(ElNacional) – E lider opositor Juan Guaido a afirma diasabra cu e proceso di renobacion cu e principal partidonan anti-chavista ta realisando, lo yuda fortalece e unidad pa derota e gobierno di Nicolas Maduro den e eleccionnan presidencial, premira pa 2024.
E ex-diputado a afirma, segun un comunicado di prensa, cu e participacion di partidonan renoba den e eventual eleccionnan primario pa eligi e candidato presidencial, ta un mecanismo cu lo fortalece e unidad y lo consolida esaki cu e presencia den tur e sectornan.
“E proceso aki di renobacion y legitimacion di partidonan, di incorporacion di sectornan, tin di haber cu e fortalecemento di unidad, tin di haber cu e fortalecemento di e vehiculo cu a hiba nos na derota e dictadura mas cu un biaha”, Guaido a declara.
E partidonan principal di oposicion Venezolano, Accion Democratica, Pimero Justicia, Voluntad Popular y Un Nuevo Tiempo a haci un recorido na diferente regionnan di e pais pa un proceso di renobacion interno.
Guaido a insisti cu mester exigi den tur e espacionan un acuerdo integral cu lo contempla eleccionnan presidencial liber y husto pa pone fin na e tragedia cu cada dia ta bira pio.
Dia 16 di mei ultimo, oposicion Venezolano reuni na e Plataforma Unitario pa anuncia cu nan lo eligi un candidato presidencial pa e eleccionnan presidencial di 2024 a traves di eleccionnan primario cu nan ta premira pa 2023.
E mayoria di e partidonan politico aki no a participa den e eleccionnan presidencial di 2018, den cual Maduro a wordo eligi un biaha mas, ni den e eleccionnan parlamentario di 2020, den cual e chavismo a gana, considerando cu nan tabata procesonan fraudulento.
