Durante di e ultimo simanan veterianionan ta man yen cu mas di 15 caso di parvo pa dia, e cantidad aki ta bahando si. Den entrevista cu veterinario Natalie Booi di Animal Care Clinic el a bisa locual cu a hala atencion ta cu e parvo e biaha aki a bira mas fuerte, pues cu hopi mas cacho ta fayece a consecuencia di esaki cu normal ta custuma cun’e.
“E virus di parvo ta afecta cachonan chikito pues te cu un aña di edad bo cacho ta core riesgo mas halto pa contagia cu esaki. P’esey e ta hopi importante pa e cachonan wordo vacuna for di 6 siman caba y ontworming pa un tin tripa limpi. Cachonan cu tin carpata y ta mal nutri tambe ta core riesgo pa haya parvo.”
No tin cura
Parvo ta un virus cu no tin cura pe, ta mescos cu un hende ta keda haya griep cu tampoco tin un cura, esey ta hacie fastioso. Unabes na un cas tabatin un cacho cu parvo mester percura pa desinfecta e area unda e cacho tabata hopi bon cu clorox pa mata e virus. E virus por sconde facil den, beton y mata cual ta haci cu unabes tabatin parvo na un cas, e famia por haye cu mas cacho cu nan haya ta haya parvo.
Sintomanan di parvo
Prome sintomanan di un cacho cu tin parvo ta cu e cacho tin perdida di apetit, sacamento y diarea cu sanger cu un holo hopi fuerte. Esakinan ta haci cu e cacho ta deshidrata y cu e por fayece door di esaki. Un persona no por contagia cu e virus aki pero por transporta e virus si y e virus ta hopi contagioso, special ora cu bay den contacto cu e af di un cacho. Pues algo hopi importante ta pa mantene e cacho hidrata.
