Ayera mainta comunidad a conoce e noticia cu ex-minister di Infraestructura di Gabinete Wever-Croes I, Otmar Oduber, a wordo deteni pa Landsrecherche den conexion cu e caso penal “Flamingo”, Oduber ta e sospechoso principal di e caso aki unda e ta wordo sospecha di comete shete delito.
E delitonan ta lo siguiente: falsificacion di documentonan, estafa, aceptacion di soborno, mal uso di su funcion como minister, participacion den un organisacion criminal, labamento di placa y onverklaarbare vermogensverhoging loke ta nifica cu ex-minister Oduber no por a duna un splicacion legitimo pakico y con su posicion financiero a mehora.
Di mesun manera, ayera den oranan di atardi tambe e yega informacion na redaccion di Bon Dia Aruba cu e detencion di Oduber a wordo prolonga pa por lo menos dos dia mas.
Caso Flamingo a cuminsa haya forma dia 24 di juni di aña 2020 ora Landsrecherche hunto cu RST di Hulanda bou di supervision di hues comisario y Ministerio Publico a haci un entrada hudicial na Oduber su cas caminda nan a confisca documentonan y dos container cu tabata para dilanti di cas di Oduber na Pavia.
E mesun dia ey, un ekipo grandi conforma pa Ministerio Publico, RST, Landsrecherche y Interpol a haci un entrada hudicial na cas di un comerciante na Esmeralda na unda cu segun informacion di otro medionan local, tambe nan a drenta na un compania hopi conoci di carga y na General Aviation Terminal unda cu autoridadnan a sigui investiga y a confisca documentonan.
22 di augustus di 2020 investigacion a continua unda cu un otro entrada hudicial a tuma luga na cas di otro sospechoso di inicial E.F cu tabata fungi como ex-campañado di Oduber, di mesun manera e persona aki a keda deteni dia 2 di maart ultimo na unda cu e ta wordo sospecha di ta envolvi den iregularidadnan den otorgamento di terenonan erfpacht.
Dia 6 di maart ultimo, a keda conoci un detencion di otro persona cu tambe ta relaciona den e caso investigativo aki unda cu Landsrecherche reforsa cu Cuerpo Policial y bou guia di Ministerio Publico a haci un entrada hudicial na cas di e persona ey.
Yiu homber di e ex-minister di inicial J.O tambe ta un di e personanan cu a keda deteni den caso aki algun dianan pasa y despues di interogacionnan el a sali liber dia 29 di april ultimo.
