(NLTimes) – Casi mita di residentenan di Hulanda (un poco menos cu 45%) no ta prepara pa paga mas placa pa seguro di salud pa mantene e calidad di cuido. Un den cada cuatro ta pensa cu hendenan cu tin un estilo di bida menos saludabel mester paga e tarifanan aumenta aki. National Healthcare Institute a yega na e datonan aki via un encuesta haci cu 2,000 residente Hulandes.
Mas o menos un kwart di residentenan ta dispuesto pa paga un tarifa mas halto si esaki ta sigura un bon calidad di cuido di salud pa nan mes. E instituto lo cuminsa campaña riba diamars cu e lema “e cuido di mañan” tocante e futuro di cuido di salud. Costonan ta aumentando, di mesun manera cu e personanan cu lo tin mester di e cuido aki den futuro.
“Si nada cambia, pashentnan no lo por conta cu un bon calidad di cuido den tur caso cu presenta den futuro,” Sjaak Wijma, president di e hunta di director di Natoinal Healthcare Institute a comenta. “Nos mester pensa riba kico nos ta haya importante den cuido di salud, tuma e decisionnan aki y cumpli cu esaki.”
Organisa cuido di salud diferente ta un manera popular di reduci e costonan di cuido di salud cu ta keda aumenta. 70% di e participantenan ta di acuerdo cu esaki. Un mayoria tin e opinion cu mester enfoca mas riba prevencion di e malesanan aki na luga di trata nan. Tuma decision pa cu cuminda mas saludabel tambe mester ser haci mas facil y accesibel financieramente. Un otro 70% tambe tabatin e opinion cu “e ta nan mesun responsabilidad pa mantene cuido di salud bon y accesibel.”
Segun parti di e residentenan di Hulanda, e responsabilidad personal tambe ta den hendenan cu tin un estilo di bida cu no ta saludabel. 4 den cada 10 participante ta kere cu hendenan cu tin un estilo di bida cu no ta saludabel mester paga un tarifa mas halto pa cuido di salud. Un poco menos di 19% tin e opinion cu e ta corecto pa pone prioridad di cuido di salud riba personanan cu un estilo di bida saludabel, na luga di personanan cu un estilo di bida cu no ta saludabel.
“Basa riba e resultadonan di e investigacion, nos ta mira un sosten grandi y fuerte di sociedad pa cu cuido apropia,” e instituto a skirbi. Hendenan ta prefera “un solucion cu ta enfoca riba promove salud y e calidad di bida y no solamente tratamento di malesanan.” Na mesun tempo, segun e instituto, aparentemente “tin hopi presion riba con dispuesto e personanan ta pa contribui na cuido di personanan cu tin un estilo di bida cu no ta saludabel.”
