Pendiente extension di opcion pa scolnan Reina Beatrix y Juliana
Ta berdad cu Xavier Real Estate no tin opcion riba scolnan Juliana y Beatrix. Y ta berdad cu DIP na e momentonan aki no ta considera cu a duna opcion pa e dos scolnan aki. Pero esey no ta kita afo cu si no yega na resolucion, cu esnan cu si a haya opcion na Juli 2021, lo entama un caso contra Director di DIP dr. Haime Croes. Ta trata di AUSOMA International Education Center VBA, cu ta manehando e American University School of Medicine na Aruba.
Asina su Director Kanaan Baroud a bisa Bon Dia Aruba. Sr. Baroud a splica cu Xavier Real Estate ta e compania cu ta encarga cu e aspecto logistico di e proyecto. AUSOMA a cuminza opera na Aruba na 2018 cu e Universidad di medicina na Aruba. E compania ta e entidad tambe cu a haya luz berde den Parlamento pa pidi opcion riba e dos scolnan pa asina converti nan den un centro di educacion multifacetico. Y ta a base di e decision di Parlamento cu a sostene e pensamento di e tempo ey Minister di Enseñansa dr. Rudy Lampe pa e dos scolnan aki bira un centro educativo internacional, a haya e opcion di DIP. Un opcion cu a termina na Januari 2022.
Y aki ta unda tin e disputa. Pasobra a pesar di a cumpli cu e condicionnan cu DIP a pone riba papel, pa un of otro motibo apenas un luna y mey pasa, Dr. Croes a informa Sr. Baroud cu pa motibo di no a cumpli cu tur rekisito, e opcion a vence. Otro cu e notificacion aki no tabatin mas comunicacion di parti di DIP cu no a responde na ningun di e preguntanan di Baroud, ni riba e peticion pa extension di e opcion.
Mientrastanto, Ausoma a inverti miles den e plannan pa e dos scolnan, cu e vision pa inverti como 10 miyon den e AUSOMA Education Center. Kanaan Baroud a bisa cu e forma di trata di DIP ta contra interes di pais Aruba, contra interes di AUSOMA y consecuentemente, si no bin cambio, no lo keda otro opcion cu bay Corte.
Bon Dia Aruba lo amplia riba e combersacion cu sr. Baroud den nos proximo edicion.
