Sin investigacion y data no tin transparencia. Y sin e elementonan aki no por yega na un solucion pa dump. Esaki ta locual Laura Mathieu argumenta den su rapport investigative Breathing Unevenly: community response to Environmental Injustice.’

Pa por haya un bista holisitico e investigado a ilustra ken tur ta e ‘stakeholders’ cu ta directamente envolvi cu dump di Parkietenbos. E estudio a enfoca particularmente riba e relacionnan, afiliacion y/of tension cu ta existi entre e actornan, cu ta e comunidad cu ta biba den cercania di e dump, NGO’s (por ehempel Stichting Parkietenbos), ehecutivonan publico manera Parlamentarionan, Ministernan, departamentonan manera Direccion di Naturalesa y Medioambiente (DNM) y finalmente companianan priva cu ta Serlimar y Ecotech.

Tur ta reconoce e problemanan di dump, pero e grado con ta diferencia. Tambe e perspectivanan ta diferencia kico e problemanan tabata y con pa soluciona nan. Stichting Parkietenbos por ehempel a keda funda 20 aña pasa pasobra comunidad no tabata tolera e peligernan di dump mas. E fundacion tabata den combersacion continuo cu Gobierno(nan) pa cera e dump, pero no tabatin resultado.

DNM

Riba su website, DNM, un entidad publico ta bisa cu obhetivonan ta ‘Prepara, diseña, implementa y evalua maneho cu ta conduci na un ambiente sostenibel y saludabel pa hende y naturalesa na Aruba.’ Locual ta responsabilidad di DNM ta desperdicio, calidad di air y substancia peligroso. Y aunke DNM tin un departamento encarga pa investiga y monitor medio ambiente, e investigacion ta mas bien pa traha maneho, y no pa acumula dato specificamente. Y e investigacion, segun Mathieu, ta conecta directamente na e agenda politico y parcialidad di e partido na poder. Tabatin poco maneho describi riba desperdicio y e dump, y no tin ley, cu ta permiti companianan opera sin regulacion riba maneho di sushedad. Den e rapport, e investigador a bisa cu un ehecutivo di DNM a bisa cu nan ta kere cu e problema di dump no ta uno tecnico , sino uno cultural.

“A bisa cu e problema ta bin di mentalidad di comunidad cu ta consumi hopi,” Mathieu a splica.

E entrevistanan a revela desconfianza grandi denter di e comunidad di Parkietenbos, particularmente den direccion di Gobierno. Durante e entrevistanan, varios residente a bisa cu “locual politiconan ta bisa ta mas bien ‘wishful thinking’. Nos tin problema pa kere nan.” Pero e mesun cinismo a keda expresa contra otro ciudadano den comunidad. Algun ta acusa e estilo di bida di otro pa nan problema di salud, y no e dump.

Espacio politiza

E estudio no ta pa busca ken tin culpa pa dump, pero pa mustra cu e daño ta resultado di decadanan di negligencia. Gobierno berdad ta haya culpa, pero e problema ta structural y no tecnico. Segun Laura Mathieu, e motibo pakico e intentonan pa soluciona ta faya ta pa motibo di demasiado politica, falta di placa of no pone dump como prioridad. Politica a bira asina mara na e situacion cu partidonan ta culpa otro. Pero, esaki ta preveni pa yega na solucion pa termino largo, particularmente pasobra no tin continuidad ora cu Gobierno cambia. Tur esaki ta conduci na remediacion di duracion cortico pa problemanan di duracion largo, cu ta haci tur e pasonan cu ta tuma te cu awor inefectivo.

E ta dificil pa defini interes di empleadonan publico cu inhusticia ambiental. Nan mester busca balans entre nan posicion y e problemanan cu nan ta topa cune y e presupuestonan cu ta bira menos. Y nan trabao ta na peliger pasobra ta existi e percepcion cu si pusha contra Gobierno, e presion ta bin bek. Un ambtenaar y un miembro di Parlamento cu a participa den e entrevistanan a bisa cu e tensionnan pa anda cu e problema di desperdicio ta produci hopi stress.

Falta di transparencia

E dimension politico ta conecta cu e problema di falta di transparencia. Manera Laura Mathieu a bisa Bon Dia Aruba den su entrevista, esaki a bira cla cu e combersacion cu Central Bureau di Estadistica, CBS. Den su rapport, Mathieu a skirbi cu un trahado di CBS a bisa cu a haci poco investigacion riba dump ya cu e tema ta demasiado politico. A tuma algun muestra 20 aña pasa, pero e rapportnan no ta disponible pa publico. “Esaki pa motibonan politico. Nos no por a obtene informacion riba nivel di polucion cu ta inaceptabel. Tur ciudadano mester tin acceso na data cu ta relata na risico pa nan salud,” ta e declaracion cu a duna. Un trahado na dump a bisa cu nan mester a firma un NDA, un ‘non-disclosure agreement’ (acuerdo di secresia) pa preveni’e pa comparti informacion riba dump. “E ta mustra comosifuera e asuntonan aki ta demasiado politico ora e ta trata proteccion e interes di esnan na poder of cu tin autoridad. Ora cu a puntra pakico no a haci investigacion riba salud y medioambiente, otro respondente a bisa cu e reaccion ta e motibonan por ta mira como politico.” E conclusion di Mathieu ta cu hopi biaha ta usa resultadonan di investigacionnan contra opositornan. Mas ainda, tin miedo cu ciudadanonan por entama caso contra Gobierno si tin relevacion riba dump. “Pero pa por bin cu solucion viable, Gobierno mester haci investigacion y publica e data.”

E problema di dump ta multifacetico y complica, y awor a bira un discusion politico. Segun e investigado no ta cuestion di punta dede, pero ya a bira un sistema riba su mes cu no ta parce di ta cambia. Particularmente, si esnan cu mas lo beneficia di cambio no tin poder y no por logra sosten pa nan causa.

Aunke Gobierno a anuncia cu dump lo cera na fin di 2022, mayoria respondente ta bisa cu nan no ta kere cu esey lo sosode. Pero comunidad di Parkietenbos ta confrontando un multiple di inhusticia ambiental, segun Laura Mathieu, mas cu cualkier otro parti di e isla, ya cu nan no tin acceso na aire y tereno limpi, y ningun poder. Y e investigacion riba inhusticia ambiental na Parkietenbos ta pa trece e storia di habitantenan dilanti. A pesar cu e tema ta hopi delicado y controversial, den ausencia di un contesta directo, e ta criticamente importante pa esnan afecta tin un stem, ta e conclusion.