E siman cu a pasa masha fanfaria tabata tin siman ariba ey cu loke ta “Dia di Tera”. Gobierno atrobe pa medio di su minister di medio ambiente a papia masha bunita mes.
Mientras ta papia bunita di naturaleza y e balor di nos ecosistema pa nos subsistencia, nos por mira cu Aruba su balans di loke ta wordo destrui pa construccion ta pisando negativamente.
Asina mi por a comprende cu na altura di e rotonde di Bushiri, riba e Watty Vos Boulevard, como 3 hectar di mondi a wordo roza “clean-clean”, sin cu un pida mata a keda para. Con esakinan por a haya permiso pa roza den e fin di siman aki di e manera ey? DNM a duna OK? Ki proyecto ta biniendo eynan? Atrobe nos espacionan ta wordo sacrifica pa mas supuesto desaroyo? Un desaroyo den desbalansa?
Pa colmo den fin di siman mi a ricibi e potretnan cu a wordo saca riba e dump na Parkietenbos, na unda cu na un forma indiscrimina ta bentando resto di azeta (azeta bieu) riba dump. Potretnan no ta gaña. Kico lo bay bisa awor? Of ken lo bay culpa awor?
No ta pornada ciudadanonan preocupa ta manda mi e potretnan aki. E preocupacion ta grandi.
Gobierno kier bin pretende cu un “tekenwedstrijd” lo bay soluciona nos problema gigantesco cu tin na Parkietenbos. Mi a mustra caba henter e show rond di “trash2cash” ta di un banda pa desvia nos ley di Comptabilidad y di otro banda ta purba di convence e pueblo cu e porkeria di insinerado chikito ta un “state of the art”! Esaki djis pa keda pone man riba cabez di O.O. y pa tapa e corupcion cu a ser cometi den e compra aki.
Ta un tristesa di constata cu te hasta Ministerio Publico ta participa den henter e “cover up” di e corupcion aki. Ami ta bisa, bo no mester ta un experto pa ta di acuerdo cu mi cu e zomaar hisa benta azeta sushi den nos landfill ta simplemente un crimen. E minister encarga no por keda sconde pa e realidad aki.
Mi lo no para keto pa combati e crimen aki contra e pueblo di Parkietenbos. Ta basta cu e palabranan bunita di esnan cu ta traha storianan bunita pa purba di desvia e atencion.
Esaki no tin hustificacion. Ta basta!
