Recientemente e problematica di autonan staciona ariba caminda publico a gara hopi atencion di comunidad como tambe di e instancianan concerni. Awe den un conferencia di prensa pa medionan di comunicacion local presente vocero di Bureau City Inspector, Robby Rosel, a anuncia un accion cu lo cuminsa na final di juni pa purba soluciona e problematica di autonan aki.

Rosel a splica cu no ta for di lunas, pero si no pa varios aña caba, for di aña 2019 cu nan a introduci e prome campaña pa conscientisa comunidad ariba e autonan bieu, autonan cu ta para banda di caminda y riba caminda, autonan cu no ta para riba un parking space y no ta para ariba un espacio di parkeo publico, pero ta para ariba caminda unda cu auto mester mobilisa.

Esaki ta un di e situacionnan mas alarmante, Rosel a indica, cu aña aden aña afo e autonan aki ta keda para. Bisiñanan ta reclama cu tin autonan para dilanti di nan cas y el a subraya cu nan tin varios aña caba hibando e situacion aki y p’esey nan ta den preparacion pa tene un accion pa purba soluciona e problema aki.

“Aworaki mes nos ta den preparacion pa fin di juni nos cuminsa cu un campaña caminda nos lo ta bay ta kitando e autonan aki for di caminda. Nos ta pidi cada un di e conciudadanonan pa por fabor hinca nan auto den nan cura y si nan no tin cura, bende of haci algo cune. Evita e boet pasobra e boet lo ta halto”, Rosel a señala.

Rosel a sigui splica cu nan ta den preparacion pa asina fin di juni nan cuminsa cu un accion completo di bario pa bario pa purba elimina e autonan aki pasobra tin hopi auto para riba caminda.

E accion aki lo wordo realisa conhuntamente cu Cuerpo Policial y el a remarca cu e prome stap cu nan ta bay tuma ta wak, si den caso cu e auto tin number di auto, si e number di auto ta paga. Si e number di auto ta paga e auto por ta staciona pero pa cierto tempo, no pa 24 ora, solamente pa un rato segun e regla di trafico, pero esey lo keda den man di Cuerpo Policial pa dicidi kico lo tuma luga den e casonan asina.

“Nos ta bay check keuringskaart, nos ta bay check number di auto y seguro, lo bay check si e auto ta den estado pa ta riba caminda y si eseynan ta cumpli nan lo mester hinca e auto den cura di nan cas caminda cu e auto mester ta, no ariba caminda publico ni tampoco ariba caminda cu auto mester core”, Rosel a enfatisa.

Legalmente e problematica ta cay bao di Cuerpo Policial, pero Rosel a subraya cu Bureau City inspector ta duna un man tambe y brinda ayudo na cuerpo policial pa realisa e accion aki trahando den un solo ekipo.

Doñonan di autonan staciona ariba caminda of caminda cu nan no mester ta staciona tin te fin di juni, dia 30 di juni, ta ultimo dia pa e doño por kita e auto for di camindanan publico, for di terenonan publico, for di ariba acera, for di ariba caminda cu auto ta core, pa asina nan por evita e boet y tambe evita di perde nan auto.

“Nos ta pidi encarecidamente pa nan cuminsa prepara, tin un luna y tres siman di tempo pa cuminsa prepara pasobra City Inspector conhuntamente cu cuerpo policial lo bay sali riba caya pa cuminsa bario pa bario pa elimina tur locual ta e autonan aki. Y si bo kier keda cu bo cacharaca bieu, hinke paden di bo cura asina niun hende no por bisa bo nada”, el a indica.

Durante e conferencia Rosel a bolbe trece pa dilanti e problema di sushedad ariba caminda. El a splica cu awe mainta nan a ricibi yamada cu a drenta relaciona cu sushedad ariba full e caminda di dump bay ariba. Y den San Nicolas, el a menciona, tambe bastante melding di sushi cu ta wordo entrega. “Nos ta pidi comunidad un biaha mas ban traha, ban trata di mantene Aruba limpi”, el a bisa,

“Nos ta compronde e situacion di Serlimar, pero nos di City Inspector ta man mara, nos no por haci mucho cos, pero nos ta trata di evita e tiramento di sushi ariba caya”, el a agrega.

Rosel a remarca cu e mes a manda carta tanto pa secretaria como pa e director di Serlimar pa avisa pa habri DOW aunke sea riba un diadomingo of pa pone bakinan den bario caminda e hendenan por haci uso di esakinan pa tira e sushinan aden. “No mester manda hende busca e baki e mesun dia, bo ta pone un baki den cada districto y dialuna mainta cu habri durante ora di trabao normal, ta manda hende bay busca e baki y asina nos tur hunto, Aruba completo ta contribui pa mantene Aruba limpi”, Rosel a enfatisa.

Por ultimo, Rosel a subraya cu e trabao di Bureau City Inspector den e parti di medio ambiente ta pa controla tur locual ta sushedad cu ta wordo tira riba caya y camindanan publico. Tambe e autonan bandona, cu no tin nummerplaat y el a enfatisa cu mester tene bon cuenta cu si e auto tin nummerplaat e mester tin seguro y keuringskaart, esey ta e tres documentonan necesario pa Cuerpo Policial no bay cu e auto.

“Nos ta coopera cu Cuerpo Policial y si nos haya un auto cu no ta adecuado nos ta geef e door na polis y e resto di trabao ta keda automaticamente den man di polis”, el a finalisa.