(NLTimes) – Aerolinea Hulandes KLM lo cancela por lo menos 47 vuelo cu tin den plan pa diasabra y diadomingo pa causa di e gran cantidad di persona inespera na aeropuerto Schiphol. E aerolinea anteriormente a cancela salidanan y yegada di 28 vuelo riba diabierna. Cu e cancelacion nobo, KLM ta spera di por mantene ambos e cantidad di persona na aeropuerto y e cantidad di trabao riba nan empleadonan.

Despues di cu e ultimo ronda di vuelonan a keda cancela pa e weekend, e aerolinea a bisa diabierna atardi cu e no ta spera mas cancelacion, aunke e no ta descarta e posibilidad. KLM ta haciendo yamado na pasaheronan pa yega aeropuerto cu hopi tempo pa check in, pasa door di siguridad y procedura di controla paspoort.

Anteriormente e aeropuerto a pidi pa aerolineanan yuda reduci e presion di e fin di siman. Aerolineanan a responde na e yamado aki pa medio di cancela vuelo, cambia e biahe pa pasaheronan, y reloca cierto vuelo na Rotterdam Den Haag Airport, segun vocero di Schiphol. E aeropuerto den e area di Amsterdam a bisa riba diabierna cu nan a baha e cantidad di pasahero cu lo bini den e dianan proximo pa causa di e cambionan.

Algun aerolinea te ainda ta investigando cua vuelonan por ser cambia, sinembargo Schiphol su meta di tin 3,500 menos pasahero na aeropuerto riba diasabra ta “casi un realidad,” e vocero a conta. Pasaheronan te ainda mester tuma na cuenta e cantidad di persona y tempo cu lo mester warda.

Empleadonan di KLM a manifesta fin di siman pasa pa causa di frustracion cu e gran cantidad di trabao cu nan ta enfrentando. Como resultado di esaki, decenas di vuelo a keda cancela y varios maleta no a yega na vuelonan cu a usa e aeropuerto. Empleadonan tambe tabatin miedo di perde nan trabao pa motibo cu KLM anteriormente a bisa nan kier traha mas cu companianan externo na luga di ofrece siguridad di trabao na su empleadonan existente.

Mientrastanto, ya caba maneho di KLM a cuminsa cu dialogo cu e representantenan di e empleadonan di e compania tocante e presion di trabao. Tin mas dialogo cu unionnan di labor den plan.

Algun di e problemanan na Schiphol tambe ta causa pa mantenemento. Conhuntamente cu un direccion di biento cu no ta faborabel, a causa mas interupcion den e vuelonan.