Lo urgi pa destrui permiso di construccion di Secrets, tanten cu no yega na un acuerdo comun

Habitantenan di Sero Colorado ta bolbe acudi na Corte Administrativo pa destrui e decision cu Minister di Infrastructura a usa pa duna e permiso di construccion pa Secrets, di e desaroyador Three Rivers. Tambe ta bay pidi huez pa destrui e permiso di construccion.

E habitantenan cu a logra para e construccion temporalmente na Februari ultimo a haya nan mes confronta cu e hecho cu Hof a considera cu pa motibo cu Minister di Desaroyo Teritorial, Infrastructura y Medioambiente a dicidi pa tuma e obhecion di un di e apelantenan na consideracion, a cumpli cu e decision den Lar na Februari ultimo.

Un total di 10 ciudadano e tempo ey representa pa abogado Maritza Boyce a acudi na Corte Administrativo, LAR, despues cu Minister di Desaroyo Teritorial, Infrastructura y Medioambiente a entrega permiso pa construccion di hotel. E permiso tabata otorga dia 28 di Mei 2020 y e ciudadanonan a entrega nan obhecion contra e permiso dia 21 di October 2020. Pero Minister a rechasa e obhecion dia 9 di Maart 2021 y consecuentemente, e ciudadanonan a apela esaki dia 16 di April 2021. For di e tempo ey, te cu 5 di Januari e aña aki tabatin documentonan presenta na Corte. Corte den su sentencia a bisa cu tanten cu e Minister – kende ta den persona di Minister Presidente Evelyn Wever-Croes – no responde na e obhecion di e ciudadanonan, no por sigui cu e construccion. Entretanto, Hof a constata cu mr. Wever Croes a acepta e obhecion y como tal a sinti cu a cumpli cu e exigencia di Lar.

Pero e habitantenan no ta de acuerdo cu e ponencia aki. Pasobra e sentencia di Februari a duna nan rason riba un parti grandi di nan obhecionnan y asina mes, mr. Wever-Croes a tuma su decision riba e permiso di construccion cu ta den disputa. Consecuentemente, nan ta sinti cu Sra. Wever-Croes como e Minister encarga a laga un banda e obhecionnan di e grupo di habitante, a pesar cu e sentencia di Lar na Februari a bisa esaki explicitamente. Como tal, e grupo di bisiñanan ta bisa cu un biaha mas nan ta confronta cu un situacion cu nan no por acepta.

Esaki a pesar di e hecho cu e grupo a ofrece na Prome Minister Wever Croes di kier traha hunto na un solucion pa e problema pa medio di un dialogo constructivo, pues hunto cune como Minister encarga y tambe e desaroyador Three Rivers. Pero Evelyn Wever-Croes no a reacciona riba e oferta pa acercamento te cu awor.

E disputa

E habitantenan ta argumenta na Februari cu e edificio, of parti di e edificio, di e hotel no ta cuadra cu e ambiente y e casnan den cercania, y cu ta baha e calidad di aire y luz pa esakinan, y cu e construccion ta contra e ROPV, esta e Planificacion Ordenanza Teritorial cu regla. E argumento cu a usa ta cu e bouwvergunning ta pa un hotel di 600 camber cu un posibilidad di extension di 300 camber despues di dos aña.

Minister di Desaroyo Teritorial, Infrastructura y Medioambiente a haya instruccion e tempo ey di huez pa den tres luna pa delibera cu e habitantenan riba e proyecto y tuma un decision riba e obhecion, particularmente riba e expansion di e proyecto pa 900 camber. Consecuentemente, no por a sigui construi mas camber ni e espacio pa para auto. Hof a considera cu e problema tabata sinta cu Prome Minister a considera e obhecion no-admisibel y awor cu a tuma e obhecion den consideracion (sin reuni cu e bisiñanan), el a cumpli cu e ordo di huez di Lar.

Pero e problema mas grandi no ta proyecto hotelero riba su mes, sino e hecho cu e hotel lo ta bay tin 900 camber y cu unabes construi, ta bay kita privacidad di algun di e bisiñanan. Den su decision na Februari, mr. De Haseth, huez di Lar a mustra cu tin duda cu e proyecto di 900 camber ta cumpli cu e ROPV. E habitantenan a argumenta na Februari cu nan no ta contra e construccion di Secrets riba su mes, pero nan kier pa cumpli cu ley.

E tempo ey, mr. Maritza Boyce a bisa cu e plan di construccion no ta cuadra na exigencia rasonabel di ‘welstand,’ y cu e edificio ta surpasa e haltura maximo permiti, pasobra durante e calculacionnan, incorectamente no a tene cuenta cu e espacio bao tera di cuater meter, cu ta e nivel di e klip. Consecuentemente, e habitantenan ta argumenta cu e ‘bouwplan’ a base di su ubicacion of sistema di construccion lo ta un estorbo grandi pa e ambiente.

Riba dje nan ta argumenta cu despues cu realisa e construccion, mirando e ubicacion y su forma of sistema di construccion, entre otro, lo kibra e bista y privacidad di e habitantenan. E plannan ta mustra cu e edificio ta hopi cerca di nan parcelanan y cu e edificio lo ta di diferente piso, esta lo ta un edificio masivo. Consecuentemente e probabilidad ta grandi cu for di e edificio di Secrets lo por wak den tereno di e habitantenan cu alabes ta perde nan bista.

Contra ROPV

E argumento cu mas a pisa tabata e hecho cu e proyecto lo ta contra e ROPV. E plan di construccion ta papia di un proyecto di 600 y 300 camber, pues 900 en total, mientras cu e ROPV ta permiti unicamente 600 camber na e ubicacion specifico.

Articulo 23, inciso 1 di e ROPV ta bisa bon cla cu e parcela ta pa un hotel cu maximo 600 camber. Riba e bouwvergunning di Secrets cu su ‘situatietekening,’ banda di e permiso pa 600 camber di hotel, tambe a otorga un permiso pa un expansion den futuro cu otro 300 camber di hotel. E expansion aki ta riba e bouwtekening.

Mas ainda den e acta di erfpacht a pone como condicion cu pa loke ta e destinacion di e erfpacht e doño di e permiso ta conta cu e parcela, sin permiso di Gobierno den futuro pa no por usa e tereno si no ta pa ta doño di, of opera un hotel resort di maximo 900 camber conforme e bouwvergunning cu DOW ta duna.

Bao capitulo B di e determinacion den e acta aki ta bisa cu e construccion di e proyecto di hotel lo sucede den dos fase, esta den e prome fase lo construi 600 camber pa un proyecto di hotel all inclusive cu su facilidadnan y despues di un periodo di transicion di dos aña, lo construi e di dos fase di 300 camber di un European Plan Hotel cu su propio facilidadnan. Mirando esaki, tambe teniendo cuenta cu articulo 31.5 di ROPV, ta mustra cu faborablemente lo por asumi cu e construccion of edificio lo ta usa pa otro metanan cu locual ta determina, consecuentemente mester nenga esaki basa riba ley.

Na Februari, Director di DIP dr. Haime Croes a bisa Bon Dia Aruba cu huez a instrui cu mester reevalua e bouwvergunning. DOW di otro banda no ta di opinion cu plan di construccion manera e ta awor, ta contra e ROPV.

Mester bisa cu e ROPV ta basa riba e Ley Ruimtelijke Ordening, LRO. Y segun e LRO, mester adapta na exigencianan di e Plan di Ordenanza Teritorial hasta prome cu e ROPV drenta na vigor. E ley ta brinda espacio pa dispensacion, esta pa desvia di e ROPV, sinembargo esaki mester sucede na comienzo di e proyecto y esun cu tin cu pidi e dispensacion ta e desaroyador, no Pais Aruba. Gobierno den e caso aki, no por pidi un dispensacion na su mes pa un proyecto priva.

“E grupo di bisiñanan ta keda dispuesto pa dialoga,” mr. Maritza Boyce, abogado cu ta representa e grupo a bisa Bon Dia Aruba ayera.

Esaki particularmente pasobra e grupo ta sinti su mes obliga pa bolbe bay huez pa bringa e caso, cu por nifica mas retraso pa construccion di Secrets. “Esaki ta nifica cu e situacion insigur relaciona cu e proyecto aki lo continua pa tur partido envolvi. E lo por tin consecuencia negativo tambe pa e desaroyador y inversionista Three Rivers.”