorlichting Rapport di Landspakket pa loke ta trata Onderwijs cu tambe ta fia y ta duna administracion na lo cual kico nan tin cu haci den e siguiente añanan.

Maduro tambe a bisa cu den pasado nan tambe a purba di haci cambio den nan curriculum pero e dos biaha el a wordo stop pa motibo di falta di recurso, aworaki nan ta haciendo e di tres intento di innovacion cu un proyecto mara na National Structure Plan cu pa haci renobacion di curriculum e ta rekeri di recursonan y di full un sistema cu tin cu cambia pa por introduci un curriculum nobo.

“Nos tin cu haci innovacion, tur e flechanan ta punta cu EPI tin cu renoba su curriculum”, Maduro a señala.

Na 2020 nan a cuminsa busca e fondonan caminda a logra aloca 1.2 miyon florin manera minister Croes a menciona caba, pa asina nan por a contrata un agencia di Hulanda pa maneha e proceso hunto cu Directie Onderwijs tambe pa dirigi e renobacion di curriculum, profesionalisacion, material di les pero loke no ta inclui den dje ta e parti di oranan cu tin mester pa docentenan por haci renobacion di curriculum.

Pa por haci esey, tin cu kita oranan di docentenan cu ta duna les pa e haya oranan di tarea pa bay traha riba e renobacion unda ta bin e pregunta si ta bin fondo pa paga e overhuuren.

E proyecto ta inclui 12 opleiding na nivel 2,3 cu 4 y EPB tin cuatro opleiding cu nan ta implementando na nivel 2 y EPI 8 opleiding na nivel 3 cu 4 pa asina nan por yega na un diploma den un proceso mas eficaz, cu manera aki e no t’ey segun Maduro a bisa.

Asina mes nan a cuminsa papia di kico nan tin cu haci siguientemente pa otro añanan y asina sigui innova e opleiding cu nan ta bezig cune pero tambe pa adapta e opleidingnan cu ta bieu ainda y renoba nan, di esaki, Maduro a señala cu nan a haya un tera cu ta pa implementa 8 opleiding nobo cu nan ta bezig cune aworaki y tambe renoba 9 di nan opelidingnan cu ta den aña escolar bieu.

Riba social media a bin dilanti tocante e ciere di varios opleiding unda cu Maduro a precisa cu nan no a cera ningun opleiding ni kita hende for di trabou “simplemente nos a haci e escogencia di cera algun opleiding pa e prome aña unda cu nos no a tuma ningun studiante nobo, pero e di dos y di tres aña ta sigui draai pa nos por renoba e opleiding aki y presenta nan na augustus 2023”, el a finalisa.