(CuraçaoChronicle) – Miembronan di Eerste y Tweede Kamer di Parlamento Hulandes tambe ta kere cu mester haci amienda na e propuesta di COHO. E consensusrijkswet no ta aceptable na ningun di e parlamentonan di Reino.

Esaki a keda aparente for di e Consulta Interparlamentario di Reino IPKO, cual a tuma lugar na Sint Maarten te cu diabierna di siman pasa.

E reunion a conclui cu firmamento di un lista di acuerdo. Por ehemplo, e paisnan a bay di acuerdo cu Aruba, Corsou y Sint Maarten no mester entrega nan contribucion na e ley di Reino te cu dia 20 di mei proximo. Anteriormente e fecha limite tabata proximo diabierna, dia 13 di mei.

E delegacionnan a formula seis punto di atencion durante IPKO.
E escogencia liber di e paisnan pa drenta den acuerdonan mutuo y e forma pa scoge, specialmente ya cu en principio ta trata di asuntonan di paisnan autonomo.

E posicion y rol di e Parlamentonan y e Staten Generaal den establecimento di leynan di consenso di reino (consensusrijkswet).
E diferencia den base legal entre leynan di consenso di reino y otro leynan di reino y acuerdonan mutuo.

Dialogo, coordinacion mutuo, y un relacion abierto y respetuoso mester ta primordial pa obtene y mantene consenso.
Determina e termino referi den Articulo 16 di Statuut pa Reino di Hulanda pa entrega un rapport por escrito di e cuerpo representativo di e pais den cual e regulacion ta bay aplica.

E importancia di coordinacion mutuo y dialogo entre representantenan di pueblo prome y durante e tratamento formal di e ley den Staten Generaal.

Consenso entre gobiernonan riba ley di COHO no tabata boluntario

Riba insistencia di e delegacionnan parlamentario di Aruba y Sint Maarten participando den IPKO, e lista di acuerdonan explicitamente ta declara cu e acuerdo di nan gobierno cu e propuesta di rijkswet pa establecimento di e Organo Caribense pa Reforma y Desaroyo (COHO) no tabata boluntario.

E delegacionnan a intercambia nan punto di bista y a bay di acuerdo cu e parlamentonan ta bay entrega nan comentario y preguntanan riba e legislacion dia 20 di mei. E ora ta keda na e gobiernonan pa bay di acuerdo cu e contesta.

Despues di esey, Tweede Kamer Hulandes por schedule un debate plenario den cual delegadonan special di e paisnan Caribense tambe por participa. Ta mustra poco probable cu esaki ta bay ta prome cu reces di berano. E delegacionnan di IPKO a acorda pa reuni di nobo (virtualmente si ta necesario) prome cu e debate final.