Ayera atardi Konigin Wilhelmina Fonds a realisa un conferencia di prensa pa informa comunidad tocante diferente topico como renobacion di nan website y tambe nan colecta anual cu ta tuma luga na luna di april y mei pa asina haya fondonan pa e fundacion.

Lelicia Tromp vocero di Konigin Wilhelmina Fonds a splica cu den cuadro di celebracion di 60 aña di existencia di e fundacion aki nan a tuma e decision di cambia y actualisa nan website cu awor lo ta www.kwfaruba.org di esaki, el a señala cu nan a cambia e nomber di e website pa uno mas facil y mas accesibel pa publico, asina como tambe nan a dicidi di pone informacion nobo.

Riba e website personanan por haya diferente tipo di informacion como di e fundacion na unda nan tambe lo pone diferente brochure online caminda personanan por print esey y les’e.

“E idea ta cu den un futuro cercano nos lo pone mas informacion online pa e por ta mas accesibel pa comunidad”, Tromp a señala.

Riba website tambe ta haya un seccion di consehonan practico y informacion riba diferente topico relata na cancer y tambe tin tipnan pa loke ta bida saludabel, movecion, con por preveni y con personanan por cuida nan mes contra cancer.

Tromp a menciona cu den e website nan a agrega nan cuentanan di banco unda cu si algun persona kier haci un donacion, e por haya tur informacion riba e website y na mesun momento por scan QR Code di Konigin Wilhelmina Fonds pa asina por haci donacion via e servicio di www.pay.aw.

Den mesun linea aki, Tromp a bisa cu riba e website tambe por haya informacion di Wereld Kanker Onderzoek Fonds cu ta un instancia na Hulanda cu ta traha estrechamente cu Konigin Wilhelmina Fonds unda nan ta haci diferente investigacionnan cientifico y nan tin un bon cooperacion cu nan, personanan interesa por haya informacion tocante nan trabou y un link pa bishita nan website pa por haya ultimo desaroyonan di investigacionnan cu ta regarda cancer na nivel mundial.

Ademas, riba e website tin e link di e diferente rednan social di e fundacion como por ehemplo Facebook unda cu comunidad por drenta y haya sa mas tocante e colecta anual cu nan ta bin haciendo tur fin di siman di e luna aki y di luna mei na diferente localidad rond di Aruba cu e obhetivo di recauda fondonan pa e fundacion pa asina preveni y combati cancer.

Igualmente, por haya informacion tocante e servicionan cu e fundacion ta brinda na comunidad como cuido na cas pa pashentnan cu cancer terminal, servicio pa guia e damanan cu a haci operacion di pecho cu mester di protesis y tambe beha, ademas di guia nan den e proceso aki.

Un servicio cu e fundacion tambe ta brinda ta transporte, Tromp a sigura cu nan ta duna transporte na pashentnan cu cancer ora nan tin cu bay terapia na radio terapia of oncologia, igual ora nan mester bay un specialista, pa asina busca y trece e pashent cu pa hopi biaha e famia ta druk y no tur ora nan por hiba nan ser keri.

Di su parti, Lilian Prins presidente di Konigin Wilhelmina Fonds a trece dilanti cu durante aña 2020 y 2021 nan no por a recauda fondonan pa motibo cu entrada di pandemia di Covid-19 a stroba tur areanan incluyendo e fundacion aki pa bay riba caya y colecta, sinembargo, e malesa di cancer si a keda subi igual cu e gastonan unda cu Prins a expresa cu a traves di e temporada aki Konigin Wilhelmina Fonds a keda duna su asistencia manera mester na e comunidad ora cu nan tabata bati na porta.

Prins a gradici na comunidad cu tur e añanan semper tabata generoso pa yuda e comunidad pa asina nan por a cubri e gastonan di transporte, pa loke ta trata aña pasa, Prins a menciona cu a yega na un suma total di 42.175 florin, ora cu nan ta papia di asistencia na cas cu nan ta duna na pashentnan terminal nan, esey a yega na 145.000 florin y ora cu nan ta papia di manda busca beha cu brazier pa pashentnan di cancer di pecho nan a yega na un suma di 24.000 dollar.

“Ora cu nos ta papia di e sumanan aki, nos a mira cu tabatin dos aña cu nos no a colecta, e ora ey nos kier mustra comunidad Arubano cu tur e aña ey cu nos ta colecta semper tin un cu ta coba e dam y warda e awa aki, pasobra bo no sa ki dia e berdad ta y el a yega, bati na porta pa dos aña largo cu nos ta mira e gastonan hopi halto cu Konigin Wilhelmina Fonds tin” el a comenta.

Di mesun manera, el a bisa cu nan ta papia cu tur e boluntario pa motibo cu nan no ta haya un salario, nan ta haci e trabou aki cu amor pa comunidad y muy en particular pa e persona cu ta yega y bati na porta “cada un di e personanan cu ta den directiva, ta traha boluntario”.

Ta p’esey cu luna di april y mei nan ta subi caya cu e boluntarionan pa colecta fondonan, Prins ta haci un suplica na cada un ciudadano, pa motibo cu “tanten e malesa aki no bati na porta, bo no sa kico e ta”, el a finalisa.