Durante un conferencia di prensa ayera tardi den Cas di Cultura, Stanley Dabian, PR & Comunication Officer di Departamento di Cultura Aruba (DCA) a anuncia oficialmente e proyecto nacional “Encuentro Multicultural Aruba 2022 y 2023”. E proyecto aki ta relaciona cu e celebracion di Dia di Diversidad Cultural pa Dialogo y Desaroyo.

Sr. Dabian a splica cu riba dia 21 di mei aña pasa a tene pa prome biaha e tradicional Encuentro Multicultural Aruba, cu den pasado ya tabata wordo celebra pa 15 aña consecutivo bao di e nomber di ‘Feria Multicultural’, cu tabata tuma luga riba dia 12 di october, cu ta ‘Dia de la Raza’.

DCA a busca un fecha mas special pa haci e celebracion aki y asina cuminsa cu e prome edicion di ‘Encuentro Multicultural Aruba’ relaciona cu e celebracion di “Dia di Diversidad Cultural pa Dialogo y Desaroyo”, na unda e gruponan participante a presenta aña pasa sin publico general pa motibo di e pandemia. E aña aki DCA ta organisa e actividad un biaha mas y e aña aki pa publico general, riba diasabra 21 di mei na Cas di Cultura Aruba, cuminsando pa 06:30 pm y entrada ta completamente gratis.

“Nos como Departamento di Cultura Aruba ta gradici tur grupo cu a logra presenta di un forma espectacular na esun di aña pasa. Nos ta gradici tur e gruponan aki pa nan valioso aporte y participacion. Nos ta invita nan tur back pa asina aki por mustra na un publico en general e trabaonan artistico cu sigur a resalta grandemente trahando den conhunto pa fomenta e integracion y aporta na e paz y unidad di tur e pueblonan di nos tera”, Dabian a remarca.

Dabian, den nomber di DCA, e extende e invitacion na tur Consulado, grupo-, artista- y promotornan cultural cu ta desea di forma parti di e edicion 2022 por busca formulario di inscripcion y entrega esaki na DCA no mas tarda cu dialuna 16 di mei, pa asina forma parti di e actividad multicultural.

Na mesun momento Dabian a informa cu e inscripcion pa e edicion number tres di “Encuentro Multicultural Aruba” pa aña 2023 ta oficialmente habri y ta cera diaranson 12 di october di e aña aki y na unda lo tin un acto simbolico pa conmemora ‘Dia di la Raza’.

El a sigui splica cu e celebracion di e proyecto aki pa proximo aña lo consisti di un programa di actividad di un siman largo na unda nan lo trece back exposicionnan gastronomico y artesanal, intercambio artistico y multicisciplinario Aruba, como tambe un show multicultural.

Durante e actividad aki, Dabian a subraya, diferente organisacion, persona y grupo di tur nacionalidad ta haya e oportunidad pa crea un luga di encuentro y intercambio cultural, entre e habitantenan di Aruba, hende di tur nacionalidad y rasa, pa asina tur hende por conoce mas di cerca e cultura y custumber di otro paisnan.

E meta di e proyecto aki ta pa crea un ambiente di convivencia pacifico, na unda respet, tolerancia y libertad di expresion artistico y cultural ta resalta, pa despues sigui promove esaki, presenta den combinacion cu un show di intercambio multidisciplinario cultural un tema di reflexion, un exposicion gastronomico y artesanal, crea un espacio caminda artista di tur genero por demostra nan talento y expresa na e publico presente, tur e potencial artistico cu tin na Aruba.

Dabian a sigui splica cu e proyecto aki DCA kier destaca e aspectonan mas positivo di cada persona y pais cu ta basa riba e balor, respet y atencion cu ta wordo duna na e simbolo, idioma y identidad, cu ta haci Aruba unico, grandi, diferente y special. DCA kier enfoca tambe arriba e union entre otro pa fortifica tur laso di amistad entre e Arubiano y personanan di otro nacionalidad cu ta biba na Aruba.

A traves di e “Encuentro Multicultural Aruba” DCA ta pusha pa stimula e pueblo di Aruba pa por sigui traha, biba, sinti y conserva e herencia cultural, material y no material. Proteha e patrimonio y legado cultural di cada nacionalidad y asina aki crea un espacio pa comparti e rikesa cultural di tur hende cu ta biba na Aruba.

“Engrandece e respet pa siña diferencia y balora e forma di biba y tur e otro expresionnan, tradicion, cultura y folklore di otro pueblonan. Uni nos mes na e iniciativa di UNESCO pa celebra y crea un dia di dialogo y di desaroyo pa asina nos por siña di otro y yega na diferente acuerdo di cooperacion y sosten mutuo pa sigui traha den ekipo pa engrandece nos Aruba, y yuda fomenta union y e deseo di por sigui traha, expresa, comparti y biba cu otro den completo harmonia, paz y trankilidad”, Dabian a agrega.

Cu e proyecto multicultural aki e obhetivo di DCA ta pa laga tur otro pais cera conoci cu e cultura Arubano y permiti pa otro colonianan por mira y midi e diferencianan, compronde tur e similaridadnan cu e cultura di Aruba tin pa ofrece y cu por yuda cu e comprension di e raiz di e existencia, esencia, origen y principio cu cada pais ta draai rond di dje cu ta haci nan unico, diferente y special.

“Nos kier crea un plataforma na unda anualmente por bin cu diferente topico di discusion, pa por sigui intercambia, integra y comparti tur loke nos tin pa expresa. Enrikece nos conocemento, respeta nos creencianan, comparti nos norma y balornan y resalta tur nos identidad. Fomenta igualdad, participacion, respet, union, amor y tolerancia”, Dabian a finalisa.