Secretario di Estado ta encurasha Anouk Balentina pa sigui su lucha, pero cu e dump ta un asunto di Aruba

“Mi a spanta pa e condicionnan rond di Parkietenbos y mi a papia cu Prome Minister Evelyn Wever Croes riba dje,” tabata contesta di Secretario di Estado di Reino Alexandra van Huffelen den su carta dirigi na mr. Anouk Balentina.

E contesta tabata riba un e-mail cu e activista a manda entre otro pa Gobierno Hulandes, pa medio di e Secretario di Estado. Balentina a manda e e-mail cu el a titula ‘desespero’ pa Ministernan na Aruba, entre otro Prome Minister Evelyn Wever Croes, Minister Ursell Arends, Directornan di entidadnan publico encarga cu maneho di sushi y medio ambiente, pero tambe pa Secretario di Estado Sra. Van Huffelen.

El a yama atencion pa e hecho cu “primeramente e incinerator na Parkietenbos ta sigui opera contra ley. Nos ta biba den un estado di derecho y nos tin varios leynan cu no ta respeta, entre otro e ley di Desaroyo Teritorial, e LRO.” Esaki pa motibo cu e incinerador cu ta activo riba tereno di dump na Parkietenbos ta contra e ROPV, esta e Ley di Ordenanza Teritorial cu Regla.

“Tur e dianan aki e biento ta bira y ta subi direccion di e isla, cu consecuencia cu e huma ta bin directamente den mi cas y henter siman nos ta bou di huma y mi tin dos mucha cu asma cu ta bira hopi malo di e huma aki. A pesar di varios keho, denuncia, cartanan, yamada na instancianan, no ta duna oido na e situacion cual ta causando un desesperacion inmenso.”

Balentina a sigui bisa cu den fin di siman mientras cu tur hende sa cu departamentonan encarga cu supervision manera Direccion Naturalesa y Medioambiente, DNM, no ta accesibel ta sigui opera e incinerador y e ta saca un holor hopi fuerte cu ta haci nos hopi malo. Mi mes y otro personanan a bay na sitio y a constata esaki, e bandera cora tambe ta poni segun e condicionnan cual ta e prueba cu e incinerator ta operando.”

Famia malo

Den su e-mail, mr. Balentina a enfatisa e impacto riba su famia. “E huma procedente di e incinerador ta afectando salud di varios hende, incluso mi tata cu ta hende grandi, tambe ta hopi malo di e huma. Nos ta haya hopi nausea, dolor di cabes, wowo ta kima, dolor den pecho pa hala rosea, tos, cuero ta grawata. Nos ta hayando medicamentonan di dokter pa por hala rosea pero nos no por keda sufri asina aki mas. Pa resto di dia nos no por funciona paso nos ta keda sinti malo di e huma, e daño ta haci caba.  Nos ta biba manera den un campo di concentracion y no ta respeta leynan corda pa enforsa nan.”

Como tal, Anouk Balentina a bisa den su carta cu el a pidi tur esnan encarga pa haci lo necesario pa proteha salud di henter un bario, para un situacion ilegal y haci e investigacionnan necesario. “No por sigui permiti cu DOW/Caribbean Trucking Company ta sigui viola e condicionnan di e permiso y opera contra ley LRO. Segun e permiso di molester, no ta permiti di opera mientras e biento ta direccion tera. Ademas, ta den espera di sentencia den LAR di dia 4 di mei 2022 den cual mi a indica na hues cu e incinerador ta contra nos LRO/ ROPV na e sitio aki. Nos ta sufriendo hopi daño pa e falta di incumplimento y mi ta suplica pa por fabor considera nos bida, salud y trankilidad tambe.  No por warda riba morto pa cumpli cu obligacion di implementacion di ley,” ta locual e activista a bisa.

Articulo 3.5.14 di e ROPV ta papia di e parti west di e tereno industrial Barcadera cu ta yega na e bario di Parkietenbos. Cu bista riba e clima di biba den e bario aki, a tuma un zona di 200 meter hancho den e mapa y eynan no ta permiti ningun actividad cu por crea molester pa e area. Esey ta nifica cu unicamente ta permiti actividadnan cu no ta yega mas leu cu su propio tereno. Pa mr. Balentina, e palabranan ta hopi cla. Huma, holo stinki, molester di musca y emisionnan ta crusa e tereno di e incinerador cu ta nifica cu e no por ta ubica riba e dump y e permiso a keda duna di forma ilegal. Ademas, segun articulo 22 di e Bouw en Woningverordening, no por a duna permiso pa un incinerador, un edificio, un tanki di diesel y pipa pa saca huma. Tur esakinan a keda presenta dilanti hues administrativo, cu mester duna su sentencia dia 4 di Mei proximo.

Van Huffelen kier accion rapido di Aruba

Secretario di Estado van Huffelen a gradici pa e e-mail y ta expresa aprecio pa e forma con mr. Balentina ta bringando pa e derechonan fundamental cu ta keda afecta pa molester di dump, y cu e mes a spanta pa e condicionnan, pa cual motibo a discuti e situacion cu Prome Minister Evelyn Wever Croes. “Maneha y procesa desperdicio na un forma responsabel sinembargo ta responsabilidad di pais autonomo, Aruba. Como tal ta Gobierno di Aruba pa reacciona riba e grito di desespero. Sinembargo, den mi combersacionnan cu Gobernantenan di Aruba lo mi sigui trece e punto aki dilanti,” Van Huffelen a priminti. “Un ambiente di biba saludabel ta di balor pa tur hende den Reino y mi ta dispuesto pa duna mi banda.”

E mandatario Hulandes a conseha mr. Balentina pa sigui presenta su preocupacion na Gobierno di Aruba y cana tur e camindanan legal posibel. Banda di esey, el a urgi mr. Balentina pa keda tene Representacion di Hulanda na altura di tur e desaroyonan rond di Parkietenbos. “Mi ta desea bo hopi forsa den e proceso pa yega na mehoracion y ta spera di un accion rapido di parti di Gobierno di Aruba.”

DNM

Na 2016, Director di DNM, Gisbert Boekhoudt ta bisa cu un instalacion di kima sushi ta trece un diferente tipo di polucion cual ta dañino y riba dje nan no tin ekipo pa midi esaki na Aruba. E declaracion aki tabata riba e proyecto di gas pa WEB, cu Eco Gas lo mester tabata encarga cune. Pero hecho ta cu no tabatin ekipo pa midi emisionnan cu ta plama den e bario. Sinembargo, na 2016, drs. Boekhoudt tabata preocupa pa emisionnan cu por afecta e habitantenan cu tabata biba cerca di Eco Gas. “Unabes cu kima, e gasnan ta bay den laira anto esaki tin su efecto. Mas completo e kimamento ta, menos polucion bo tin anto e gasnan cu ta genera ta depende na kico ta kima. Con largo e candela ta keda y e temperatura di dje, si e ta bao presion si of no, tambe ta diferente factornan cu ta percura pa e kimamento bay mas bon y completo. Pa e gasnan cu ta sali for di e pipanan por ehempel, tin un aparato cu bo por instala den dje pa filter y purifica e aire cual ta yuda.” Sushi en general ta algo hopi mixto cu tin diferente cosnan aden pues ta conoci segun DNM cu net e gasnan aki tin diferente substancianan cu ta dañino. “Ta conoci cu un instalacion di kima sushi ta genera un diferente tipo di polucion pero mester midi e emision pa por determina kico nan ta y ki concentracion. DNM no tin ekiponan pa por haci e tipo di trabao aki anto lo mester busca hende for di exterior pa por haci e. E hendenan cu a studia den ramo di medio ambiente por haci e trabao aki. Si nos ta bay haci e standarisa manera den pasado cu nos tabata tin intencion pa haci e pa e refineria, e ora bo ta instala ekipo di monitor pa haci e standarisa. Pero si bo haci no structural, ta mas miho pa bo cumpra e servicio na luga di tin e ekiponan permanente aden. E gastonan y e inversion ta diferente.”

Na 2016, Director di DNM a bisa cu pa loke ta keho di molester, “mas cortico e liña ta entre esun cu tin informacion cu esun cu ta ricibi informacion, mas miho. P’esey si tin algo cu no ta bon, mester haci e kehonan directamente cerca nos.” Pero e experiencia na 2022 ta diferente pasobra segun Anouk Balentina, e unico supervisor di DNM a blokea su number di telefon pa evita cu e por manda mensahe riba e whatsapp pa denuncia situacionnan peligroso pa medioambiente. Ta un number oficial di DNM pa ciudadanonan haci denuncia, y den su caso, ya esey no por sosode