Fin di siman ultimo comunidad di Noord a haya e tristo noticia cu un persona conoci den area a dicidi kita su bida, pa motibo di privacidad Bon Dia Aruba no lo menciona e nomber di e fayecido pero ta importante pa trece dilanti esaki di un manera responsabel cu e obhetivo di informa cu e acto aki lastimamente ta bin tumando luga di un manera mas continuo na Aruba.
E motibonan cu a conduci cu e persona aki a tuma e decision ey no ta conoci pa e redactor, e por ta e consecuencia di e suma di varios factor determinante di tipo social, cultural of biologico.
Den actualidad, segun varios investigacion realisa cu atencion clinico di pashentnan cu trastorno pa comportacion suicida ta uni e termino proceso suicida, e cual ta consisti den fasenan cu diferente nivel di gravedad, e proceso aki ta construi e trama di e historia di e persona, na unda tres pregunta ta guia su pensamento: con, ki dia y na unda.
E fasenan nombra anteriormente ta cuminsa cu e dificultad di soluciona e problemanan di e bida diario y pa algun biaha ta caba na suicidio, e fasenan ta:
Acumulacion di problemanan si resolve;
Acumulacion di conflictonan;
Crisis;
Pensamento negativo;
Idea suicida;
Crisis pa purba mata su mes;
Suicidio.
Na mundo tin miles di hende cu tin un lucha interno, un lucha cu aunke nan tin cu bring’e pa por sobrevivi, tin algun di nan cu no ta logra caba cune, depresion ta un topico hopi delicado cu mester bin dilanti pa motibo cu casonan di suicidio na Aruba ta tumando luga pa algun tempo caba. Ta normal cu un persona tin sentimentonan temporal di tristesa, pero si e sintoma ey ta dura mas cu dos siman ta posibel cu ta trata di depresion, esaki ta afecta su capacidad pa sigui cu su bida diario, pa disfruta di famia, amigonan y momentonan di diversion.
E causa exacto di depresion no ta conoci, e por wordo causa pa via di combinacion di factornan como genetico, biologico, ambiental y psicologico, e probabilidadnan cu un persona por sufri di depresion ta pa motibo di: si tabatin algun familiar cu a sufri di depresion, si e persona a sufri algun trauma of stress como abuso fisico of sexual, ora un ser keri a muri of tambe por ta pa via di problemanan financiero, ora haya problema medico of pa consumo di alcohol of droga.
Efectonan di depresion den salud ta bay hopi mas leu cu estado di animo, ta un malesa medico grave cu hopi sintoma, incluyendo fisico unda e persona tin:
– Sentimento di tristesa, ansiedad of un bashi interno constante;
– Sinti desesperacion of pesimismo;
– Tin sentimento di culpa, falta di autoestima y impotencia;
– Perde interes of placer pa haci actividadnan diario of hobby;
– Ta sinti sin energia;
– Tin dificultad di concentracion, corda di detayenan of tuma decisionnan;
– Tin problemanan pa drumi, incluyendo lanta hopi trempan mainta of drumi hopi;
– Ta cambia habito di cuminda y subi di peso;
– Ta sinti dolornan di cabes, problemanan digestivo sin un causa fisico y cu no ta alivia cu tratamento;
– Ta haya pensamento di mata su mes of purba di kita su bida.
Durante un entrevista cu Bon Dia Aruba a tene cu Dimitri Halley algun lunanan pasa ta importante pa menciona cu depresion ta un manifestacion di un problema mas profundo, e por bin for di perde un persona stima, di abuso, di sufri violencia, entre otro.
“E problema ta cu nos no tin cu sconde e depresion y sentimentonan, mas bo ta scond’e mas fuerte e ta bira”, Halley a señala.
Di mesun manera, Halley a comenta cu e manera di bin trece e depresion of e tipo di casonan asina riba nivel di cuido mental nacional ta fout, pa motibo cu comunidad no ta wak e cos aki manera mester ta, ora un hende cu ta sufri depresion of trauma y tin un bida full reprimi y e ta expresa su sentimentonan e no ta bay haci’e di un manera bunita, tin e tendencia di tapa e sentimentonan y tapa e depresion hasta cu droga psikiatrico.
Salud Mental na Aruba ta bin sufriendo un carencia importante di recurso for di algun añanan caba, pero pandemia a haci’e mas evidente. Pa aña 2022, e aparicion di otro olanan di Covid-19 cu ya caba ta tumando luga na otro paisnan lo por pone e situacion mas pio ainda.
E poblacion a ser ilusiona cu e supuesto buelta na ‘normalidad’ y awor ta padece un periodo di desilusion depresivo y cu angustia, e desaroyo psicologico di muchanan y adolescente por wordo altera cu paso di tempo, na unda ta traduci den mas trastorno di conducta y di auto-control, hende grandi por sufri mas di depresion y e recursonan sanitario cu tabata existi pa pashentnan cu trastorno mental lo por wordo collapse, loke por aumenta ainda mas e frustracion y molestia di e poblacion.
E reto di aña 2022 ta implica pa wak salud mental di e hendenan di manera directo y cu compromiso.
Mester enfrenta di forma serio, e reto autentico pa loke ta trata salud mental: normalisa y acepta e causanan y efectonan cu tin rond di dje, loke na final di dia lo por traduci e fin di discriminacion social y lo aporta recursonan cu e tratamentonan cu tin mester.
Un prome transformacion ta e parti social, e sociedad den general no ta acepta bon e malesanan mental ni e personanan cu ta sufri di dje, empresarionan ta preferi di no duna nan trabao, compañero di trabao ta mira nan diferente, bisiñanan ta wak cu miedo y studiantenan ta haci ‘bullying’.
Algun medionan di comunicacion na nivel mundial ta corda riba nan ora un delincuente tin un malesa mental, ta p’esey cu personanan ta sconde nan depresion y nan ansiedad.
