(AP) – Durante e 2 simannan recien e miembronan mas prominente di e famia Kardashian tabata na corte pa un demanda cu Blac Chyna a pone den nan contra.

Blac Chyna a demanda e famia den aña 2017 despues di su separacion di Rob Kardashian. Originalmente el a acusa cu 6 di e famia Kardashian a difama su persona pa medio di conta cu el a fisicamente abusa di Rob Kardashian, y a interferi cu su contract pa medio di convence E! Network di cancela su programa “Rob & Chyna”, cual tabata un version di e serie “Keeping Up With the Kardashians.” El a pidi 108 miyon dollar den daño.

Durante e dos aña cu el a tuma pa e caso yega huicio, Kourtney Kardashian y Kendall Jenner a ser saca for di e demanda.

Kris Jenner su dos dia riba e podium a provee drama ora cu el a testigua cu e tabatin miedo cu Chyna tabata bay “mata” su yiu homber den 2016. El a cuminsa yora ora cu el a cuminsa describi cu e tabata sinti vulnerabel caba pa motibo cu e incidente di robo na Paris di cual Kim tabata victima, a pasa recien den e tempo aki.

Rob Kardashian, ken a presenta solamente pa testigua, tambe tabatin un momento dramatico y emocional riba e podium, den cual el a bisa cu den dos instancia Chyna a punta un arma na su cabes, y a bati su persona cu un tubo di metal.

Chyna a testigua cu e nunca tabata violento den su contra, y a bisa cu el a punta e arma como chiste, y tambe tabata haciendo chiste na momento cu el a lora un cable di telefon rond di Rob su neck. El admiti si cu efectivamente el a kibra un television y algun otro cos den su rabia.

E testimonio di e otro acusadonan no tabata nada di importancia, aunke si e hues a descarta Kim Kardashian como acusado den e parti di difamacion den e caso pa motibo cu e no a mira ningun declaracion cu ta difamatorio ni den violacion di algun ley.

Dialuna e hues a duna e veredicto den cual a declara e acusadonan Kim Kardashian, Kris Jenner, Khloe Kardashian y Kylie Jenner victorioso den e demanda.

E Hurado aparentemente no a considera cu e storia di e Kardashian nan a convence nan, sinembargo nan a bisa si cu nan ta kere cu den varios ocasion nan a actua cu mala fe y no tabatin hustificacion pa loke nan a bisa e ehecutivonan pero esaki no tabatin ningun tipo di efecto riba Chyna su carera riba television ni e destino di su mesun programa.

Abogadonan di Chyna a bisa cu nan lo apela e veredicto, y cu un set di acusacion contra solamente Rob Kardashian lo ser scucha na otro huicio cu lo tuma luga den mas o menos 1 siman.