Diaranson ultimo, prijs di gasolin y diesel na Aruba a bolbe conoce un cambio. Prijs di gasolin a baha cu apenas dos cen y prijs di diesel si a conoce un aumento significante un biaha mas. Den bista di e aumento grandi den e prijs di diesel, reportero di Bon Dia Aruba a acerca diferente chauffeur di busnan chikito na Aruba pa wak con esaki ta afecta nan trabao di tur dia.
Sra. Sonia Vrolijk, chauffeur di bus B-45 ta splica cu nan no por sigui mas den e situacion aki. Nan ta traha, pero lastimamente e placa cu nan logra gana durante dia ta bay na diesel; y agrega na esey cu e situacion en general ta hopi malo.
“Cada biaha cu nos para, y tin masha hopi bus, nos mester warda tur buelta dos ora pa dos ora y mey pa haya un buelta. Aworaki nos mester paga e motor, pasobra si no bo ta bay pompstation y e placa ta bay tur na diesel y nos no por sobrevivi”, el a expresa.
Vrolijk ta remarca cu e ta spera pa Gobierno di Aruba haci algo, pasobra nan no por wanta e peso aki mas pasobra esey ta nan pan di tur dia, y nan mester core pa haya cliente. El a subraya tambe cu tin un caida masha grandi den cliente, no tin e fluho di cliente pa e cantidad di busnan cu ta core actualmente. “Nos ta demasiado bus y no hopi pasahero”, el a agrega.
Pa loke ta e prijs di pasashi, Vrolijk a indica cu gobierno ta esun cu ta dicidi ariba e prijs. E busnan no por aumenta e prijs riba nan mes y te cu ainda gobierno no a dicidi di aumenta e prijs di e pasashi.
“Nan mester haci algo pasobra nos no ta sobrevivi mas cu e aumento ‘ki, nos no por. Nan mester duna nos un beneficio di algo pasobra si no nos no ta make it”, el a señala.
E situacion aki ta afecta completamente e presupuesto di tur luna pa e chauffeurnan di e busnan chikito, Vrolijk a ratifica. El a sigui splica cu hopi di nan tin nan hypotheek pa paga y otro gastonan, y kier of no nan mester para warda e dos ora prome cu nan por sali na e orario stipula pa wak con nan ta cera e placa pa e dia.
Un otro chauffeur di bus chikito, cu a pidi pa keda anonimo, tambe a expresa su preocupacion pa e situacion y efectonan cu e aumento di prijs di diesel tin specificamente pa nan.
“E aumento di diesel ta afecta hopi pasobra di mes tin menos pasahero y e prijs ta subi so, bo no por gana. Por ehempel si mi gana 150 florin, 75 florin di e placa ey ta bay na diesel so. Esaki ta mi entrada principal y mi no tin salario fiho ni nada, locual cu mi gana den un dia esey ta locual cu mi tin”, e chauffeur a indica.
El a remarca tambe cu e cantidad di pasahero a cay hopi, no ta mescos cu antes y e cantidad di busnan den servicio a aumenta. Tin mas bus, locual ta nifica menos oportunidad pa haya turno pa sali y core un buelta.
Un solucion, cu e chauffeur a menciona lo por yuda cu e situacion precario pa e chauffeurnan, ta un aumento di e prijs di pasashi; pero manera menciona caba, e decision aki ta den man di Gobierno di Aruba.
Sra. Beta Croes tambe a tuma e oportunidad y expresa con e situacion ta afectando su trabao. El a resalta cu e prijs di diesel ta “cabando cu nos”, pasobra locual cu nan gana ta pa diesel. “Miho dicho nos ta traha pa diesel, nos ta traha pa gasolin.”
Croes a resalta cu nan ta traha pa oranan largo pa nan cera algo di placa, pero cu nan bay cas nan no ta bay cas cu nada. El a splica cu antes e tabata pone 35 florin na diesel, aworaki e ta pasa 100 florin pa dia, den 8 ora. “E no ta vale la pena, ocho ora mi ta castiga mi curpa pa diesel”, el a agrega.
Lamentabel tambe ta cu e busnan no ta core yen. El a menciona cu tin ora e por sali for di San Nicolas te Playa cu dos hende so, dependiendo di e dia.
“Mi ta spera cu gobierno por bin cu un solucion of nos tin cu bay para dilanti di Parlamento di Aruba, pasobra ta yega un momento cu nos no por mas. Esaki ta nos entrada. Ami no por bay supermercado y haci compras grandi, mi no por. Ami tur dia tin cu cumpra tiki tiki loke falta, dependiendo kico mi gana”, el a subraya.
Soraida Mackay, chauffeur di bus B-119, tambe a ratifica cu e aumento di diesel tin efecto grandi pa nan. El a menciona tambe cu lamentablemente ora di bay tank, normalmente e tabata tank cu 30 pa 40 florin, aworaki el a bira 80 florin, pero door cu nan mester stop e pomp pasobra si no e por bay mas ariba.
“Poco dia ey mi a traha Afl. 60,50. Mi a bay tank y mi no a paga tino y el a bula bay na Afl. 70. Mi mester a coy 10 florin di mi cartera pone ariba locual cu mi a traha pa mi por a tank. Y asina mes mester bin traha e siguiente dia sin sa si nos ta haya pasahero of no”, el a expresa.
Mackay ta sali for di Santa Cruz tur mainta pa bin Playa y para na e parada di bus chikito. El a conta cu e ta baha mainta tres of cuater biaha sin un pasahero, di Santa Cruz te Playa. Y riba dje ora cu e yega para, e ta haya un pasahero cu tin hopi pura pa bay back Santa Cruz, pero lamentablemente e pasaheronan no ta tene cuenta cu e no por subi back Santa Cruz pa solamente tres florin.
Ademas di e impacto grandi cu e prijs di diesel tin riba nan trabao, Mackay a añadi cu tambe mester agrega na e golpi duro e prijs azeta di motor, cu antes tabata 30 pa 40 florin pa un galon, aworaki e ta 70 pa 80 florin. “Un kwart cu tabata Afl.10,50, el a bira casi 15 florin y mester haci servicio pa mantene e bus. Nos no ta resta placa”, el a indica.
“Nos no por papia mes ora cu bay supermarket. Ora bo bay supermarket cumpra un sakito chikito, bo ta puntra bo mes si nan a conta bon. Pero ora bo bay repasa e recibo ta berdad cu cosnan cu bo tabata paga cinco florin aworaki ta casi 8 florin”, el a agrega.
Un hecho tristo, segun Mackay tambe a subraya, ta cu nan ta mara na prijs di gobierno y e prijs di tres florin nan tin añas mara na dje. El a enfatisa cu e ultimo añanan e aumento di costo di bida, di tur cos, a subi drasticamente, pero e chaufferunan di bus chikito ainda ta mara na e prijs di gobierno.
“Nos no ta manera e panaderianan cu nan ta yama pan plus. Pan plus bo por aumenta bo pan ki ora cu bo kier. Pero nos ta mara na e tres florin y nos no por mishi cune, pasobra bo bay cobra un pasahero mas cu tres florin, nan ta reclama”, el a indica.
El a sigui splica cu riba dianan di fiesta, segun ley, e prijs di pasashi ta bira Afl. 3,50, pero pasaheronan ta reclama esaki y ta bisa e chauffeurnan cu nan ta hortando 50 cen pasobra e prijs di pasashi normalmente ta tres florin.
Mackay a menciona tambe cu e situacion economico tin su efectonan ariba e salud di un persona. “Pakico bo ta kere tin hopi hende canando rond cu stress, depresion? Pasobra e bida cu nos tin aworaki nos no por permiti luho mas. Esaki ta consecuencia di e costo di bida. Tur hende ta haya stress. E situacion aki tin hende malo”, el a subraya.
Pa e chauffeurnan di bus chikito e situacion ta bira cada biaha pio. Entre e aumento drastico di prijs di diesel, e costo di mantencion di nan bus pa nan por eherce nan trabao, gastonan personal, entre otro, e placa cu nan ta gana no ta yega pa sobrevivi y no tin un solucion riba mesa cu lo por yuda alivia e situacion grave cu nan ta pasando aden.
