AZV ta pidi comunidad pa pidi recibo ora haci di compra; Cu e campaña “Abo, bo a pidi bo recibo?”

Cu e obhetivo di conscientisa comunidad, ayera mainta AZV a convoca un conferencia di prensa pa asina trece dilanti un topico hopi importante, cual ta BAZV, den un campaña denomina “Abo, bo a pidi bo recibo?”.

Solange Tchong cu ta fungi como PR di AZV a señala cu loke nan kier ta pa conscientisa y informa riba e importancia di pidi recibo ora e persona ta cumpra un servicio of producto. Igualmente nan a mustra e prome di un serie di video cu nan ta bay cuminsa publica den proximo dianan cu diferente personahenan conoci pa comunidad pa trece dilanti e topico aki, cu ta trata di e recibo y aporte of contribucion di comunidad pa loke ta e fondo di AZV por medio di BAZV.

BZAV a wordo introduci na 2014 y tabata un forma pa yega y yuda contribui na e fondo di AZV, manera Tchong a sigura.

Di su parti, Janiro Eisden cantante conoci como “Ataniro” cu ta e persona cu a participa den e video a señala cu esaki ta pa conscientisa pueblo di Aruba pa tuma bo recibo, pa e wordo registra y asina por contribui nan e fondonan di AZV cu BAZV, “ta cosnan cu a mi no tabata sa, a mi mes no tabata tuma recibo pa comprasnan chikito of grandi”, e serie di videonan ta pa informa di manera consciente pakico mester tuma e recibo cu lo cual ta contribui na e fondonan di AZV.

E motibo di pakico AZV a dicidi di trece dilanti e campaña aki segun Tchong a informa ta cu nan a haya algun señalnan cu entre otro ta BAZV cu a contribui pero nan kier aumenta e aporte y minimalisa unda cu esaki no ta wordo haci, esey ta nifica cu door di e recomendacion y importancia di pidi e recibo comunidad ta haya sa cu e parti di BAZV lo mester wordo pasa e ora pa e fondo di AZV.

“Nos kier hisa e conscientisacion di esaki pasobra nos a ripara cu anteriormente e BAZV a yuda hopi manera boso sa for di 2014 ora el a wordo introduci, y toch nos ta kere sigur cu e lo yuda si na momento cu nos ta mas consciente pa cu e fondo AZV y tambe mirando tur e retonan cu nos tin nos dilanti, aworaki ta mas importante cu nunca pa nos por garantisa AZV”.

Tambe, el a informa cu paralelo na esaki nan tin e campaña “Ban reforma pa garantisa AZV” y parti di esaki ta trece tambe diferente cambionan cu ta bay tin na caminda y “ta hopi importante pa nos pone extra enfasis pa asina loke ta importante cu pa tur hende sa esaki no ta pa aseguradonan so di AZV ta contribui na fondo di AZV sino hasta tur nos bishitantenan y otro hende cu ta frecuenta nos isla” Tchong a menciona.

Asina mes, el a bisa cu tin hopi luga na Aruba cu ta entrega e recibo na momento di e compra di manera standard, pero tin otronan cu ta puntra si e cliente mester di e recibo.

E no ta na AZV ken ta encarga cu e tarea di retencion di e prima AZV ni BAZV, segun Tchong a destaca, esaki ta un tarea unda cu Departamento di Impuesto di Aruba ta haci esey pa nan y cu ta stipula den leynan, e berdad ta cu AZV a wak e necesidad den e sentido pa splica mas miho e importancia pa motibo cu nan tin un interes, esey ta e parti cu BAZV “aunke nos mes no ta esun cu ta reten’e esaki, si nos ta esunnan cu tin un interes na dje pasobra nos mester di esaki pa nos por garantisa y keda cumpli cu e pagonan pa cuido medico”.

Aunke esaki no ta regarda solamente BAZV pa motibo cu ta existi otro impuestonan, nan a tuma e parti di AZV cu pa nan, nan clientenan y comunidad den general e tin un balor y pa esey nan a ranca sali cu conscientisacion riba dje.

Aparte di e campaña “Ban reforma pa garantisa AZV” cu ta bin door di e lanspakett e tarea cu AZV a haya cu mester bay corta cu 60 miyon florin, den esey lo por tin cambionan cu a wordo papia caba segun Tchong a expresa y cu AZV ta tuma esaki como su tarea pa ta mas consciente pa cu e recomendacion di pidi e recibo “pasobra un bes bo pidie e transaccion ta valido”.

Tocante e landbijdrage y nan relato financiero di 2021, el a bisa cu otro siman dia 12 di mei nan lo haci un otro conferencia di prensa unda nan lo enfoca riba esey, Tchong a declara cu e cifranan di 2020 a mustra cu door di introduccion di BAZV desde 2014 e aporte di pais Aruba a baha unda cu esey tabata tambe un di e motibonan pa yuda cu mas entrada na e fondo pero tambe pa e aporte di Gobierno di Aruba disminui.

Cristina Rademaker a indica cu AZV ta haci nan presupuesto di kico nan mester y kico nan ta premira cu tin mester como aporte den caso di gobierno, gobierno di su parti a haci su presupuesto y den caso aki cu no a wordo teni full na cuenta cu full un aporte manera nan a indica pero ley tin e proceso pa durante e aña nan sigui wak con nan por yega na fondonan y tambe cu si nan yega na un tekort tin camindanan pa cana, pa loke den aña nan ta keda wak e procesonan di e gastonan y wak con nan ta maneha esey.