Yega na balans con pa maneha expectativa di bishitante y cuido di naturalesa ta un esfuerso cu mester haci. Esaki ta opinion di Director di Turismo Ronella Croes. Manera ta conoci, e asociacion di hotel y turismo di Aruba, AHATA recientemente a manda un serie di recomendacion pa Gobierno riba e tereno di watersports y con pa haci e actividad aki mas sigur pa tur hende cu ta haci uso di nan y di nos beachnan.
ATA ta comparti e punto di bista di AHATA, esta cu implementacion di ley ta locual lo yuda regula e situacion. Asina e Director di ATA, Ronella Croes a declara na Bon Dia Aruba.
Di otro banda, mester tene cuenta cu locual Aruba ta brinda na e bishitante. Pasobra no tin duda cu tanto deporte acuatico, botonan pero tambe e vehiculonan UTV ta ‘score’ halto cerca bishitantenan den e area di actividad.
“Nan tin nan luga den e producto Aruba. No por tin un experiencia di vacacion di Aruba sin e actividadnan aki.
Locual nos ta papia den contexto di UTV/ATVs si ta cu nos tin cu pone un limite riba e cantidad cu tin actualmente. Tin peligernan cu nan ta trece cune y mester pone un limite riba e tipo di servicio aki cu ta keda ofrece. Nos mester enfoca riba implementacion di ley y control den ambos area, pues watersports y UTV/ATV.
Den un conclusion corto, e punto aki ta keda un di e aspectonan hopi debil di Aruba. Sin cu mester punta dede riba organisacion of entidad, pasobra e falta di implementacion ta debi na scarsedad di trahadonan pa haci e control debido, scarsedad di material pa nan por traha cune y hasta scarsedad di ley adecuado. “Pues tin diferente limitacion eynan. E actividadnan aki tin nan derecho di existencia. Solamente nos mester cuminza pensa awor riba variacion riba tipo di oferta y actividad cu Aruba ta ofrece. E no mester ta necesariamente e mesun actividad cu tin caba.
“Mester pensa riba actividadnan cu ta complementa nos vision. Por ehempel, ATA ta trahando riba implementacion di rutanan di mountainbike. Esaki ta algo cu ta mas den liña cu actividad no-motorisa unda ta permiti pa conoce naturalesa miho, y por beneficia mas di esey. E ta un plus pa nos comunidad. Esey ta un ehempel di cambio di direccion, di ta un tiki diferente,” segun Ronella Croes.
Turismo como unico pilar ta carga hopi peso
Tur esaki ta ilustra un biaha mas e impacto di cualkier decision riba e unico pilar economico di Aruba cu ta turismo. Pa tal motibo mes, hasta pa industria turistico di Aruba mes, e ta importante cu tin un diversificacion economico, pa asina por brinda espacio pa adaptacion. “Den nos estudio di capacidad di carga tin un ‘roadmap’ kico ta e prioridadnan pa e siguiente añanan. Como e prome punto ta, cu mester diversifica nos economia.
Pasobra nos tarea principal ta pa influencia entrada principal di Aruba pa medio di cierto volumen di bishitante. Y di otro banda, influencia e cantidad cu nan ta gasta. Esey ta nos tarea. Pero nos sa tambe cu tin hopi limitacion. Djis pensa riba e aspecto di espacio fisico. Por construi te asina leu cu espacio ta permiti. Y nos tin nos retonan eynan caba. Kiermen nos ta boga pa pone hopi enfoke riba diversificacion economico.”
Pero denter di turismo mes tambe tin espacio pa diversificacion y ehempel ta variedad di actividad. “Aki por pensa tambe riba mas oferta di actividad cu ta enfoca riba bienestar, aspectonan cultural. Tur ta oportunidad cu nos a señala di por duna nos beneficio y ta den liña cu locual e turista ta buscando.” Pues diversificacion di economia ta importante pero tambe diversificacion di e sector turistico tambe ta keda importante, “realisando cu hopi area cu ta señala como potencial ta mara cu turismo pasobra nan mester conta riba turismo como un mercado.”
Mientrastanto, ATA ta memey di su di 32 conferencia anual di turismo, CATA, organisa den cooperacion cu AHATA y den oranan di mainta lo tin e apertura oficial na Renaissance Convention Center.
