Dialuna mainta, empleadonan di Boogaard Assurantien a pone trabao plat atrobe
pa protesta nan disgusto y malcontento riba diferente asunto. Esaki ta bira e di tres biaha cu empleadonan ta manifesta nan malcontento den e ultimo simannan.

Empleadonan di Boogaard Assurantien a dicidi di pone trabao plat dialuna mainta atrobe durante un ora pafo di nan edificio na Paardenbaaistraat, y tambe na nan localidad na San Nicolas. Esaki ta den conexion cu entre otro negociacionnan cu gerencia riba contract colectivo nobo, unda cu aparentemente negociacionnan a bolbe tranca. Jasmine Angela-Croes di sindicato SEPPA ta splica Bon Dia cu despues di dos walk-out na diferente biaha, gerencia a dicidi di sinta na mesa. Pero ta asina cu diabierna ultimo tur cos a bolbe tranca na mesa segun Sra. Angela-Croes. “Esaki despues cu gerencia no kier scucha trahadornan, si no kier keda para riba nan punto.”

Sra. Angela-Croes ta splica Bon Dia cu nan ta bringando algun tempo caba pa yega na un CAO anto cada biaha cu yega cerca, gerencia ta bolbe bin cu algo otro. Prome cu CAO, e empleadonan tin hopi tempo ta ricibi Indexering anto aworaki cu ta yegando na esaki y sinta na mesa, diripiente gerencia ta bin cu no kier paga indexering mas. SEPPA ta keda riba nan punto cu nan kier Indexering pasobra gerencia di Boogaard a bin cu un structura di salario nobo, cual segun el a expresa, ta perhudica hopi trahado. E trahadonan sa kico ta e entradanan y kico gerencia ta genera, pero cada biaha ta purba sconde e tipo di informacion aki, of no kier bin cu e tipo di informacion aki, segun SEPPA, pa asina mustra den cifranan dicon ta wordo nenga.

SEPPA a bin apoya nan miembro den e di tres walk-out aki indicando cu logicamente trahadornan no ta acepta esaki, mirando con halto costo di bida ta actualmente. “Gerencia ta lubida cu netamente e trahadornan ta e weso di lomba di e compania y mester duna e trahadornan nan balor como esnan cu ta duna e servicio y ta e cara di e compania,” Sra. Angela-Croes ta expresa.

Bon Dia Aruba a tuma contacto cu Boogaard y ta pendiente pa un reaccion di nan banda. Despues di e walk-out di un ora di dialuna mainta, trahadornan no a ricibi un contesta satisfactorio di parti gerencia. SEPPA ta laga sa cu accionnan lo wordo intensifica den e dianan nos dilanti. Pa locual ta e marcha silencioso cu lo tuma lugar diamars atardi di otro sindicatonan, a puntra si e empleadonan aki lo join e marcha aki tambe, pa cual SEPPA a contesta cu “e chens t’ey pa esaki.”