Tienda di Educacion ta celebra 10 aña di existencia

E aña aki Tienda di Educacion ta celebra su di 10 aniversario y en conexion cu celebracion aki, director di e organisacion, Rhomyko Winklaar, a splica durante nan rueda di prensa ayera mainta un poco mas ariba e trabaonan cu e organisacion ta haci, y tambe kico lo ta e actividadnan cu nan lo organisa den conmemoracion di nan di 10 aniversario.

Tienda di Educacion ta cumpli ariba 18 di mei exactamente 10 aña di existencia. Winklaar a splica cu 10 aña pasa despues di a haci un sondeo ariba locual ta trata prevencion di abuso di mucha, nan a bin cu e idea pa lanta un liña di telefon caminda cu mayornan por acudi of por yama pa ricibi guia y sosten ariba e tema di lantamento di mucha, vooral ora ta trata preguntanan cu ta surgi na momento cu un mucha no ta comporta su mes.

“Na momento cu a ripara cu e proyecto a haya bida nos por a lanta un organisacion cu a wordo funda ariba 18 di mei 2012. Eynan nos a drenta den nos derecho di existencia y di e tempo ey caba nos a ripara cu tabatin un tendencia cu mayornan ta acudi cerca nos, cual nos ta haya hopi bon pasobra p’esey nos t’ey pa brinda e servicio gratuito y ora mayornan yama 161 esaki ta anonimo”, Winklaar a splica.

Desde e inicio di e organisacion y te cu awo, Winklaar a indica, cu nan a duna un total di 350 tayer na comunidad di Aruba y tambe nan a duna consulta na mas di tres mil ocasion, sea ta via telefon of ora cu e mayornan ta acudi cerca nan personalmente. Tambe durante e diferente tayernan cu nan ta ofrece e mayornan ta acerca e organisacion y nan ta brinda consulta cortico na e momento ey.

El a remarca cu Tienda di Educacion ta a colabora cu diferente organisacion ariba e ramo social manera Telefon pa Hubentud, Fundacion Respetami, Fundacion pa nos Muchanan, Wit Gele Kruis, Fada, entre otro. Y nan ta traha muy specialmente cu Centro pa Hoben y Famia (CHF) cu ta na unda e organisacion ta ubica desde dos aña pasa.

En conexion cu nan celebracion di 10 aña di existencia ariba 18 dia mei, Winklaar a indica cu nan ta preparando desde aña pasa un serie di 29 video informativo pa asina brinda e comunidad di Aruba tur informacion ariba locual ta trata e tema di lantamento di mucha.

“Kisas nan tin preguntanan con mi tin cu haci den cierto aspectonan, con mi tin cu haci cu cambionan, kico ta e rol eigenlijk tambe di hende homber como tata of su ausencia ora cu e no t’ey. Nos a para keto na esaki y nos a traha un serie di videonan pa asina nos por brinda e comunidad di Aruba e servicio aki”, el a informa.

Winklaar a menciona tambe cu diadomingo 15 di mei Tienda di Educacion lo t’ey na Centro di Bario Playa Pabao pa e celebracion di Dia Internacional di Famia caminda nan lo tin un mesa disponibel cu informacion y nan lo brinda tambe un tayer ariba e tema ‘con pa conecta cu un yiu miho’. Esey lo ta prome actividad y durante e resto di e siman di nan aniversario, di 16 pa 20 di mei, nan lo tene diferente entrevista ariba diferente medio di comunicacion tambe relacion cu tur loke ta lantamento di mucha.

Actividad di diadomingo 15 di mei lo ta di 10or di mainta pa 3or di atardi, y segun Winklaar a splica e intencion ta pa nan cuminsa na Centro di Bario Playa Pabao, pero pa expande esaki den otro barionan tambe. Esaki ta bin for di e punto di bista di vision pedagogico ya cu tienda di Educacion tambe ta forma parti di e vision pedagogico di Aruba y nan lo kier yega mas cerca di e comunidad.

“Den e siguiente lunanan nos lo ta bishitando otro centronan di bario pa brinda e servicio den nan cura di cas practicamente”, el a agrega.

Manera ya caba menciona Tienda di Educacion ta haya yama naturalmente, pero aparte di e yamadanan nan ta tuma casonan tambe di otro organisacionnan. Eynan, Winklaar a enfatisa, nan a ripara cu e problematica a bira mas compleho caminda cu antes kisas un famia tabata enfrenta un of dos problema alrededor di e tema di lantamento di nan yiu, pero awendia e problematicanan a bira mas cu dos y eynan e caso ta bira mas compleho pa nan handle.

E director di e organisacion a informa cu nan ta ofrece consulta tambe via Facebook y nan a tuma nota cu esey tambe ta yuda pasobra no semper necesariamente e clientenan por haci uso di un telefon pa yama, pero ta mas facil pa manda mensahe y asina nan ta tuma contacto cu e clientenan via telefon e ora.

Pa loke ta trata solucion di e casonan cu nan ta ricibi, Winklaar a splica cu den hopi caso ta dificil pa saca si di berdad a yega na un solucion pa e problema pasobra manera menciona caba e servicio cu ta wordo brinda via telefon ta anonimo y hopi biaha nan no por contacta e persona cu a yama back.

Locual nan ta haci ta keda pendiente pa si e yamada drenta back, y segun el a menciona e organisacion a yega di haya yamadanan back na unda cu mayornan ta gradici Tienda di Educacion pa e servicio y ayudo na momento cu nan logra haya un solucion pa nan problema.

Den casonan cu Tienda di Educacion haya casonan y nan ripara cu nan no tin e experticio pa yuda cu e problema specifico ey, nan ta contacta otro organisacion- of instancianan concerni pa asina nan por atende cu e caso den cuestion.

Por ultimo, Winklaar a extende su invitacion pa comunidad di Aruba pa asisti na e evento diadomingo 15 di mei na Centro di Playa Pabao y pa haci uso di e servicio gratutito cu nan ta ofrece na henter pueblo. Pa mas informacion por subi riba e pagina di Facebook di Tienda di Educacion.