Segun informacion cu redactor di Bon Dia Aruba a ricibi ayera atardi for di Ministerio Publico, e ex-mandatario lo mester presenta e dia di awe dilanti un hues comisario, segun e proceso di Voorarrest di Aruba.

Den e proceso aki, fiscal ta pidi un hues comisario si por tene e sospechoso te maximo 8 dia pa e bienestar di e investigacion di e cual e ta e sospechoso principal, di e caso penal “Flamingo”. E ta wordo sospecha di comete shete delito: falsificacion di documentonan, estafa, aceptacion di soborno, mal uso di su funcion como minister, participacion den un organisacion criminal, labamento di placa y onverklaarbare vermogensverhoging – loke ta nifica cu ex-minister Oduber no por a duna un splicacion legitimo pakico y con su posicion financiero a mehora.

Proceso di Voorarrest na Aruba

Despues di 8 dia, e fiscal tin cu pidi formalmente un hues comisario pa prolonga e detencion.
Tin diferente base legal pa fiscal pidi hues comisario pa prolonga e detencion despues di dies dia, cu ta lo siguiente:

-Na unda e persona tin chens di huy;

– E persona tin chens di influencia testigo y sospechosonan cu ta parti di e investigacion na unda e ta sospechoso di e caso;

-Na unda e persona por comete of continua e mesun actonan penal cu e ta sospecha di dje.

Si prolonga su detencion cu 8 dia mas, e ex-minister ta bay bewaring (detencion preventivo) na KIA. Despues e fiscal por pidi 8 dia mas pa prolonga e detencion preventivo y despues di esey e fiscal ta pidi detencion (gevangenhouding) cu ta maximo 60 dia.

Fiscal por pidi un prolongacion di gevangenhouding cu 30 dia mas y un di dos prolongacion cu ta 30 dia extra prome cu nan presenta e caso den corte.

Oduber a keda deteni dia 10 di mei ultimo, despues cu a wordo invita pa Landsrecherche pa asina ey ofrece algun declaracion tocante e caso Flamingo.

Caso Flamingo

E caso penal aki a cuminsa haya forma dia 24 di juni di aña 2020, ora Landsrecherche hunto cu RST di Hulanda bao supervision di hues comisario y Ministerio Publico a haci un entrada hudicial na Oduber su cas. Aki nan a confisca documentonan y dos container cu tabata para dilanti di cas di Oduber na Pavia.

E mesun dia, un ekipo grandi conforma pa Ministerio Publico, RST, Landsrecherche y Interpol a haci un entrada hudicial na cas di un comerciante na Esmeralda, na unda cu segun informacion di otro medionan local, tambe nan a drenta na un compania hopi conoci di carga, y na General Aviation Terminal, unda autoridadnan a sigui investiga y a confisca documentonan.

Loke a hala Bon Dia Aruba su atencion ta cu den un di e entradanan hudicial tabatin e participacion di Interpol dunando asistencia. Nan ta un organisacion internacional cu ta facilita cooperacion policial y control di crimen internacional, ta e organisacion policial mas grandi na mundo. Nan ta duna apoyo investigativo, experticio y capacitacion na e forsanan di orden na nan miembronan. Su trabao ta enfoca riba siguridad publico, crimen organisa, labamento di placa, delitonan economico, corupcion, entre otronan, cu ta crusa fronteranan.

E organisacion aki ta funciona como un red di organismonan encarga di haci cumpli e leynan di diferente pais, nan ta lucha contra delincuencia internacional.

Otmar Enrique Oduber a duna su prome pasonan den mundo politico cu Hubentud Activo y Consciente (HAC), e fraccion hubenil di partido AVP. Na 2009 el a bira minister di Turismo y Transporte den e prome Gabinete Mike Eman I. Na 2013 el a haya e mayor cantidad di voto despues di Mike Eman, unda el a mantene e mesun cartera na e di dos gabinete di Mike Eman.

Na aña 2016 el a renuncia di e funcion ey, unda cu despues el a funda e partido politico nobo POR, cu cual el a haya dos asiento na aña 2017 y e la bira minister di Infrastructura y Medio Ambiente di Gabinete Wever-Croes I, pa finalmente retira di politica na aña 2019.

Diferente reaccion riba rednan social tocante e detencion di Oduber

Tabata luna di maart di aña 2017 ora a haci un entrada hudicial na cas di ex-minister di Asuntonan Social, Hubentud y Labor di Gabinete Mike Eman 2, Paul Croes, unda diferente instancia como KPA, Guarda Costa, RST, Landsrecherche, K9, entre otronan a bay na cas di e ex-mandatario pa asina cuminsa cu e investigacion di e caso penal IBIS.

Di loke ta trata e caso Avestruz, e investigacion aki a cuminsa na aña 2019. Landsrecherche bao guia di hues-comisario den cooperacion cu Cuerpo Policial di Aruba y RST (Recherche Samenwerkingsteam), a haci entradanan hudicial na diferente adres pa loke ta trata un investigacion di Landsrecherche di delitonan di corupcion posiblemente cometi rond di entrega di terenonan di gobierno entre 2009 y 2017.

E investigacion a keda conoci como e famoso ‘Caso Avestruz’, na unda durante e diferente entradanan hudicial a confisca documentonan administrativo y material cu diferente tipo di data. Den esaki tambe ta wordo investiga e posibel rol di e parlamentario y ex-minister Benny Sevinger, cu ta dirigi riba e pregunta si companianan a haya derecho di erfpacht a base incorecto.

Di e informacion aki, Bon Dia Aruba a haya algun pregunta di lectornan, na unda e prome tabata indica lo siguiente: “Dicon ora a bin dilanti e caso Ibis di Paul Croes a usa miembronan como di KPA, Landsrecherche, K9, cachonan, warda costa cu a drenta den su cas y den e caso di Benny Zievinger tambe, cu a haci entradanan hudicial na su cas mas di cinco biaha cu diferente instancianan y awor e caso di Otmar (Flamingo) simplemente Landsrecherche a invit’e pa haci un declaracion? Dicon tin diferencia entre algun y otronan?” Pa cu esaki, Bon Dia Aruba a puntra PR di Ministerio Publico, Ann Angela unda el a contesta cu “esey tin haci cu escogencianan haci den e investigacion y OM no kier haci ningun declaracion tocante esey den media.”

Un otro pregunta ta: “OM con ta posibel cu sospechosonan den caso flamingo mag papia cu otro te busca otro despues di wordo libera back y caso Avestruz nan mester a keda leu di otro? Splicacion riba esaki lo ta hopi bon.” Angela a contesta cu “esey tin di haci parcialmente cu e momento den detencion riba cual e sospechosonan aki a bay cas. Nan tabata dentro di un fase cu ainda no por pone condicion. Pero e tin vooral di haci cu e escogencianan haci den e investigacion, anto tocante esey OM no por ni kier bisa nada na prensa.”