Diabierna atardi Minister di Enseñansa y Deporte, Endy Croes, hunto cu Minister di Finanzas y Cultura, Xiomara Maduro, y Instituto Biba Saludabel y Activo (IBISA) a lansa oficialmente Weganan Escolar (WE) Aruba 2022 cu un concepto nobo y diferente pa motiva e scolnan y muchanan participa den deporte.
Pa motibo di e pandemia weganan escolar tabata cancela. Pero e aña aki Gobierno di Aruba hunto cu diferente instancia y IBISA a traha hunto pa por trece e proyecto aki back na bida bao di un concepto nobo y diferente pa e muchanan por practica deporte.
Edgar Erasmus, miembro di Management Team di IBISA, a expresa cu di parti di IBISA nan ta hopi contento cu nan por hunga un rol importante den WE Aruba. di comienso di e aña aki a cuminsa traha riba e proyecto aki.
El a splica cu for di inicio di e aña aki nan a cuminsa traha riba e proyecto aki, un proyecto pa muchanan di scol preparatorio, primario y secundario. Tur mucha lo haya un oportunidad pa participa den tur tipo di deporte, locual Erasmus a enfatisa ta hopi importante pasobra deporte ta e vehiculo cu por yuda e muchanan den nan desaroyo.
Erasmus a subraya cu deporte en general ta un balor hopi importante pa e muchanan y ta algo cu mester wordo apoya y motiva ariba nivel escolar pa esaki sigui crece. El a splica cu e concepto di WE Aruba ta pa e sigui crece y brinda oportunidad na tur mucha cu ta na scol pa participa den deporte.
“Mi kier gradici tur e scolnan pasobra sin e scolnan WE no por ta posibel, tur e docentenan cu ta motiva y stimula e muchanan pa practica deporte despues di scol. E esfuerso di docentenan, mayornan, tur otro stakeholders y IBISA cu ta zorg pa e parti organisatorio entre otro”, Erasmus a expresa.
Minister di Finanzas y Cultura, Xiomara Maduro, a resalta e importancia di proyectonan manera WE Aruba cu ta promociona union na un pais. “Tur locual bo por haci pa duna un ehempel na esunnan di mas chikito di bo pais, den e caso aki nos hobennan na scol, ta yuda bo pa ya na un edad hopi chikito siña nan kico ta forsa ora bo bin hunto y e union cu ta sali for di eynan”, el a agrega.
Minister Maduro a subraya cu Weganan Escolar a haci falta durante e temporada di pandemia y sobretodo pa e muchanan cu ta disfruta di practica deporte. Pero ora cu tur e hobennan bin hunto y tur e instancianan traha hunto, e union cu cada un ta fomenta ta algo cu ta sirbi di educacion pa e hobennan cu despues lo crece y bira e ciudadanonan cu ta tuma decisionnan basa ariba experiencia y disciplina cu nan por a haya ora cu nan a bini hunto den competencianan.
“Tin biaha nos no ta para keto na esey, pero e parti aki cu bo por brinda enseñansa na e hobennan door di e weganan aki, door di deporte, ta locual cu ta forma un mucha, ta locual ta forma un ciudadano y p’esey e ta asina importante pa nos pais”, el a agrega.
Minister di Enseñansa y Deporte, Endy Croes, a splica cu desde aña pasa nan ta planificando e proyecto aki. IBISA, practicamente e motor tras di WE Aruba 2022 pa coordina tur aspecto di e weganan, for di januari caba a cuminsa cu e weganan, e competencianan den e diferente categorianan.
Minister Croes a señala cu Aruba ta saliendo for di un pandemia cu a laga hopi cicatriz atras den hopi hende y a pesar di e retonan financiero, den un manera creativo nan ta logra pone tipo di proyectonan manera WE Aruba na beneficio di e muchanan y crea oportunidad pa haci deporte. “Nos tin un pasion pa deporte. Nos ta kere cu deporte ta sano, e ta e vehiculo cu ta conecta nos cu otro”, el a subraya.
E apertura oficial di WE Aruba 2022 lo ta 17di juli y dia 25 di juli lo tin e clausura. Durante e siman aki e scolnan cu ta competiendo for di januari den diferente scol y a clasifica pa e siman final, lo competi contra otro pa wak cu ate scolnan cu lo sali ganador. Lo tin por lo menos 750 mucha den tur categoria participando durante e siman final di WE Aruba 2022.
Minister Croes a sigui splica cu como Departamento di Deporte nan kier inverti pa haci algo bunita pa e muchanan y crea e sentimento patriotico. Nan a haci un inversion den uniform pa tur e participantenan den tur e categorianan. Cada scol cu clasifica lo haya su uniform y e uniformnan ta inspira ariba uniformnan di ekiponan di futbol profesional popular, manera por ehempel Barcelona, Real Madrid, Manchester United, Hulanda entre otro.
Lo tin tambe competencia di baile deportivo/cultural di den Cas di Cultura di cual Departamento di Cultura ta completamente encarga cune. Den e categoria di baile cultural lo competi scolnan preparatorio y basico, y scol avansa lo competi den categoria di baile deportivo.
Lo tin premio cash tambe pa e scolnan cu gana. Apart di medaya pa e muchanan cu participa, lo tin premio efectivo pa e scolnan cu haya e puntuacion mas halto. Mas deporte un scol participa den dje, mas oportunidad e tin pa haya punto y asina gana e premio cash. E idea tras di e premionan efectivo ta pa e placa wordo inverti back den e scol.
