Analisis di testanan di oido ta mustra resultadonan ‘alarmante’ bou hoben

E analisis di testnan di oido na 2016 ta mustra resultadonan alarmante bou hoben aña pasa, asina Quota Cluba ta remarca durante un conferencia di prensa ayera unda a lansa nan campaña  pa Carnaval 63.

Quota tin e programa un biaha mas e aña aki pa conscientisa comunidad riba e importancia di cuido di oido, specialmente durante temporada di Carnaval.  Nan tin 29 aña ta lansa e campaña aki pa haci uzo di earplugs durante temporada di Carnaval. Ultimamente nan a haci un analisis chikito riba e cuido di oido na Aruba. Nan no a ofrece un cifra pero ta bisa cu e testnan di oido pa e aña 2016 ta hopi alarmante. Presidente di Quota Gwendeline van Trikt ta splica: “Esaki tabata hopi alarmante den e sentido cu ora e testnan cu nos a ofrece den nos comunidad, e oido tabata tin hopi defecto. Den totalidad di hoben te mas grandi. Ora un hende di edad ta perde oido nos por compronde pa motibo cu mas adulto bo bira esaki por gasta. Pero ta bira alarmante ora ta trata di hende hoben.”   Sra. van Trikt ta sigui bisa cu: “Carnaval y disfruta di musica ta dushi, pero bo mester para tino na ora di disfruta di musica. Nos kier tin un Aruba sano y hobennan cu mañan nan ta berdad hendenan den comunidad cu por tin un bon comunicacion.”  Quota ta haya cu hopi hende – specialmente hoben – no ta consciente cu si bo ta para hopi largo scuchando un zonido cu ta constantemente duro, e ta bay causa bo oido daño anto e no ta conta pa temporada di Carnaval so.

Donacion
E aña aki Quota Club a haya e noticia cu All Safety Wear ta bay compromete cu nan pa locual ta cuido di oido durante temporada di carnaval. Durante un rueda di prensa di Quota Club ayera e representantenan di All Safety Wear a laga conoce cu nan ta bay sponsor nan cu 10.000 earplugs pa tempo indefini. Quota Club tabata pensando caba con nan ta bay haci pa sigui cu e compra y benta di ‘earplugs’ pa siguiente aña, pero donacion a pone nan den un posicion positivo. Quota ta informa cu aña pasa nan tabata tin mas cu 10.000 earplugs cu a bay den comunidad.  Quota a ripara pues cu aña pa aña e demanda pa earplugs ta bira mas grandi. Tanto pa carnavalistanan y e hendenan para na banda di caminda cu ta pidi earplugs.

Bishita na scolnan
Fuera di bendemento di earplugs, Quota ta bishita scolnan basico pa duna lectura tocante cuido di oido pa tur momento. E aña aki nan a haya peticion di algun scol secundario pa nan por haya lectura cual lo cuminsa awe mes y sigui pa otro siman. “E bunita di e lecturanan aki ta cu nos muchanan ta esnan cu ta conscientisa e mayornan. Muchanan cu ta busca earplugs pa nan mes pero cu tambe ta busca pa nan mayornan cu ta participa den parada.”

Cooperacion y sponsor nobo
Pa duna orientacion tocante zonido duro y su consecuencia, Quota ta haya cooperacion di WEB, Glen Rock, Fepo ( sr. Wim Willems, Kristel van Nes y miembronan di Quota) kende nan ta duna e presentacion. Sr. Rock tin un par di aña caba cu e ta colaborando cu e causa aki, sin lubida WEB cu ta dun’e e oranan cu e tin mester. Pa 8 aña consecutivo e compania di utilidad ta contribui cu Quota cu donacion di earplugs. E aña aki Quota ta conta cu dos sponsor nobo pa cu earplugs cual ta Manrique Capriles y All Safety Wear.

Quota lo ta presente cu su damanan dinamico un biaha mas e aña aki den e paradanan pa bende earplugs. Pa 1 florin di cual placa recauda lo bay bek den nos comunidad. Cuminsando diasabra awo na parada di Noord, sigui pa San Nicolas y Playa, despues paradanan grandi.