Ayera mainta durante un conferencia di prensa e grupo G297, Instituto Pedagogico Arubano (IPA) y Sindicato di Maestro di Aruba (SIMAR) a presenta nan resultadonan di e conferencia ‘Enseñansa, Nos Responsabilidad’. Directora General di IPA, Marilyn Richardson y miebro di G297, Jose Fernandes Perna, a splica algun detaye di e resultadonan cu nan a saca afo durante e conferencia di dia 10 di mei.
E conferencia a tuma luga na IPA y Richardson a indica cu pa IPA e tabata hopi importante pa haci un evaluacion di e conferencia. Den total tabatin 153 participante registra di cual mayoria a sigui e conferencia virtualmente y tabatin alrededor di 60 persona cu a sigui e conferencia den persona.
IPA a saca un evaluacion despues di e conferencia pa nan ricibi feedback di e participantenan y el a indica cu nan a ricibi 40 feedback di cual 55% tabata di e personanan cu tabata presente na e conferencia y 45% di e personanan cu a sigui e conferencia online.
“Generalmente nos por bisa cu esunnan cu a manda nan feedback tabata basta satisfecho, claro semper tin puntonan cu lo mester atencion pa despues. Di parti di IPA nos a keda hopi entusiasma despues di e conferencia y e forma cu el a bay pa nos por sigui mehora e sistemanan cu nos tin actualmente pa por brinda un servicio mas grandi, specialmente na e personanan cu a sigui e conferencia online”, el a señala.
Segun el a sigui splica, tabatin algun sala cu por a mehora pa loke ta e sistema di zonido y tambe mehora e espacio, crea un espacio mas grandi pa e personanan cu a sigui e conferencia online por a participa den e dialogo.
Algo cu Richardson a subraya nan lo tuma como un punto di mehoracion pa e siguiente biaha, pasobra den caso di IPA ora nan wak e puntonan cu a bin dilanti y mirando cu mas di 90% di e feedback cu nan a ricibi a indica cu nan kier mas, muy probablemente lo tin un siguiente biaha.
Richardson a resalta tambe cu un punto cu a bin hopi dilanti den e evaluacionnan ta e parti di comunicacion. El a indica cu e hendenan kier y mester ta na altura di kico ta pasando den e mundo di educacion, kico ta e plannan, pero tambe kico ya caba ta wordo ehecuta y kico ta e cosnan cu ta stroba e posibel ehecucionnan.
Sr. Jose Fernandes Perna di e grupo G297 tambe a indica cu en general e conferencia a bay den bon orden y pa locual ta e metanan principal di e conferencia, nan ta completamente satisfecho di e manera cu el a tuma luga, principalmente e comentarionan cu a wordo ricibi.
Repasando e metanan di e conferencia mes, caminda tabata kier crea consciencia pa revisa e sistema educativo a traves di seis topico cu a wordo presenta. El a señala cu tur esnan cu a participa tanto fisicamente como tambe online a duna hopi bon comentario y alaves nan tabata satisfecho cu e conferencia a ofrece un espacio pa nan por reacciona, no despues, pero durante e conferencia mes.
Pa locual ta e topiconan mes Sr. Fernandes a cubri e topiconan cu G297 a presenta cu ta ‘Enseñansa Continuo Sin Barera’, ariba cual nan a haya hopi comentario di cual un gran mayoria tabata di acuerdo cu locual G297 a presenta.
Cada topico a presenta ponencianan y pa locual ta e tres ponencianan cu G297 a ofrece di e topico ‘Enseñansa Continuo Sin Barera’, Fernandes Pedra a splica cu e prome ponencia, cu ta trata integracion di kleuter schoolnan cu schoolnan mas abao, a wordo aproba cu casi un 100% di esnan cu por a vota y e comentarionan di otronan cu a sigui e conferencia tambe a duna bon comentario.
Pa loke ta e segundo ponencia cu ta trata implementacion di un sistema liber di keda sinta, el a sigui splica cu esey tambe pa un gran parti, casi un 76%, a aproba pa yega na un sistema hopi mas flexibel cu un orgaisacion escolar hopi mas progresivo.
Por ultimo, el a remarca cu pa por carga un sistema integral, mas inclusivo posibel, pero tambe un sistema liber di keda sinta, esaki ta demanda un ekipo di maestro cu ta multidiscplinario. No solamente e maestro cu tin responsabilidad pa su grupo, pero otro coleganan cu lo asesora den esey.
Fernandes Perna a subraya cu hopi otro comentario a drenta cu ta ilustra cu, manera menciona caba, e participantenan ta hopi contento y nan ta spera cu e tipo di conferencianan aki lo wordo organisa mas frecuentemente, principalmente pa e espacio cu a ofrece e profesionalnan mes como tambe otronan interesa den enseñansa. Sin lubida e studiantenan mes y mayornan, pa nan tin espacio pa duna nan comentario pa e maneho cu nan ta propone of desaroyonan cu ta andando. “Den e sentido cu nos no ta scucha nan so, pero cu ta tene cuenta cu locual cu nan ta trece pa dilanti”, el a agrega.
E di dos hopi comentario cu a resalta, nan a yama ‘Accion, Accion y Mas Accion’. El a splica cu esaki nan ta indica cu nan ta contento cu e Minister di Enseñansa actual ta scucha hopi, ta invita hopi stakeholders, pero tambe ta bolbe yega na instala comision.
“E experiencia den instala comision ta cu bo ta pospone atrobe decisionnan cu mester a wordo tuma ayera, mientras comisionnan ta haya dos pa tres siman pa traha, tin biaha dos pa tres luna nan ta dura y tin biaha bo no ta tende nada mas di esey”, el a subraya.
Di otro banda el a menciona cu tin asina tanto rapport y recomendacion, no for di e ultimo añanan, pero despues di Status Aoarte te cu aworaki, cu ta indica cu tin hopi cos cu decision mester wordo tuma ariba nan.
Pa locual ta e siguiente stap, referiendo na e grupo G297 cu ta na vanguardia di enseñansa, Fernandes Perna a remarca cu nan tin atencion pa locual ta e derechonan di mayornan, con pa yega na un plataforma di mayornan pa asina por scucha tambe nan preocupacionnan, nan ideanan pa locual ta enseñansa di nan yiu.
Otro area cu tin nan atencion ta e edificio y facilidadnan escolar. El a splica cu nan por papia di habilidadnan di siglo 21, pero si wak e estado di e edificionan, esakinan ta di siglo 20. Cu otro palabra, el a subraya cu locual nan ta referi na dje ta cu na momento cu no ekipa e edificionan aki, no por tin avance. “Esakinan ta den un fase cu bo tin cu atende mas rapido cu ta posibel pa asina ki e habilidadnan di siglo 21, cu nos tambe ta partidario di dje, por haya su caminda mas adecua posibel”, el a finalisa.
