(CuraçaoChronicle) – Un delegacion di diesun miembro di Eerste y Tweede Kamer di Parlamento Hulandes ta bay participa den e Consulta Interparlamentario di Reino, IPKO, na Sint Maarten for di diaranson 4 di mei te diabierna 6 di mei.

E delegacion Hulandes ta bay yega Sint Maarten mañan diadomingo. E delegacion ta bishita Saba riba dia 2 di mei, y Sint Eustatius dia 3 di mei. E apertura oficial di IPKO ta bay tuma lugar riba diaranson mainta, y e clausura riba diabierna nochi, sigui pa un conferencia di prensa.

Durante IPKO, delegacionnan di parlamentonan di Aruba, Corsou, Sint Maarten y Hulanda ta bay discuti temanan cu ta relevante na e paisnan den Reino Hulandes.
E IPKO ta un structura di consulta di e cuatro parlamento di Reino, cual ta tuma lugar dos biaha pa aña. E proximo IPKO na Sint Maarten tabata planea originalmente pa januari di e aña aki, pero mester a keda posponi te mei 2022 pa motibo di e pandemia di Covid-19.

Riba agenda pa e IPKO tin combersacionnan tocante consensusrijkswet pa establece e Organo Caribense di Reforma y Desaroyo (COHO), e status di asuntonan relaciona cu ehecucion di landspakketnan, y construccion di relacionnan miho y mas sostenible dentro di reino.

Como parti di e punto di agenda di relacionnan di reino, e delegacionnan ta bay discuti colaboracion y asistencia mutuo, derechonan humano, bon gobernacion, leynan di consenso di reino, duna mas prioridad na relacionnan di reino, y establecimento di Regulacion di Disputa (geschillenregeling) pa Reino.

Parlamento di Corsou unanimamente a adopta un mocion e siman aki, den cual a solicita gobierno di Corsou pa ‘continua e caminda di renegociacion cu e otro gobiernonan di reino’ pa loke ta trata e propuesta di ley di COHO.

Parlamentarionan di Corsou ta bay acerca nan coleganan di Aruba y Sint Maarten pa hunto formula y entrega amiendanan na e propuesta di ley.
Segun Parlamento di Corsou, e minister Hulandes di Asuntonan Interno y Relacionnan di Reino tin demasiado poder den COHO. Ademas, Parlamento a haya cu e inversionnan financiero cu Hulanda a priminti pa duna asistencia na e desaroyo social y economico di e isla no a wordo haci suficientemente concreto den e propuesta di ley. Ta spera cu ta bay tin discusionnan intenso riba COHO durante IPKO.

Durante e IPKO, ta bay tin un cantidad di bishita di trabao, organisa pa parlamento di Sint Maarten. E bishitanan aki ta bay enfoca riba un cantidad di proyectonan di reconstruccion inicia despues di e horcannan na 2017, cu fondonan Hulandes.

E delegacionnan tambe ta bay bishita e prison Pointe Blanche. Minister di Husticia di Sint Maarten, Anna Richardson, ta bay duna un presentacion tocante e sistema di prison y e plannan pa (re)construccion y mehoracion di e prison.

Prome cu e IPKO, e delegacion di Parlamento Hulandes ta bay bishita Saba y Sint Eustatius riba dianan 2 y 3 di mei. Topiconan clave ta bay ta hoben y profesionalnan hoben, desaroyo economico, infrastructura y desaroyo sostenible. Ta bay organisa un encuentro ‘meet and greet’.

E delegacion Hulandes ta bay consisti di senadornan Paul Rosenmöller (GroenLinks), Joop Atsma (CDA), Toine Beukering (Group Nanninga), Boris Dittrich (D66) y Peter Ester (ChristenUnie); y miembronan di Tweede Kamer, Mariëlle Paul (VVD), Roelien Kamminga (VVD), Jorien Wuite (D66), Joba van den Berg (CDA), Don Ceder (ChristenUnie) y Liane den Haan (Group Den Haan). Mariëlle Paul ta lider di e delegacion, y Paul Rosenmoller e lider interino di e delegacion.

Riba potret: Edicionnan anterior di IPKO.