(Infobae) – Ex-presidente di Colombia Alvaro Uribe, diadomingo ultimo a cuestiona e decision di Husticia cu a nenga di cera su caso pa presunto soborno y manipulacion di testigonan cu a cambia su bida pa e caminda di un huicio.
“Tin evidencianan cu ta indica cu a mi nunca a ordena busca testigonan sin verifica informacion cu tabata yega na mi. Cu hamas mi a tuma iniciativa di ofrece un beneficio, ni a pasa den mi mente pidi pa nan gana of sconde e berdad. Cu no ta berdad cu a pretende gana e husticia”, Uribe a bisa den un declaracion virtual for di su hacienda na e parti nort di e pais.
Diaranson ultimo un hues a rechasa e peticion di Fiscalia pa cera e caso cu ta involucra e ex-mandatario y ex-senador di 69 aña.
E decision di prome instancia lo por wordo apela pa defensa di Uribe, ken a goberna entre 2002 y 2010 cu un politica di siguridad di man duro contra guerrilla iskierdista.
E peso politico y popularidad di e ex-mandatario -hefe di partido na poder y mentor di e presidente actual Ivan Duque- ta haci cu su caso ta transcende den ambito huridico y mas ainda ora ta falta un luna pa eleccionnan presidencial di 29 di mei.
Si finalmente tribunal superior ta haya e sentencia di e hues, Uribe lo mester bay huicio y eventualmente lo por wordo condena na prison pa dos delito den relacion cu soborno y fraude procesal, cu na Colombia ta wordo castiga cu ocho aña di prison.
Uribe a rechasa e argumentonan di e hues y a bisa cu “mi no ta estafador manera carga ideologico opositor kier pa pensa”.
“Den memey di dificultadnan mi lo sigui cu mi version riba e proceso aki cu a contribui na e expropiacion di mi reputacion inhustamente”.
