(AP) — Gobierno di Merca ta moviendo pa alivia algun di e sancionnan economico riba Venezuela, como un gesto pa curasha reanudacion di negociacionnan entre e oposicion sosteni pa Merca y e gobierno di presidente Nicolas Maduro.
E cambionan limita ta bay permiti Chevron Corp. negocia su licencia cu e compania petrolero estatal, Pdvsa, pero no ta pa drill ni exporta ningun petroleo di origen Venezolano, segun dos oficial senior di gobierno Mericano a bisa AP dialuna laat. E oficialnan a papia bao condicion anonimo pasobra ainda no a haci e anuncio formal.
Adicionalmente, ta bay elimina Carlos Erik Malpica-Flores – ex-oficial di alto rango di Pdvsa y sobrino di prome dama Venezolano – for di un lista di individuonan sanciona, nan a bisa.
E movida ta sigui gestonan di bon boluntad di Maduro despues di a reuni na maart cu representantenan di administracion di Joe Biden y un reunion reciente na Centro America entre oficialnan Mericano y e coalicion principal di oposicion, Plataforma Unitario, pa discuti un caminda bay dilanti.
Cantidad di Venezolano, incluyendo Fiscal General di e pais y e cabesante di sistema penitenciario, y mas di 140 entidad, entre nan Banco Central di Venezuela, ta bay keda sanciona. Departamento di Teosro ta bay continua prohibiendo transaccionnan cu gobierno Venezolano y Pdvsa dentro di mercadonan financiero Mericano.
Maduro mes ta bao acusacion na Merca pa conspira di ‘inunda Merca cu cocaina’ y usa comercio di droga como ‘un arma contra Merca’.
Gobierno Venezolano a suspende negociacionnan cu oposicion na october despues di extradicion na Merca di Alex Saab, acusa di labamento di placa. Maduro e tempo aya a condiciona su regreso na e mesa di negociacion riba liberacion di Saab, kende a wordo extradita for di Cabo Verde.
E negociacionnan a tuma lugar na Ciudad de Mexico bao guia di diplomaticonan Noruego.
Chevron, basa na California, ta e ultimo compania petrolero mayor di Merca pa haci negoshi na Venezuela, unda a inverti pa prome biaha den añanan 1920. Su cuatro joint ventures cu Pdvsa a produci alrededor di 200mil bari pa dia na 2019, pero gobierno Mericano na 2020 a duna orden pa reduci produccion, y desde e tempo ey, ta permiti solamente pa ehecuta trabao esencial riba pozonan di petroleo pa preserva su activonna y nivel di empleo na Venezuela.
E cambio ta permiti ‘Chevron pa negocia e terminonan di e potencial actividadnan futuro na Venezuela’, un oficial Mericano senior a bisa reporteronan ayera. “No ta permiti drenta den ningun acuerdo cu Pdvsa ni ningun otro actividad involucrando Pdvsa of sector petrolero Venezolano. Pues fundamentalmente loke nan ta haciendo ta djis permitiendo pa papia.”
Chevron no a responde inmediatamente na un solicitud pa comentario ayera. Inversionnan di e compania den camponan di petroleo Venezolano y mashinnan durante ultimo siglo tabatin un balor calcula na $2.6 biyon te cu 2020.
Durante ultimo cinco aña, Merca a usa sancionnan personal, acusacionnan criminal y sosten pa gruponan clandestino den un campaña sin exito pa elimina Maduro y restaura loke ta mira como democracia horta na Venezuela. Pero na maart, oficialnan Mericano a biaha na Caracas pa reuni cu Maduro despues cu invasion Ruso di Ucrania a sacudi orden mundial y a forsa Washington pa reconsidera su prioridadnan di seguridad nacional.
Despues di e reunion, Maduro a libera dos prisonero Mericano y a priminti di reanuda negociacionnan cu su oponentenan. Vice-presidente Venezolano, Delcy Rodriguez ayera a tweet cu e pais Sur Americano ta spera cu e decisionnan di Merca ta bay ‘habri caminda pa e eliminacion absoluto di e sancionnan ilegal cu ta afecta tur nos pueblo’.
