Edgard Vrolijk: mayoria den Parlamento di Aruba ta contra e proposicionnan di leynan di consenso
Parlamentonan di Reino Hulandes a haya extension te dia 20 di Mei pa traha nan relato riba e proposicion di ley di consenso di Reino COHO, algo cu tabata un proposicion di Aruba. Esaki tabata considera un logro grandi pa tur e delegacionnan.
IPKO, e encuentro interparlamentario di Reino Hulandes a conclui su prome encuentro pa 2022 na St. Maarten, despise di hopi discusion riba e leynan di consenso di Reino. Pa Corsou y St. Maarten, e punto ta unicamente e ley di consenso di Reino COHO, pero pa Aruba tin tambe e ley di consenso di Reino Raft, unda supervision financiero di Aruba lo keda regla pa un ley di Reino en bes di e landsverordening Aruba Financieel Toezicht.
Mester bisa cu e delegacion di Corsou tabata riba un liña despues di a fiha su posicion hopi cla. E delegacion di Aruba di otro banda refleha pensamentonan diferente. Un gran mayoria den Parlamento, cu ta MEP, RAIZ y AVP ta contra e dos leynan di consenso di Reino manera nan ta skirbi. Fraccion di MEP, cu tabata sostene Gobierno na 2020 ora cu a firma pa e landspakket y tambe na 2021 ora cu a acepta cu nan ta keda regla den ley di consenso di Reino, hunto cu e supervision financiero no ta de acuerdo cu COHO ni e RAft. Fraccion di AVP no kier ningun entidad pa controla. Pero e fraccionnan di oposicion Accion21 y MAS si ta sostene COHO.
En todo caso, e encuentro interparlamentario a caba cu aprobacion di e lista di palabracion.
Anfitrion, Presidente di Parlamento di St. Maarten Grisha Heyliger Marten a gradici tur delegacion pa nan participacion y a bisa cu e tabata un honor pa por a por a organisa e reunion. “E tabata un IPKO unda cada delegacion a duna ilustracion di desaroyo den nan pais, cu a brinda e otro pa haya bista kico ta sosode den otro partinan di Reino. Contrario na e plan inicial, a dicidi pa tene e reunionnan den forma publico, particularmente riba e ley di consenso di Reino riba COHO pa asina ciudadanonan tambe por a sigui esaki.” E Presidente di Parlamento di St. Maarten a bisa cu a discuti generalmente riba e leynan di consenso pa trece claridad y ta spera cu lo por sigui discuti riba nan na September proximo, ora cu Hulanda ta anfitrion.
Hefe di delegacion di Hulanda, Mariëlle Paul di VVD a bisa cu e ta importante pa por intercambia pensamento den forma personal. “Nos a scucha y tur informacion cu nos a haya nos lo usa pa nos trabou den Tweede y Eerste Kamer.” Segun Paul, e reunionnan a bay den bon esfera, cu hopi honestidad y tur por a papia habri cu otro. “Esey ta ganashi pa tur. Nos a palabra pa sigui cu un dialogo habri asina. Particularmente asina nos a yega na acuerdo pa presenta e relato di e leynan di consenso di Reino dia 20 di Mei, en bes di dia 13. “E discusionnan tabata fuerte tin biaha, pero nan a bay den un esfera ameno.”
Hefe di delegacion di Aruba, drs. Shailiny Tromp Lee a gradici St. Maarten pa a organisa IPKO y hinca un programa hopi activo den otro. E lider di fraccion di MEP a bisa cu e recepcion na St. Maarten tabata hopi bon y e guia di e reunion tambe. Tromp Lee a urgi cada di e delegacionnan pa haci bon uso di e tempo adicional cu a haya pa traha riba e relatonan Parlamentario riba e leynan di consenso di Reino. “E ta nifica cu tin mas tempo pa delibera riba e leynan di consenso.”
20 di Mei
Presidente di Parlamento di Aruba Edgard Vrolijk di su banda a bisa cu IPKO na St. Maarten tabata exitoso den sentido cu por a debati y awor tur hende sa “unda nos ta para. Pa Aruba, nos kier wak cambio y nos a bisa cua ta e cambionan cu nos kier mira den e leynan. A informa e delegacionnan di Eerste y Tweede Kamer. E proposicion pa hala e fecha pa entrega relato riba e leynan di consenso di Reino a bin di Aruba y mi ta contento cu tur delegacion a acepta esaki.”
Rolando Brison, miembro di delegacion di St. Maarten a bisa cu e posicionnan expresa durante IPKO mester keda refleha den e relato final. “Tur tres pais a bisa cu a firma pa COHO bou presion.”
Hefe di e delegacion Hulandes, Paul di VVD ta a keda enfatisa e importancia di un IPKO den persona ya cu por intercambia pensamento y papia cu hopi mas sutilidad. “Pues tabata di hopi balor pa haya ‘input’ y asina por ricibi e relatonan di Parlamentonan pa e leynan di consenso. Asina aki nos por haya e informacionnan necesario pa trata den Parlamento na Hulanda, cuminsando cu e reunionnan den Tweede Kamer. Mi sa cu tur locual a bin dilanti durante e IPKO nos lo hiba esaki den e tratamento di e proposicionnan di ley.”
Paisnan CAS no ta sostene ley di COHO den su formulacion actual
Amerigo Thode di MFK, di Corsou a bisa cu e delegacion a atende IPKO cu un posicion cla. Corsou a fiha su posicion caba pa e ley di COHO. Pero e ta kere si cu ta hopi prematuro pa bisa con e ley lo bira na final. “Nos a keda como un delegacion. Nos por a keda papia cu otro. Unda a pega, a mira con pa topa cu e otro na mita caminda. Pa Corsou e fecha di 20 di Mei tambe ta esencial.”
En todo caso a bira hopi cla cu e delegacionnan di paisnan CAS, esta Corsou, St. Maarten y Aruba en todo caso a haya oportunidad pa expresa nan opinion y pensamento riba locual nan ta considera dolornan den e ley di consenso di Reino COHO, incluso e papel di Ministerio pa Asuntonan Interior y Relacionnan di Reino BZK den e proceso di decisionnan. “Den acuerdo di Gobernacion di Hulanda nan a pone un liña hopi cla, ‘Voor een betere toekomst voor het gehele Koninkrijk.’ Kiermen Hulanda mester tin comprension pa e dolornan di e paisnan CAS y a papia di esakinan. A splica pakico Parlamento tin dolor pa e proposicionnan. Hasta esun di Hulanda a papia di su dolornan. Pero awor e Parlamentonan lo tene reunion central pa traha relato pa entrega esaki na Hulanda, unda tur e cuater Gobiernonan mester sinta hunto pa duna contesta. E ora ey lo sa kico ta e pensamentonan riba nos dolornan. Mester laga e ley cana su proceso, pasobra Parlamento ta cana un direccion y Gobierno ta cana otro. Ora cu haya contesta, nos lo tuma e siguiente paso. Tur cuater parlamento ta de acuerdo cu e dolornan. Manera e proposicion ta riba mesa, e no ta aceptabel. Esey ta claro.”
Paul Rosenmöller di Groenlinks, vice presidente di e delegacion Hulandes y miembro di Eerste Kamer di su banda a enfatisa cu a tuma nota di e pensamentonan, a intercambia ideanan, e beneficio y desbentaha di COHO y e sentimentonan. “Nos a acumula tur esakinan y dia 20 lo tuma e siguiente paso, y e ora sa kico e fraccionnan ta pensa. Nos no tin un opinion cla kico Parlamentonan y Gobiernonan awor ta pensa riba COHO.” Un di e dolornan ta e recortenan den salario cu ta parti di e condicion Hulandes. “Mi ta kere cu e delegacion di Hulanda ta consciente cu e recortenan ta afecta cierto gruponan, cu tin salarionan limita.” Rosenmöller a reconoce e impacto di inflacion riba e islanan como tal ta bira hopi pisa, mescos cu ta e caso na Hulanda. “E bon ta cu Secretario di Estado (van Huffelen) ta consciente di esey y a bisa di lo haci un declaracion pronto. Y nos di 2de y 1ste kamer lo drenta den dialogo cune,” e senador Hulandes a priminti.
En todo caso pa Edgard Vrolijk, e ta cla. Mayoria den Parlamento di Aruba ta contra e leynan di consenso. No ta sostene esakinan. Pues, e ta nifica cu Gobierno di Aruba lo mester drenta den otro fase di negociacion cu Hulanda pa e formulacion di e ley.
