E conclusion ta conoci, pero e rapport di Algemene Rekenkamer Aruba, ARA, riba FASE ta ilustra detayadamente inconsistencianan, ademas cu henter e proceso a sucede sin un base legal.

Bon Dia Aruba ta amplia riba e investigacion aki di Contraloria General, ARA cu a ilustra cu Gobierno no ta duna ningun indicacion di lo resolve e problemanan cu e rapport ta señala. Esaki, mientras cu tanto e Ministernan envolvi como Parlamento mester ta mucho mas alerta pa situacionnan asina.

Manera ARA a publica den su relato di prensa, Gobierno a haci hopi esfuerso pa ciudadanonan sa di e sosten di emergencia FASE, y a haci e proceso di peticion mas facil posibel y esaki a yuda ta evita pobresa serio.

Pero no tabatin suficiente garantia pa percura cu casonan igual ta haya trato igual, mas ainda pasobra ciudadanonan no por a apela ora cu a nenga nan FASE. Y esaki ta un kiebro den e seguridad legal di ciudadano. Tampoco a percura pa garantianan pa evita abuso of maluso y/of cu ciudadanonan no ta ricibi mas cu tabata intenciona. Pues no a sigura cu a anda cauteloso cu medionan publico.

FASE tabata un asistencia financiero nobo, cu a hinca lihe den otro. Y e prome problemanan a bira bisto den apenas algun luna, manera falta di regulacion riba mercado laboral. ARA ta bisa cu e introduccion poco bruha di FASE ta di compronde. Pero locual no ta di compronde con e Minister di Asuntonan Social y Labor, te na momento di e publicacion di rapport investigativo, no a percura cu tin un base legal pa e asistencia. Pa tal motibo mes falta e criteria pa evaluacion igual y percura cu tin garantianan legal pa e ciudadano.

Consecuentemente ARA ta cualifica e otorgamento di e asistencia di FASE como ilegal. E ley cu mester a regla e pago idealmente mester a bin prome cu a cuminza paga. Berdad cu Presupuesto di Pais Aruba a brinda un cuadro pa e gastonan aki, pero falta e base legal pa otorga e asistencia. Consecuentemente falta e cuadro cu ta structura e gastonan pa medio di determina cua ta e obhetivo, e condicionnan y cua ta e proceduranan cu mester a cana.

Asistencia di FASE tabata amplio y accesibel

Ora cu den e periodo di crisis tabatin mester di accion riba diferente tereno, Gobierno bao presion a bin cu e asistencia nobo, cu a bira posibel den tempo cortico danki na esfuerso di e personal envolvi y colaboracion entre instancianan. A informa comunidad via tur medio disponibel con pa haci peticion pa FASE, cu a rekeri hopi prueba, pero tambe a permiti diferente structura pa entrega esakinan. E proceso aki a haci cu e peticion tabata accesibel.

Di otro banda, no tabata cla pa ciudadanonan por haya informacion unda nan peticion a keda. Pa e motibo aki, Direccion di Finanzas y Direccion pa Asuntonan Social a haya tur e preguntanan, a pesar cu nan no tabatin e papel decisivo ken ta haya FASE of no. Consecuentemente, nan no por a duna ningun contesta mientras cu nan tabata confronta cu yen di pregunta.

Falta di garantia di trato igual pa caso igual

Di otro banda, Gabinete Wever Croes I no a formula metanan specifico ni un cuadro cla pa otorga FASE. Tambe a cambia regularmente cua ta grupo meta y condicionnan pa ricibi e asistencia. E reglanan di maneho pa evalua peticion tabata contene agregacion y excepcion y ya no tabata cla y uniforme. Personal di Gobierno cu mester a evalua e peticionnan bao presion di tempo, tabatin poco gara pa sigura cu ta evalua cada caso di forma igual.

Pues segun ARA, no ta nada straño cu a constata inconsistencia den e dossiernan cu a evalua. Peticionnan cu basa riba e informacion cu a duna ta mustra caso igual, pero asina mes uno a ricibi FASE y e otro no. ARA a bisa cu ademas, den mayoria caso, tabata falta con a fiha e evaluacion.

Kiebro riba seguridad di derecho di ciudadano

Gobierno a tuma decision riba 18.611 peticion cu a entrega den e periodo cu ARA a investiga e proceso di FASE. Di e cantidad aki 3013 peticion no a keda honra, cu ta 16 porciento. Esnan cu no a ricibi FASE no a haya notificacion. Y nan a keda limita den e posibilidad pa apela contra e decision implicito. Esaki por a tuma luga pasobra no a bin un ley unda ta determina cua ta e derecho y obligacion di tanto esun cu ta pidi y tambe di Gobierno. E falta di un cuadro huridico ta un kiebro riba e seguridad huridico di e ciudadano.

No a garantisa cautela cu fondonan di FASE

Ciudadanonan cu a perde nan entrada completo of pa gran parti, por a haci peticion pa FASE durante e crisis di corona. Gabinete Wever Croes a scoge pa traha cu sumanan standarisa. Como tal, no a ehecuta e evaluacion di entrada pa determina e caida. Por ehempel un hende cu a bay atras cu 300 florin, a ricibi e mesun suma na FASE cu un persona cu a perde henter su entrada di luna.

Motibo ta cu pa evaluacion di e peticion no a wak e embergadura di e caida di entrada (inkomentoets). Na momento di un decision positivo, esun cu a pidi tabata ricibi e suma standard di 950 of 1452 florin pa luna. E por a pasa cu un persona cu mas trabao, ta haci peticion pa FASE pa motibo cu un di e trabaonan aki a baha of a cay afo, pero si tin otro entrada regular. E pregunta ta con leu por a considera e caso specifico aki como emergencia. A scoge tambe pa duna FASE na pensionadonan cu tabata traha y a perde nan salario, pero no e entrada di pensioen. Esaki mientras cu FASE tabata un ayudo di emergencia.

Practicamente no a aplica otro medida pa evita maluso y uso ilegal di e areglo. Por ehempel tabatin control hopi limita, mientras cu net esaki mester a bira fuerte netamente pa motibo di e caracter urgente di e sosten. Tambe tin caso unda unicamente un funcionario ta dicidi pa honra e peticion di FASE y su provision di control y sancion no ta den e areglo legal ni a comunica esaki na e ciudadano. Esaki a nifica cu e asistencia di emergencia FASE, pa motibo di falta di e ‘inkomentoets’ y e garantianan necesario, tambe por bay pa personanan cu no tabatin mester di dje pa sobrevivi. Consecuentemente a sobrepasa e meta pa cual a bin cu FASE , esta pa brinda e ciudadano cu a keda sin entrada cu suficiente medio financiero pa por sobrevivi.

Falta di mehoracion structural

Comienzo di 2020 tabata un situacion di crisis. Y ta algo positivo cu Gabinete Wever Croes a bin cu un asistencia nobo pa sostene ciudadanonan cu a confronta un situacion di emergencia. E ta di compronde cu durante e prome periodo, no por a spera cu e proceso di otorgamento a cana bon den tur sentido. Pero na momento di prolonga FASE no a tuma medida adicional pa limita riesgo. Es mas, e medidanan pa mitiga esakinan a bira hasta menos. Personanan cu mester a evalua e peticionnan a bolbe haci nan trabao regular, y cierto momento, ta un persona so tabata evalua e peticionnan, cu a nifica cu no tabatin separacion di funcion.

P’esey ta incomprendibel cu Gobierno, despues di 18 luna di introduccion di FASE, ainda no a bin cu un cuadro huridico. Door di esaki falta maneho pa por evalua e peticionnan di FASE na forma consistente, ciudadano no por a apela y a limita e opcion pa gasto efectivo. Y ta pa falta di e cuadro huridico aki cu ARA ta conclui cu henter e otorgamento di FASE tabata ilegal.