(AP) – Abogadonan di Amber Heard a pasa mayoria di e siman pasa ta purba ilustra su ex pareha, Johnny Depp, como un abusador jaloers y semper bebi cu solamente por culpa su mes pa e destruccion di su carera den Hollywood.
Desde cu Heard a conclui su testimonio den corte na Virginia diamars, su abogadonan a presenta testimonio di personanan cu tabata cercano na Depp pero a aleha di su persona. Nan a inclui Depp su agente anterior, e actor Ellen Barkin y Heard su ruman muhe.
E abogadonan su meta ta di kita e balor di e demanda contra di Heard. E demanda ta alega cu el a falsamente ilustra Depp como un abusador domestico y esaki a costa Depp su carera como actor, notablemente e franquisia di pelicula “Pirates of the Caribbean.”
Depp a señala un articulo publica den Washington Post den cual Heard a describi su mes como un “figura publico representando abuso domestico.” Depp su abogadonan ta bisa cu e articulo aki ta difama su persona aunke nunca el a menciona su nomber.
Depp ta nombra e articulo cu Heard a skirbi como e motibo dicon su carera a cuminsa deteriora, sinembargo Heard su abogadonan ta bisa cu solamente Depp ta responsabel pa esaki.
Tracey Jacobs, ken tabata e actor su agente pa mas o menos 30 aña, a bisa cu Depp tabata yega grabacion “laat consistentemente pa practicamente tur pelicula” durante e ultimo añanan cu nan a traha hunto.
“Mi tabata hopi honesto cune, y mi a bise cu e tin cu cambia esaki paso e lo causa su persona daño,” Jacobs a bisa.
Den e añanan prome cu Depp a kita Jacobs for di su posicion, Jacobs ta bisa cu cada biaha Depp tabata bira menos profesional, mientras cu su uso di droga y alcohol tabata aumenta. Tambe el a bisa cu Depp tabata haci uso di ‘earpiece’ unda cu e guion tabata ser bisa na su persona.
E abogadonan di Heard tambe a trata e punto cu e perdida di Depp su rol den “Pirates of the Caribbean” su di 6 pelicula ta pa causa di e articulo publica, pa cual nan a haci pregunta na Tina Newman, ken ta ehecutivo di produccion di Walt Disney Studios, y su persona a bisa cu e no ta altanto di ningun persona cu tuma decision na Disney, bisando cu nan no lo contrata Depp pa “Pirates 6” pa causa di Amber Heard su articulo.
Depp a testigua anteriormente cu nunca el a dal Heard, y cu e tabata e victima di abuso di parti di su ex pareha. Heard su abogadonan a contraresta esaki bisando cu Depp si a abusa di su persona, ambos fisicamente y sexualmente, y cu e no por nenga loke a tuma luga pa motibo cu hopi biaha e tabata demasiado intoxica pa por corda loke a tuma luga.
E hurado a scucha un declaracion graba di un amistad mutuo di e pareha, iO Tillet Wright, ken a bisa cu Depp a confia den su persona y a bisa cu e tabata odia ta sobrio.
“E tabata kier bira sobrio pa Amber,” Tillet Wright a bisa. “E no tabata disfruta ta sobrio. E no tabata algo divertido p’e, y e tabata un algo cu tabata dune stress y e tabata cansa su persona. E tabata hopi dificil p’e. E tabata odia ora cu e mester ta sobrio.”
Tillet Wright a bisa cu Depp su personalidad a bira un persona mal hende y paranoid ora cu e tabata usando alcohol of droga.
Heard su ruman muhe, Whitney Heard Henriquez a bisa cu el a personalmente mira Depp ta dal Heard. Mientras cu Depp a testigua cu nunca el a dal Heard.
Henriquez a testigua cu e pelea a tuma luga un luna despues cu Depp y Heard a casa, ora cu Heard a haya evidencia di un relacion fuera di e matrimonio di Depp.
Segun e testimonio, Depp a tira culpa riba Heard pa forsa su persona den e relacion aki. A yega un punto, segun Henriquez, cu e tabata meymey di Heard y Depp ora cu Depp a subi e trapi pa confronta Heard. Henriquez bisa cu el a ricibi un golpi na su lomba, y Heard a rabia, causando cu “el a dal Depp.”
Un di Depp su guardianan a interveni, “pero pa ora el a purba interveni ya caba Depp tabatin un man garando Heard su cabey y e otro tabata dal e den su cara,” el a testigua.
Sinembargo, Henriquez a admiti tambe cu tabatin cierto momento unda cu e tabata tuma parti pa Depp, y cu e tabata purba di mantene e pareha hunto aunke el a mira cu su ruman muhe a ser asalta fisicamente. “Si mi ruman muhe bisa cu e kier sigui cu Johnny, y mi por yuda cu esaki di cualkier manera, mi lo apoya mi ruman y haci loke mi por,” Whitney a conclui.
E huicio lo drenta su di 6 siman ora cu e continua dialuna.
