Ayera mainta, prome minister Evelyn Wever-Croes durante un conferencia di prensa a trece dilanti diferente topico pa informa comunidad, como recorte di salario, conferencia di hende cu lo ta awe na Universidad di Aruba y bishita di secretario di estado, Alexandra van Huffelen.

Manera a anuncia siman pasa, despues di hopi deliberacion, prome minister a afirma cu nan a yega na e punto unda lo cuminsa prepara pa stop e recorte di salario di entidadnan publico y semi-publico. E meta ta pa entrante juli di e aña aki lo stop e recorte di 5% y pa aña 2023 lo stop e 12,6%.

Di esaki, Wever-Croes a splica cu empleadonan publico y empleadonan semi-publico desde 1 di mei di aña pasa, tur luna a entrega 5% riba nan salario mensual basico; y pa aña 2023 e recorte lo desaparece completamente y ta bin e ora e vakantie uitkering, back to school premie augustus y bashi premie di november, unda cu esey nan por bay back na normalidad.

Esaki ta bin cu tres condicion, segun prome minister a expresa. Esakinan ta cu e pago di 5% mester ta den Aruba su presupuesto, politiconan mester sigui cu recorte di 25% y mester pasa e ley Wever-Croes norm, cu na e momentonan aki ta na parlamento.

Ademas, Wever-Croes a declara cu nan a sigui cu e deliberacionnan y diabierna ultimo, secretario di estado Alexandra van Huffelen a informa cu Conseho di Minister Hulandes a bay di acuerdo pa stop e recorte – pa cual tin cu cumpli cu e condicionnan menciona caba – y cu e 20 minister cu tabata den Conseho di Minister di siman pasa diabierna awor lo bay trata riba esaki.

Prome minister a trece dilanti esaki pa motibo cu el a sigura cu a cuestiona cu si siman pasa e decision a cay of ta bay cay e siman aki; en todo caso ta bay oficialisa esey pa fin di siman aki.

Mientras tanto el a bisa cu “nos ta percura pa tin suficiente likides pa ora nos cuminsa paga nos lo por sigui tambe, pasobra esey ta e intencion. No cu bo ta bay cay back den problemanan financiero pa cu esey.” Pa es motibo nan lo cuminsa 1 di juli, debi cu tur proyeccion ta indica cu Aruba mes por carga esey sin cu mester bati na porta di Hulanda, cu ya caba a indica cu Aruba no lo haya sosten di likides mas.

Pensionadonan den e full plan aki no a entrega pension di tur luna, pero nan a entrega si parti di locual nan ta haya na december di e toelage, y awor nan ta calculando cua ta e parti cu nan lo haya back na december.

Pa januari 2023, prome minister a bisa cu nan ta calcula cu por termina e recorte den tur caso – menos politiconan.

Conferencia di Hende Muhe Fuerte awe na Universidad di Aruba

Pa awe 24 di mei lo tuma luga e conferencia aki 10or di mainta, cual ta bay tin como orador e secretario di estado pa Asuntonan Interno, Alexandra van Huffelen. Gobierno di Aruba conhuntamente cu Universidad di Aruba ta organisando e evento aki cu e tema “Strong Women Choose to Challenge”.

Rector di universidad, Viola Heutger lo cuminsa duna su discurso y despues lo bay na e parti di oradornan, como secretario di estado cu lo toca e tema di hende muhe den politica; minister di Finanzas di Aruba Xiomara Maduro lo ta presente pa papia di inclusion di hende muhe den finanzas di Aruba; un recuento historico; seguidamente Clemencia Eugene lo papia di compronde salud mental y bienestar, un tema cu segun prome minister a sigura ta hopi importante pa hende muhe enfoca riba dje tambe.

Den esaki lo tin dos panel cu diferente invitado como Luenne Gomez-Pietersz, director di Departamento di Impuesto; Ronella Croes, director di ATA; Maria Dijkhoff-Pita, director di Departamento di Asuntonan Economico; y Clarienne Croes di WoW, kende lo papia con hende por tin posicionnan di liderazgo den futuro. Den e di dos panel prome minister lo delibera cu secretario di estado Van Huffelen tocante hende muhe den politica, explorando e bareranan, e forsa y e futuro.

Jocelyn Croes, presidente di comision di SDG Nacional di Aruba lo presenta “Aruba National Gender Policy” dirigi riba e maneho di genero nacional di Aruba. Prome minister a bisa cu ta un documento cu nan a cuminsa traha riba dje algun aña pasa hunto cu Nacionnan Uni (UN Women), unda nan a institui un comision cu hendenan local pa traha riba e maneho di genero, den cual nan ta describi e situacion actual y unda mester pone atencion – pa motibo cu tin desigualdad na Aruba – y nan ta describi con por combati esaki y kico por haci.

“Nos ta un di e prome paisnan den region cu un gender policy asina”, Wever-Croes a espresa, unda tambe el a sigura cu a aproba e politica aki diabierna di siman pasa y ta bay lans’e awe den e conferencia, caminda nan lo entrega un copia na secretario di estado y tambe lo manda na parlamento y lo publica riba website di Gobierno di Aruba.

Oficial- y legalmente no mag di tin diferencia na Aruba mas entre hende homber cu hende muhe, ni pa loke ta pago di trabao ni pa loke ta posicion. “Pero de facto, nos sa cu tin diferencianan ainda, de facto nos sa cu hende muhe tin un posicion mas atrasa cu posicion di hende homber den nos comunidad. Ami ta di opinion cu posicion di hende muhe ta crucial pa nos tin decisionnan balansa. Nos mester di representacion balansa pa nos por tuma e decisionnan lo miho posibel, sino nos lo perde loke e hende muhe den generacionnan prome cu nos a logra, si aworaki nos no tuma accion”, prome minister a declara.

Bishita secretario di estado Alexandra van Huffelen

Secretario di estado pa Asuntonan Interno a yega ayera na Aruba pa un dia so, unda e lo reuni cu prome minister y lo atende e conferencia di hende muhe na Universidad di Aruba, manera prome minister a informa. Tambe e ta bay tin contacto cu otro personanan den comunidad pa asina compronde mas e situacionnan y deseo cu e comunidad tin. “Mi ta kere tur esey ta un bon bista di kico Aruba tin mester y con por yuda den esaki. Un bon relacion cu Hulanda semper ta importante y esaki ta contribui na dje tambe”, Wever-Croes a finalisa.