Dia di mama ta un di e fechanan mas importante na hopi pais. E fecha caminda ta celebra y dedica tur amor y atencion na e ser femenino cu ta mama. Pa algun decada caba e fecha special aki ta wordo celebra, pero kico ta su historia, en realidad hopi no conoce.

Na mas di 40 pais rond di mundo dia di mama ta wordo celebra tur aña ariba e di dos diadomingo di luna di mei, entre cual ta inclui Brazil, Chile, Canada, Colombia, Ecuador, Italia y Venezuela, entre otro. Na algun pais e fecha pa celebra dia di mama ta diferente, por ehempel na Spaña esaki ta wordo celebra ariba e prome diadomingo di luna di mei, na Mexico esaki ta ariba dia 10 di mei tur aña y na Panama e celebracion ta tuma luga dia 8 di december.

E celebracion di dia di mama ta uno hopi antiguo y originalmente a cuminsa a Grecia, Roma y Egipto antiguo, pa e celebracionnan na honor di e diosanan di maternidad Rea, Isis y Cibeles. Ta te aña 1908, na Merca ora cu e activista Ann Marie Jarvis, inspira den e memoria di su mama y su gran labor, a lucha pa institui un dia specifico caminda lo honra y celebra e figura materno.

Ann Marie den su legislacionnan pa formalisa e dia a propone e di dos diadomingo di e luna di mei como e dia special pa celebra tur a mamanan na e pais. E celebracion aki tabatin como meta principal un dia dedica na e honor y respet di tur e figuranan materno di tur famia.

Despues di Jarvis su lucha durante 6 aña, na aña 1914 presidente Woddrow Wilson y e Congreso di Merca a declara como fiesta nacional e celebracion di dia di mama ariba e di dos diaomingo di luna di mei. Algun aña despues, mas di 40 pais rond di mundo tambe a cuminsa celebra e fiesta special aki.

Segun investigacionnan realisa, mientras mas aña tabata pasa mas e celebracion di dia di mama tabata perde importancia pa Jarvis, ken a a lucha fuertemente pa wak su soño bira realidad. E popularidad di e fecha a haci cu e fecha aki a bira un dia di puro show y benta pa e comerciantenan cu tabata probecha e fecha pa bende tur tipo di producto y regalonan pa e mama stima.

Jarvis, ken a pasa gran parti di su bida luchando pa oficialisa e fecha aki, a drenta den un proceso pa cancela e celebracion di dia di mama, pero no a logra. Su argumento pa su peticion di eliminacion di e celebracion aki tabata cu el a cuminsa cu dia di mama pa honra y respeta e trabou di tur mama, no pa e ta un dia pa gana placa for di dje.

Den actualidad dia di mama ta un di e celebracionnan mas grandi y e tradicionnan ta varia segun cada pais. Na Mexico, e mama ta ricibi serenata for di nan yiunan of grupo di mariachi cu ta canta e canticanan mas popular ariba e dia aki.

Na Peru, dia di mama ta un dia caminda nan ta recorda e mamanan cu ya no t’ey mas y e famia tradicionalmente ta reuni na santana pa pone flor y comparti cumindanan pa honra esnan cu no tey mas.

Dia di mama ta un fiesta nacional na Bolivia cu tin un significado historico hopi importante. Dia 27 di mei di 1812 un grupo di hende muhe a sacrifica nan mes na momento cu nan a enfrenta e ehercito Spaño den un intento pa logra e libertad di nan pais. E fecha aki ta wordo conmemora cu parada- y diferente homenahenan.

Aki na Aruba dia di mama tambe ta wordo celebra grandemente y generalmente e celebracion ta draai alrededor di cuminda, sea ta desayuno, dinner of e hopi popular “brunch”. Famianan ta reuni y ta celebra e dia aki den forma grandi y no por lubida e entrega di regalo pa demostra e amor y cariño cu tin pa e persona cu a duna nan bida.