Ainda ciclistanan ta confronta peliger riba caminda pa motibo cu automobilistanan y otro usuario di camindanan no ta respeta cu un ciclista tambe ta parti di trafico. Pero tambe e ciclista mester ta consciente cu e tambe tin cu sigui e reglanan di trafico.
E respet pa regla y pa otro ta crucial pa seguridad di e ciclista. Pa tal motibo mes un biaha mas ta organisa awe e ‘Ride of Silence,’ un actividad di ciclismo pa hala atencion na e importancia di seguridad riba caminda.
E ‘Ride of Silence’ di 2022 tin como lema ‘Mi no kier bira e siguiente ciclista cu ta perde su bida of ta keda herida riba camindanan di Aruba.’ Ta trata e di 20 careda di silencio pa seguridad di ciclistanan na Aruba.
“E conscientisacion sinembargo mester keda diario, pa tur usuario di caminda, tur cu ta us’e, pa nan corda riba reglanan di trafico y respeta nan,” organisadornan a bisa. “Un ciclista recreacional, deportivo of cu ta usa su bais pa haci respondi ta un ser humano, un tata, un mama, un yiu, un ruman. Tur kier yega cas cerca nan famia.”
E organisadornan di ‘Ride of Silence’ ta reconoce cu pa aña tin debate riba e infrastructura pa e ciclista. Sinembargo, esey no ta kita afo cu mester por educa tur hende, adulto como hoben riba respet y protocol pa un trafico sigur.”
E careda di conscientisacion ta cuminza awe tardi pa 6:15, for di e area di parkeo di Plaza Libertador Betico Croes. E ruta ta Vondellaan pa rotonde di Banco di Caribe, sigui pa Wilhelminastraat, Irenestraat, Caya Ernesto Hermans, LG Smith Boulevard Na Parlamento lo para pa un minuut di silencio. Despues lo continua riba LG Smith Boulevard, rotonde Wendy’s, Belgiestraat, rotonde Arendstraat, Paardenbaaistraat, LG Smith Boulevard, rotonde Cas di Cultura pa termina na Vondellaan,na e mesun luga di parkeo.
Tur ciclista ta bon bini pa e careda. No ta cobra, pero ta urgi tur hende pa corda trece nan propio bebida pa hidrata.
