Semper mi tabata sa cu algun dia mi lo bira mama. Mi rumannan a duna mi e suerte di bira tanta prome y for di e momento ey mi tabata sa cu un dia mi lo tin un yiu di mi mes. E soño tabata conoce e pareha ideal, compromete, casa, biaha y eventualmente haya un baby. Pero no semper tur cos ta bay manera cu ta plania.
A pesar di e circunstancianan, completamente diferente na mi bida soña, Dios a manda mi e bendicion di mas grandi den mi bida, mi prinses. For di momento cu mi a haya sa cu mi tabata sperando e prinses mas bunita, mi bida a cambia, algo cu mi ta kere ta e caso pa hopi mama. Ya mi no tabata ami so, pero nos tabata dos y mi necesidadnan a pasa bay na segundo luga, despues di e necesidadnan di mi prinses.
Na edad di 27 aña ariba un diabierna, 20 di januari 2018 pa 7:50 di mainta mi princess a yega mundo pa bolter e di pia te cabes. Despues di un proceso un poco complica di parto, e bataya a cuminsa.
Como mama primerisa e tabata hopi dificil pa encontra mi caminda, pa encontra ken mi ta y ken mi kier bira como mama pa mi yiu. Ayudo di mi famia y amigonan tabata infinito y sin nan mi no lo por a logra pasa e momentonan mas dificil di maternidad. Pero a pesar di esey, mi mester a siña con pa para riba mes, como mama independiente.
Prome cu mi a bira mama, mi tabata stiefmoeder caba. Un experiencia completamente diferente y uno hopi cu hopi mas reto. Pa cria y convivi cu un mucha cu no tin relacion directo, cu no ta bo yiu di sanger ta dificil. Tin liñanan cu mester respeta, di ambos banda y tin momentonan cu di berdad e sentimento pa give up ta asina grandi, pero no ta un opcion. Personalmente mi a siña di hopi erornan cu a wordo cometi na caminda y e ta un proceso di enseñansa ainda.
Aworaki felizmente mi por bisa cu mi ta sperando mi di dos baby, un sorpresa total pero un bendicion mas cu nos ta ricibi cu man y curason habri. Aworaki e reto lo ta pa siña nabega maternidad den e etapa nobo aki, pero manera mi mama semper a bisa mi, Dios sa pakico tur cos ta pasa y e tin e plan perfecto pa bo.
