AVP no ta kere cu Hulanda por impone solucion pa medio di COHO

MEP y RAIZ lo por bisa nan Gobierno pa no acepta e leynan di consenso di Reino, pero esey ta nifica entre otro cu Aruba lo perde oportunidad pa refinancia su debenan na un interes mucho mas abao, comparable cu locual Corsou y St. Maarten tin. Asina Miguel Mansur ta opina. E lider di Accion21 a mustra bon cla cu e ta na fabor di e dos leynan di consenso di Reino, COHO pero tambe pa supervision financiero.

Accion21, hunto cu e otro fraccionnan den Parlamento mester entrega nan relato pa Diabierna awor, pa asina por manda nan sugerencianan riba amienda pa e leynan. Pasobra manera cu e delegacion di Hulanda a duna di conoce, e leynan lo keda trata den Tweede y Eerste Kamer cu ta e instancianan cu mester duna aprobacion. E papel di Parlamentonan di Corsou, St. Maarten y Aruba ta pa duna nan respectivo Gobierno e aprobacion pa bay di acuerdo cu e leynan aki. Prome Minister Evelyn Wever Croes a bisa dos siman pasa cu den caso cu Parlamento di Aruba no aproba e leynan, Gobierno lo mester drenta den negociacion atrobe cu Gobierno Hulandes.

Segun Miguel Mansur di Accion21, den votacion di IPKO ta mayoria ta conta. Y mayoria di e Parlamentarionan di Aruba ta contra e leynan di consenso di Reino. “Nan ta bisa cu Aruba no tabata liber pa drenta den e acuerdo. Pero na November 2020, Prome Minister Wever Croes a bisa cu por a busca otro posibilidad. Contrario na Corsou y St. Maarten, Aruba si por a subi mercado internacional pa busca fondo. Pero nos no a logra, pasobra nos debe tabata astronomico.”

Mas ainda, ni Corsou ni St. Maarten mester di sosten di likides na e momentonan aki. E unico problema ta si bin otro crisis, “pero financieramente nan ta hopi miho para cu nos. Y ya caba nan tin un ley di consenso di Reino di supervision financiero, cu ta similar na nos RAft. E realidad ta si cu ningun di e dos islanan aki ta keha di e Rft pasobra tur dos ta presta placa na Hulanda pa menos di dos porciento, sin mester preocupa cu nan ‘credit rating.’”

Segun Mansur, Aruba lo por beneficia di refinancia debe a base di e RAft, door di busca prestamo Hulandes na e mesun condicion cu Corsou y St. Maarten. E debenan di Aruba awor aki ta refinancia na un interes di 5.3 porciento den averahe. Via Hulanda e lo ta menos cu dos porciento. “Si nos logra refinancia henter nos debe, incluyendo e proyectonan PPP si logra cumpra nan via financiamento di Hulanda, ta scapa 190 miyon florin na interes pa aña. Esey ta hopi. Si mira presupuesto 2022, 355 miyon ta bay pa paga interes riba prestamo y 100 miyon ta bay pa e proyectonan PPP. Pues na 2022, 455 miyon florin di Aruba ta bay na servicio di obligacionnan financiero. Otro aña, lo paga riba mey biyon florin na servicio di debe. Esey no ta algo cu por logra. No por papia di autonomia si nos no ta solvente,” e economista y politico a bisa.

Mansur ta kere cu si mira e discusion na nivel Constitucional y politico, e por compronde e postura di AVP cu ta para riba autonomia di Aruba. Pero e cifranan di Aruba na e momentonan aki no ta duna Aruba mucho opcion, den concepto di e lider di Accion21. “Den bista di tur necesidad, con por scoge pa no scapa di paga 190 miyon florin? Esey no ta realistico.”

Reforma a base di dialogo cu partners na Aruba

AVP di su banda no ta kere den e intencion di e leynan di consenso di Reino, particularmente no e COHO. Segun dr. Ryçond Santos do Nascimento, kende ta e experto Constitucional di e partido y a papia durante IPKO for di e perspectiva ey tambe, e acercamento ‘top down,’ di COHO no ta funciona. “E manera con a presenta COHO ta door di pone dede riba heridanan. Pero den bista di AVP, unicamente a pone un imagen di cos cu ta bay malo. Nos ta kere cu mester pone e imagen completo, pasobra tin hopi cos bon na Aruba tambe.” Y e lista ta largo. Seguridad di ciudadano, bienestar y hasta criminalidad hubenil, aunke preocupante, ta mas abao na Aruba cu den region.

AVP ta kere den reforma pero cu esaki mester sucede den dialogo cu tur partner na Aruba. E parlamentario ta reconoce cu mester bin decisionnan duro, pero nan mester ta pasonan cu tur hende por carga y AVP ta kere cu e reformanan manera ta den e landspakket, lo haci e situacion pio. Santos do Nascimento a ilustra cu por ehempel e reforma di mercado laboral, unda kier introduci flexibilisacion laboral lo crea un situacion asina insigur pa hopi ciudadano. Hopi hende lo no ta sigur di nan trabao, lo bin periodonan cu nan lo no tin trabao mes.

Consecuentemente, dificil e grupo aki lo por yega na un auto corda un cas, pasobra nan no ta haya ningun prestamo sin no tin un trabao cu contract fiho. Den otro palabra, e modelo di flexibilisacion ta algo cu VVD a bin cune na Hulanda, cu a crea problema na Hulanda tambe. Sinembargo un mercado Hulandes ta mucho mas grandi y tin forma pa move di un trabao pa otro. Na Aruba, e opcion ey ta mucho mas chikito. Como tal, flexibilisacion lo trece instabilidad den comunidad.

Mescos ta conta pa e introduccion di BTW. Particularmente pasobra no tin ningun estudio cu ta mustra kico lo ta su impacto. Ya caba tin hopi hende ta biba bao di e asina yama ‘bestaansminimum,’ cu ta e nivel di pobresa. Introduccion di BTW sin otro tipo di sosten lo pusha e grupo aki den un nivel di pobresa mas serio ainda.

Pa loke ta e gastonan di cuido medico, of AZV, AVP ta reconoce cu mester bin reforma. Pero e reformanan tambe lo tin mas aceptacion si e ta basa riba dialogo entre partnernan pa mira con pa yega na un miho balans.

Segun Santos do Nascimento, e acercamento ‘topdown’ di Hulanda ta hopi bisto na Boneiro, cu ta Hulandes awor aki. Y despues di 12 aña ainda e no tabatin su efecto cu a priminti. Ainda tin hopi Boneriano ta lucha cu pobresa. “Y riba dje, ta e aña aki apenas cu a logra cu Hulanda a reconoce cu Papiamento ta importante. Boneiro mester a busca sosten di organisacionnan na Friesland, di comunidadnan Hudiu na Hulanda cu ta papia Yidish pa por a convence Gobierno Hulandes cu e isla tin algo culturalmente di dje, cu ta Papiamento y cu mester reconoce.”

Den otro palabra, COHO, den opinion di AVP, aunke cu a trece cambio, no ta duna balor na e caracter unico di Aruba y no ta tene cuenta cu e idiosincracia di e isla den su acercamento.

Diabierna awor, e fraccion mester entrega su relato riba e proposicionnan di ley di consenso di Reino.

MEP ta duna mensahe confuso

Tanto Accion21 como AVP sinembargo ta sinti cu e mensahe di MEP no ta mucho cla. Berdad durante IPKO, Presidente di Parlamento di Aruba mr. Edgard Vrolijk a bisa cu mayoria ta contra e dos leynan di consenso di Reino, sinembargo tambe tabatin e señal cu nan lo kier mira cambio den e ley. Riba dje, Gobierno di Aruba a bisa na algun ocasion di por biba cu e dos leynan y e partidonan di oposicion no ta mira con fraccion di MEP y RAIZ lo manda e mensahe cu Gobierno no por duna su consenso na e leynan. Segun Ryçond Santos do Nascimento, Prome Minister Evelyn Wever Croes a bisa abiertamente despues di e yega na acuerdo cu Hulanda cu “e leynan di consenso di Reino lo haci nos mas autonomo a lo largo, aunke cu e tempo ey tabatin stem critico den MEP, manera Rocco Tjon cu no tabata mucho contento. E posicion no ta parce mucho consistente.”

Di su banda, Miguel Mansur a ilustra si cu “e proceso di ley di consenso ta cu ta Gobiernonan mester ta de acuerdo cu e leynan. Y Gobierno di Aruba a duna di conoce di ta de acuerdo.”

Bon Dia Aruba a haci pregunta na lider di fraccion di MEP, drs. Shailiny Tromp Lee y na lider di fraccion di RAIZ, Misha Raymond, pero no a haya ningun reaccion riba e preguntanan. Di otro banda, lider di RAIZ, sr. Ursell Arends a duna di conoce na 2020 cu su partido ta consciente di e necesidadnan di reforma, pero cu no ta kere cu ta un entidad Hulandes ta e instancia pa implementa nan.