Fraccionnan di MAS y Accion21 ta opina cu leynan lo yuda Aruba reforma di berdad
Discusion riba e ley di consenso di Reino COHO y e RAft (Rijkswet Aruba Financieel Toezicht) a trece MEP, AVP y RAIZ hunto. E tres fraccionnan aki ta contra e proposicionnan di ley di consenso di Reino, ya cu nan ta opina cu e proposicion ta mina autonomia di Aruba, particularmente e derecho di presupuesto di Parlamento, esta e asina yama Budgetrecht.
Esaki a bin dilanti durante un reunion cera di Parlamento ayera, un reunion cu no tabata secreto pero cu pa un of otro motibo Presidente di Parlamento Edgard Vrolijk a dicidi pa publico no presencia esaki. E reunion tabata pa fraccionnan duna nan opinion riba e dos conceptonan di ley di consenso di Reino cu ta parti di e condicion pa Aruba a haya sosten di likides for di Hulanda. E dos leynan aki lo keda discuti otro siman na St. Maarten y Parlamento di Corsou a fiha su posicion cu ta bay rechasa e dos leynan manera con nan ta.
Di parti di fraccion di AVP, dr. Ryçond Santos do Nascimento a splica cu e fraccion no por bay de acuerdo cu leynan di consenso di Reino cu ta mina Statuut y autonomia di Aruba. “Ley di COHO no ta reconoce e esencia di democracia y autonomia di comunidad. Ademas, e ley di COHO ta basa riba un narativa cu Gobiernonan a haci desaster so desde Status Aparte, cu no ta berdad.” Segun Santos do Nascimento, e maneho di Gobiernonan a yuda Aruba crece economicamente, danki na turismo, cu a pone cu e calidad y nivel di bida di Arubianonan ta un di e mas haltonan den region. Den pensamento di fraccion di AVP, Hulanda no mester impone sino yega na colaboracion basa riba interesnan special di Aruba como un Small Island Developing State, SIDS, pa cual por yega na areglonan cu ta na bienestar di ambos. Aki AVP ta boga pa status di UPG, cu por brinda oportunidad. AVP ta kere cu Aruba mes por implementa e pasonan necesario pa su pais.
Segun informacion di otro miembronan den e reunion, fraccion di MEP a bisa cu nan ta pro e reformanan pero no basa riba e leynan di consenso di Reino.
“Nos a campaña cu nos lo implementa e landspakket. Pues, a yega ora cu por fin por introduci e reformanan cu tur hende tin hopi tempo ta papia di dje, pero pa motibo populista tin miedo pa implementa,” ta locual lider di MAS drs. Marisol Lopez a bisa Bon Dia Aruba. Tur Gobierno y Parlamento cu Aruba tabatin mester a trece reformanan, pero nunca tabatin e curashi politico pa haci locual ta necesario. Como tal e dos leynan lo yuda Aruba cumpli cu e reformanan.
Miguel Mansur a bisa cu un di e argumentonan di RAIZ contra e leynan di consenso di Reino ta cu ta limita e poder di Parlamento riba presupuesto di Pais Aruba. Y e ta de acuerdo cu esey lo ta e caso. Pero asina mes, Mansur ta kere cu e leynan ta na nan luga. “Den 35 aña di Status Aparte, no tin un biaha cu Parlamento no a para un presupuesto. Pues ta lamenta e perdida di e budgetrecht, pero no tin ningun ehempel cu Parlamento a yega di haci uso di dje.” Mansur a bisa cu tur por yora cuanto cu kier, pero Aruba ta e pais mas endeuda den henter continente Mericano y Caribe “y esey ta pasobra Parlamento no a haci uso di su budgetrecht. Nos tarea primordialmente ta controla Gobierno y esey no ta cambia. Locual e leynan di consenso di Reino ta trece ta normanan cuanto por gasta of no. Ta normanan cu ta conta pa Hulanda como parti di Union Europeo tambe.”
Segun Mansur y Lopez, Presidente di Parlamento Edgard Vrolijk tabata kier a bin cu un documento cu opinion di tur fraccion pero lidernan di fraccion di MEP y RAIZ no tabata kier esaki. Bon Dia Aruba a tuma contacto cu lider di fraccion di MEP drs. Shailiny Tromp Lee y lider di fraccion di RAIZ, Misha Raymond y a pesar di e laga respondi no a haya ningun reaccion riba locual ta nan posicion riba e proposicionnan di leynan di consenso di Reino.
