Ayera atardi, Centro pa Hoben y Famia conhuntamente cu Centro di Bario Playa Pabao a duna un conferencia di prensa pa informa comunidad tocante e celebracion di Dia Internacional di Famia cu lo tuma luga diadomingo 15 di mei for di 10or di mainta te cu 3or di atardi.
Jesseline Kelly, PR di Departamento di Asunto Social a expresa cu Centro pa Hoben y Famia ta un centro caminda siete instancia a uni pa traha riba tereno di prevencion, y asina ey ofrece comunidad informacion, guia y sosten na famianan riba tereno di lantamento di mucha.
E centro su meta principal ta pa reenforsa e famianan aki na Aruba y conscientisa nan riba e responsabilidad cu tur tin pa crea famianan saludabel, manera Kelly a sigura.
En conexion cu Dia Internacional di Famia, stipula pa Nacionnan Uni, for di aña 1994 mundo ta celebra tur aña riba 15 mei cu meta pa conscientisa comunidad riba e importancia di e sistema familiar pa e desaroyo di cada ser humano y tambe riba e importancia di pasa tempo hunto como famia.
“No ta por nada e famia ta wordo yama e fundeshi y e pilar di e sociedad, un sociedad cu famianan fuerte, saludabel y resiliente ta haci un comunidad fuerte y prospero”, Kelly a bisa.
Un mucha desde su prome dia cu e nace tin e necesidad di amor y afeccion pa e por biba, crece y desaroya saludabel. E tin necesidad pa ricibi apoyo, guia y e tempo pa pasa hunto cu su famia.
Den su famia e ta ricibi norma y balornan, e ta siña forma lasonan social, e ta comparti, e ta anda cu su miedo nan, su logronan, e ta ricibi motivacion, etc.
Tin biaha cu ta pensa cu un yiu tin cu bay scol pa siña tur cos, pero e scol mas grandi di bida pa cualkier ser humano ta su hogar, unda cu e ta ricibi locual cu ta bay yud’e desaroya den un ser humano saludabel.
Pandemia di Covid-19 mundialmente tabatin su efecto y impacto ariba e sistema familiar unda algun famia no tabatin un situacion facil, y algun di nan hasta a perde un ser keri. No por a bishita otro pa un tempo, ni brasa otro, otronan no tabatin di come cu mester a pasa dianan cera den nan cas hunto cu tur su consecuencianan.
Tambe por a scucha varios famia cu awendia ta hopi mas consciente di e balor di e circulo familiar y amistad, e forma con famia ta sostene otro den temporada di malesa, e forma con famia ta consola otro y tambe sosteniendo otro financieramente.
“Tin famianan cu awe ta mas uni cu nunca y nos a ripara esaki cerca e centro y departamentonan concerni, cu ta mas consciente y kier dedica mas tempo cu otro, mirando cu e situacion ta cambia den un frega di wowo”, Kelly a señala.
Igualmente el a trece dilanti cu e Dia di Famia aki nan kier pone enfasis y encurasha tur famia pa probecha di haci actividadnan sea pafo di cas of den mesun cas pa asina pasa tempo cu otro.
Di su parti, Hannah Harsveld trahado social di Centro pa Hoben y Famia a splica cu esaki ta prome biaha cu Centro pa Hoben y Famia hunto cu 15 instancia riba tereno social a uni cu Centro di Bario Playa Pabao pa celebra e dia aki unda cu nan lo bay ta presente for di 10or di mainta te cu 3or di atardi cu informacion valioso pa comunidad, e instancianan aki ta: Centro pa Hoben y Famia, Fundacion Respeta mi, Tienda di Educacion, Fundacion pa nos Muchanan, FCCA, FADA, Wit-Gele Kruis,CAA, Famia Planea, Telefon pa Hubentud, CEDE, Fundacion Contra Violencia Relacional, ADRA y Fundacion pa Comunidad y HIAS.
Di mesun forma, nan ta invita comunidad pa un charla educativo riba importancia di pasa tempo cu famia cu lo wordo ofreci e dia aki 1or di merdia door di Tienda di Educacion, ademas di e celebracion di diadomingo awo lo tin 3 charla pa mucha y adulto riba diferente fechanan e cual ta:
1. ‘Kids Empowerment’, pa mucha (edad 10 – 13 aña), diahuebs 19 di mei 2022, for 3:00 pm te cu 5:00 pm na Centro di Bario Playa Pabou.
2. ‘Responsabilidad di Mayor’, pa adulto, diamars 24 di mei 2022, for 7:00 pm te cu 9:00 pm, na Centro di Bario Playa Pabou
3. ‘Famianan Saludabel’, pa adulto, diamars 31 di mei 2022, for di 7:00 pm te cu 9:00 pm na Centro di Bario Playa Pabou.
Pa personanan interesa, por registra riba nan Facebook page di Centro pa Hoben y Famia of na nan oficina.
Dennis Burke presidente di Centro di Bario Playa Pabao a indica cu pa basta aña caba nan ta organisa e programa anual aki conhuntamente cu Departamento di Asunto Social pa haci diferente actividadnan como gruponan di baile, face painting, weganan, hersengymnastiek, domino, pustamento di fli, e actividadnan ta completamente gratis.
Centro pa Hoben y Famia ta haci un apelacion pa comunidad (gobierno, doñonan di trabou, coleganan, familiarnan, amigonan) keda demostra e empatia y comprension pa otro. Dia Internacional di Famia ta un bon oportunidad pa pasa tempo cu famia. Haci actividadnan simpel den famia y pasa tempo hunto ta sirbi pa haci lasonan familiar mas fuerte y sano.
Akinan algun tips pa famia:
Planea den bo schedule di e siman of e dia aki pa haci algun actividad leuk cu bo famia, e por ta cosnan simpel manera:
Bay cana;
Bay bishita un parke;
Bay misa hunto ;
Bay pasa dia na lama;
Sali bay come algo hunto.
Algun actividad cu mayornan por haci paden cu famia:
Pinta, kleur of verf cu bo yiunan chikito;
Traha snacks, bolo of algo di come hunto cu famia;
Traha den cura cu matanan of planta ;
Core rond cu bais;
Planea un campamento den cura di cas mes cu henter famia;
Hunga weganan di mesa (manera ‘mens erger je niet’, wega di carta, etc) cu ta trece momentonan di hopi alegria;
Decora e cas, of bay wak un album familiar hunto of mira bek potretnan familiar.
