Fundacion Pro Lechi Mama celebrando 20 aña di existencia; Ta invita tur mama y futuro mayor pa Masterclass ‘Empower Your Breastfeeding Journey’

Fundacion Pro Lechi Mama ta celebrando nan 20 aña di existencia, y den cuadro cu esaki tambe a tuma e oportunidad pa anuncia un Masterclass unico pa Aruba tocante dunamento di pecho cual lo tuma lugar diasabra venidero.

Segun Minouche Lopez di Fundacion Pro Lechi Mama, cifranan ta indica cu na 2002 solamente 20% di mamanan cu tabata duna lechi di pecho, a aumenta awo na 2022 pa 60%. “Esaki ta indica cu e trabaonan di e fundacion a haci un diferencia,” Sra. Minouche ta bisa. Ora cu a cuminsa cu e fundacion, nan tabata parti di e comision Lechi Di Pecho y hunto cu esey a traha e maneho pa Aruba. Pues te dia di awe, tur cu ta traha den e area di trata cu maternidad ta yuda pa mas mama posibel por duna nan baby lechi di pecho pa mas largo posibel.

Na 2007, e fundacion tambe tabata envolvi den e proceso pa Aruba formalisa un ley na unda cu tur mama por haci uso di su momento di ora di trabao pa duna lechi di pecho na su baby. Actualmente tin dos miembro di directiva na Fundacion Pro Lechi Mama cu a gradua como specialista riba tereno di lechi materno. “Nos ta hopi orguyoso di Marlene Stamper y mi mes persona, y cu amor nos ta purba yuda mas mama cu ta posibel na Aruba,” Sra. Lopez ta expresa.

Masterclass ‘Empower Your Breastfeeding Journey’
Esaki ta un Masterclass yena cu hopi informacion valioso cu lo empodera un mama nobo of futuro mama cu tur informacion necesario pa ta bon informa y prepara pa su ‘breastfeeding journey.’

E Masterclass ‘Empower Your Breastfeeding Journey’ lo tuma lugar Diasabra 28 di Mei, pa 8’or di mainta te cu 12’or di merdia na edificio di ATIA na Dakota. A purba di wak con por haci esaki mas atractivo posibel, pues a dicidi pa bin cu un ‘Introduction Prize’ pa motibo cu esaki ta prome biaha cu lo haci un tipo di Masterclass manera esaki, cu e prijs di 75 pa individual, 125 florin pa dos persona atende.

Por inscribi via pagina di Facebook di Fundacion Pro Lechi Mama of por tuma contacto na 594-9678 unda lo por haya link pa registra. Si a caso no tin persona pa wak pa bo yiu durante esaki, bo mag di bin cu ne. Invitado Laura Tromp, Pregnancy & Parent Coach tambe lo ta presente pa un charla informativo cu mayornan nobo y futuro mayornan no por perde.