Mientras cu parlamento di Corsou a aproba un reduccion temporal den accijns riba gasolin y un reduccion di impuesto di benta riba combustibel, na Aruba e prijs di combustibel ta aumenta unda cu te hasta chauffeurnan di bus a indica cu e aumento ta otro golpi pa nan cartera.

Bon Dia Aruba kier a informa di un manera corecto na comunidad kico parlamentarionan lider di fraccion di cada partido tabata pensa riba esaki, unda cu a puntra: “Parlamento di Aruba no tin un manera pa por yuda pueblo pa baha prijs di gasolin, manera cu Parlamento di Corsou a haci?”

Redactor di Bon Dia Aruba a haya contesta di lider di partido Accion21, Miguel Mansur kende a menciona cu “Si, pero lo mester haci cambio na presupuesto pa crea espacio financiero pa esey”.

Ademas, Mike Eman lider di fraccion di partido AVP a indica cu “Gabinete Wever Croes ta responsabel pa un parti substancial di e aumento di gasolin y diesel. Parti di e aumento di prijs di gasolin y diesel ta wordo causa door di e medidanan cu Gabinete Wever Croes mes a tuma. Uno tabata ora cu a redobla BBO di 3% pa 6%. Riba gasolin y diesel tin dos schakel di BBO; ora FMSA bende e fuel cu pompstationnan di gasolin y diesel ta bin BBO riba dje; locual tabata 3% den e prome schakel a bira 6% cu redoblacion di BBO”.

Tambe el a señala cu “E di dos schakel ta e benta di pompstation cu e consumidor. Aki tambe ta bin BBO riba dje. Atrobe esaki tabata 3% y Gabinete Wever Croes a hacie 6%. E lider di AVP, mr. Mike Eman ta sigui splica cu na total a bin 6% extra na BBO riba fuel dor di medidanan di Gabinete Wever Croes. Pa cuminsa por kita BBO completamente for di fuel e ora ta scapa 12% of kita a lo menos e aumento anto e ora ta scapa 6%”.

Segun Eman, “tambe Gabinete Wever Croes a kita e reduccion di 10cent pa liter riba gasolin y diesel. Esaki tambe tabata un medida di Gabinete Wever Croes. Por reinstitui e reduccion di 10 cen, segun lider di AVP, Mike Eman y duna pueblo un alivio. E argumento cu no tin espacio den presupuesto no ta valido. Gabinete Wever Croes a presenta un presupuesto 2022 cu 140 miyon extra di gasto. Por a corta den e gastonan aki y duna pueblo alivio y ainda keda den e margennan di CAFT. Pero ta prefera di cumpli cu u grupito, mientras e masa di pueblo ta sufri”.

Manera a wordo publica den edicion di Bon Dia Aruba di ayera 18 di mei, AVP a presenta un presupuesto alternativa mustrando riba tur e posibilidadnan pa hiba un otro maneho mas husto pa pueblo, “pero e gobierno kier sigui riba e rumbo actual. Es decir cu no tur e aumento ta efectonan internacional, parti di e aumento ta medidanan di Gabinete Wever Croes cu ta haci gasolin y diesel asina hopi mas caro. Alternativa tin, pero prioridad di Gabinete Wever Croes no ta pa sirbi e Bon Comun, pero un grupo selecto”, Eman a finalisa.

Ta importante pa destaca cu igualmente redactor di Bon Dia Aruba, a haci e mesun preguntanan aki na otro lidernan di fraccion como Hendrick Tevreden di MEP, Misha Raymond y Raymond Kamperveen di RAIZ y Marisol Lopez-Tromp di MAS pero e pregunta a wordo ignora, den un pais na unda e mesun mandatarionan mes semper ta indica cu tin transparencia pa prensa.