Minister Dangui Oduber: Prestacion di hotelnan den april 2022 ta hopi bon den comparacion cu april 2019

Turismo di Aruba ta pasando den e mihor momentonan di su recuperacion. Minister di Turismo y Salud Publico Sr. Dangui Oduber ta sumamamente contento y satisfecho cu e resultadonan di luna di april 2022.

Recientemente AHATA a publica su cifranan tocante e prestacion di e hotelnan y Minister Oduber tin e placer di por comparti esakinan cu pueblo. E cifranan aki ta ilustra e comparacion entre april di 2019 y april 2022. E cifranan cu a ser ricibi pa cu luna di april 2022 ta mustra hopi bon.

Manera ta conoci e maneho di Minister Oduber ta dirgi riba turistanan di calidad y turistanan cu ta gana mas di 150 mil dollar pa aña, turistanan cu ta laga hopi placa atras den nos economia.

Den luna di april 2022 e grado di occupacion a subi cu 55% porciento compara cu april 2021. Si compara esaki cu e grado di ocupacion di aña 2019 cu ta un aña record pa Aruba su turismo, e ta solamente 2.7% menos. Segun e mandatario ta importante pa remarca cu Aruba ta e di 2 pais na mundo cu a recupera su turismo di e forma aki.

Banda di e grado di ocupacion e REV PAR den luna di april 2022 a conoce un crecemento di 104% den comparacion cu luna di april 2021 y crecemento di 9% den comparacion cu april 2019. E REV PAR den april 2022 tabata $259.52 cu ta un cifra hopi halto. E REV PAR ta un indicador sumamente importante pa midi e calidad di turistanan cu ta bin Aruba. E REV PAR ta e prijs cu un turista ta dispuesto pa paga pa un camber pa anochi. Nos como pais mester ta contento cu e hecho cu nos tin un di e REV PAR mas halto den Caribe. Na momento cu bo tin un REV PAR asina halto e ta bisto cu turistanan di calidad ta yegando nos pais.

Otro indicador hopi importante ta e ADR (average daily rate) cu tambe a conoce un aumento di 12.2%. E average daily rate den luna di april 2022 ta $323.04 den comparacion cu april 2019 cu esaki tabata na $287.82.

Turismo ta keda e driver principal di nos economia, resultadonan di luna di april ta confirma cu recuperacion di Aruba su Turismo ta riba e bon caminda. Maneho di Minister Dangui Oduber ta dunando e resultado conforme e vision di atrae turistanan di calidad y esaki a wordo confirma cu cifranan di AHATA. Esaki sigur ta un noticia hopi positivo. Finalmente e mandatario a gradici tur empleadonan y tur partnernan den sector turistico pa cu e resultado bunita aki.